ភ្នំពេញ៖ ក្នុងឱកាសទិវាខួបគម្រប់២៤ឆ្នាំរបស់ក្រុមប្រឹក្សាធម្មនុញ្ញ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ ប្តេជ្ញាពង្រឹងស្មារតីរបស់ស្ថាប័ន ដើម្បីបន្តការគោរពនីតិរដ្ឋ និងការពារឯករាជភាព នៃរដ្ឋធម្មនុញ្ញ។

ការថ្លែងរបស់ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញបែបនេះ ធ្វើឡើងក្នុងទិវាខួបគម្រប់២៤ឆ្នាំរបស់ក្រុមប្រឹក្សាធម្មនុញ្ញ នៅថ្ងៃទី២៧ ខែមិថុនា ឆ្នាំ២០២២។ ឯកឧត្តមមានប្រសាសន៍ថា ក្នុងរយៈពេល២៤ឆ្នាំកន្លងមកនេះ ក្រុមប្រឹក្សាធម្មនុញ្ញសម្រេច​បាននូវ​សមិទ្ធផលជាច្រើន អាស្រ័យដោយមានការខិតខំប្រឹងប្រែងអស់ពីកម្លាំងកាយចិត្ត និងការទទួល​ខុស​ត្រូវរបស់ប្រធាន សមាជិក សមាជិកា ក្នុងអាណត្តិនីមួយៗ និងអគ្គលេខាធិការដ្ឋាន​នៃ​ក្រុម​ប្រឹក្សាធម្មនុញ្ញ ដែលបានរួមគ្នាលើកទិសដៅ និងអនុវត្តការងារ ដើម្បីសម្រេចសមត្ថកិច្ច​ដ៏ឧត្តុងឧត្តម​បំផុតរបស់ក្រុមប្រឹក្សាធម្មនុញ្ញ គឺធានាការពារគោរពរដ្ឋធម្មនុញ្ញ ដែលជាមូលដ្ឋានគ្រឹះសម្រាប់​ការ​កសាងនីតិរដ្ឋ។

ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម បន្តថា ដើម្បីបន្តកិច្ចការអភិវឌ្ឍ និងលើកកម្ពស់​កិត្យានុភាព​​របស់ក្រុមប្រឹក្សាធម្មនុញ្ញ ក៏ដូចជាបង្កើនស្មារតីភាពជាធ្លុងមួយនៅក្នុងស្ថាប័ន គឺក្រុម​ប្រឹក្សា​ធម្មនុញ្ញបន្តប្រកាន់ខ្ជាប់ និងគោរពនូវគុណតម្លៃសម្រាប់ស្ថាប័នក្រុមប្រឹក្សាធម្មនុញ្ញ ក្នុងនោះ​គោរពនីតិរដ្ឋ ការពារឯករាជភាព អនុវត្តអព្យាក្រិតភាព សម្រាប់អនុវត្តក្នុងពេលបច្ចុប្បន្ន និងពេល​អនាគតយូរអង្វែង ដើម្បីបំពេញភារកិច្ចដ៏ឧត្តុងឧត្តមរបស់ក្រុមប្រឹក្សាធម្មនុញ្ញ ជាពិសេសការ​ត្រៀម​បំពេញ​ការងារ ដែលជាសមត្ថកិច្ចរបស់ក្រុមប្រឹក្សាធម្មនុញ្ញរួមមាន៖ ដោះស្រាយវិវាទកម្ម​ពាក់ព័ន្ធ​នឹងការបោះឆ្នោតជ្រើសតាំងតំណាងរាស្រ្ត អាណត្តិទី៧ នាខែកក្កដា ឆ្នាំ២០២៣ ខាងមុខ ឲ្យទទួលបានជោគជ័យ។

ជាមួយគ្នានេះឯកឧត្តម ព្រហ្ម វិចិត្រអក្ខរ៉ា អ្នកនាំពាក្យក្រុមប្រឹក្សាធម្មនុញ្ញ បានឱ្យដឹងថា ដើម្បី​ពង្រឹង​ស្មារតីរបស់រដ្ឋធម្មនុញ្ញ នាពេលបច្ចុប្បន្នក្រុមការងារស្ថាបត្យកម្មកំពុងសិក្សា​អំពីការ​សាងសង់ស្តូប ដើម្បីរំលេចពីអត្ថន័យរបស់រដ្ឋធម្មនុញ្ញ ។

នាឱកាសនោះដែរ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម លើកឡើងថា ក្នុងការ​អនុវត្ត​សមត្ថកិច្ចរបស់ខ្លួននារយៈពេល២៤ឆ្នាំកន្លង​ក្រុមប្រឹក្សាធម្មនុញ្ញបានបំពេញការងារដោយ​ស្មារតី​ទទួលខុសត្រូវខ្ពស់ ​និង​ទទួលបាននូវលទ្ធផលផ្លែផ្កាជាច្រើន ក្នុងការធានា​ការពារការគោរព​ធម្មនុញ្ញ ដោយ​សម្រេច​បាននូវ​សមិទ្ធផល ថ្វាយមតិព្រះមហាក្សត្រចំនួន១៤ករណី បកស្រាយរដ្ឋធម្មនុញ្ញ​ចំនួន១១ករណី បកស្រាយចំនួន១០ករណី​ ពិនិត្យធម្មនុញ្ញភាពនៃច្បាប់ចំនួន៩៧ករណី ពិនិត្យ​និង​សម្រេច​លើករណី​វិវាទកម្មទាក់ទង​នឹងការបោះឆ្នោត​សរុប​ចំនួន ​២៨៩សំណុំរឿង​រួមមាន​ការ​បោះឆ្នោត​ជ្រើសតាំង​សមាជិកព្រឹទ្ធសភា ​ចំនួន៤នីតិកាល និងវិវាទកម្មទាក់ទងនឹងការបោះឆ្នោត​ជ្រើស​តាំងតំណាងរាស្រ្តចំនួន៦នីតិកាលផងដែរ៕ អត្ថបទ៖ សេក ឧត្តម