​រុស្ស៊ី៖ ទូរទស្សន៍​រដ្ឋ​រុស្ស៊ី​បាន​រាយការណ៍​កាលពី​ថ្ងៃអាទិត្យ​ថា លោក​ប្រធានាធិបតី​រុស្ស៊ី Vladimir Putin នឹងធ្វើ​ដំណើរ​ទស្សនកិច្ច​ទៅកាន់​រដ្ឋ​តូច​ៗ​ចំនួន​២​ នៃ​អតីត​សហភាពសូវៀត​នៅ​អាស៊ី​កណ្ដាល​ក្នុង​សប្ដាហ៍​នេះ ជា​អ្វីដែល​ត្រូវគេ​ដឹងថា​ ជា​ដំណើរ​លើកដំបូង​របស់​មេដឹកនាំ​រុស្ស៊ី​ទៅកាន់​បរទេស ចាប់តាំងពី​ការបញ្ជា​ឲ្យ​បើក​ការវាយលុក​ចូល​អ៊ុយ​ក្រែ​ន​។

​ការ​វាយ​លុក​របស់​រុស្ស៊ី​កាលពី​ថ្ងៃទី២៤ ខែកុម្ភៈ​បានសម្លាប់​មនុស្ស​រាប់ពាន់​នាក់ មនុស្ស​រាប់លាន​នាក់​ភៀសខ្លួន និង​នាំឱ្យមាន​ការដាក់ទណ្ឌកម្ម​ផ្នែក​ហិរញ្ញវត្ថុ​យ៉ាង​ធ្ងន់ធ្ងរ​ពី​លោកខាងលិច ដែល​លោក Putin និយាយ​ថា ​ជាហេតុ​ផល​ដើម្បី​កសាង​ទំនាក់ទំនង​ពាណិជ្ជកម្ម​ឱ្យ​កាន់តែ​រឹងមាំ ​ជាមួយ​មហា​អំណាច​ផ្សេងទៀត​ដូចជា​ចិន ឥណ្ឌា និង​អ៊ីរ៉ង់​។ ​លោក Pavel Zarubin អ្នកឆ្លើយឆ្លង​ព័ត៌មាន​នៃ​ស្ថានីយ​ទូរទស្សន៍​រដ្ឋ Rossiya 1 របស់​វិមាន​ក្រឹម​ឡាំង​បាន​និយាយ​ថា លោក Putin នឹង​ធ្វើ​ទស្សនកិច្ច​ទៅ​កាន់​តា​ហ្ស៊ី​គី​ស្ថាន និង​តួ​ក​មិន​នី​ស្ថាន ហើយ​បន្ទាប់​មក​ជួប​ជាមួយ​ប្រធានាធិបតី​ឥណ្ឌូនេស៊ីលោក​ Joko Widodo សម្រាប់​កិច្ចពិភាក្សា​នៅ​ទីក្រុង Moscow​។

​នៅ​ទីក្រុង Dushanbe លោក Putin នឹង​ជួប​ជាមួយ​ប្រធានាធិបតី​តាជី​គី​ស្ថាន​លោក Imomali Rakhmon ដែល​ជា​សម្ព័ន្ធមិត្ត​ជិតស្និទ្ធ​របស់​រុស្ស៊ី និង​ជា​អ្នក​មេដឹកនាំ​កាន់អំណាច​យូរ​បំផុត​នៃ​អតីត​រដ្ឋ​សូ​វៀត​មួយ​។ លោក Zarubin បាន​និយាយថា នៅ​ទីក្រុង Ashgabat លោក​នឹង​ចូលរួម​កិច្ចប្រជុំ​កំពូល​នៃ​បណ្ដា​ប្រទេស​សមុទ្រ​កាស​ព្យែ​ន​ (Caspian) រួម​ទាំង​មេដឹកនាំ​នៃ​ប្រទេស​អា​ហ្ស៊ែ​បៃ​ហ្ស​ង់, កា​ហ្សា​ក់​ស្ថាន, អ៊ីរ៉ង់ និង​តួ​ក​មិន​នី​ស្ថាន​។ ទីភ្នាក់ងារសារព័ត៌មាន RIA បាន​ដកស្រង់​សម្តី​លោកស្រី Valentina Matviyenko ប្រធាន​ព្រឹទ្ធសភា​រុស្ស៊ី​ដែល​បាន​ប្រាប់​ទូរទស្សន៍​បេឡា​រុស្ស​កាលពី​ថ្ងៃអាទិត្យ​ថា លោក Putin ក៏​មាន​គម្រោង​ទៅ​ទស្សនកិច្ច​នៅ​ទីក្រុង​ទីក្រុង Grodno ប្រទេស​បេឡា​រុស​នៅ​ថ្ងៃ​ទី​៣០ ខែ​មិថុនា និង​ថ្ងៃ​ទី​១ ខែ​កក្កដា​ផង​ដែរ ដើម្បី​ចូលរួម​ក្នុង​វេទិកា​មួយ​ជាមួយ​ប្រធានាធិបតី​បេឡា​រុស​លោក Alexander Lukashenko៕

អត្ថបទ៖ សុខមាន