អឺរ៉ុប៖ ប្រធានក្រុមប្រឹក្សារដ្ឋាភិបាលសហភាពអឺរ៉ុបនិយាយថា ប្លុកដែលមានសមាជិក 27ប្រទេសនៅតែមានការឯកភាពក្នុងការគាំទ្រអ៊ុយក្រែនប្រឆាំងការវាយលុករបស់រុស្ស៊ី ដោយមានមូលនិធិ និងការគាំទ្រផ្នែកនយោបាយ ប៉ុន្តែបាននិយាយថា អ៊ុយក្រែនត្រូវការកាន់តែច្រើន ហើយយើងប្តេជ្ញាផ្តល់បន្ថែមទៀត។
ប្រធានក្រុមប្រឹក្សាអឺរ៉ុបលោក Charles Michel បាននិយាយថា សហភាពអឺរ៉ុបនឹងបន្តផ្តល់ការគាំទ្ររឹងមាំដល់អ៊ុយក្រែន ទាំងផ្នែកហិរញ្ញវត្ថុ មនុស្សធម៌ និងនយោបាយ ហើយយើងបានប្រមូលប្រាក់បានចំនួន 2ពាន់លានអឺរ៉ូដើម្បីផ្តល់យុទ្ធោបករណ៍។ សហភាពអឺរ៉ុបបានដាក់ទណ្ឌកម្មចំនួន 6ជុំលើប្រទេសរុស្ស៊ី ដែលកញ្ចប់ទណ្ឌកម្មថ្មីបង្អស់គឺការហាមឃាត់លើការនាំចូលប្រេងឆៅ 90% របស់រុស្ស៊ីនៅចុងឆ្នាំនេះ។ វិធានការនេះគឺសំដៅទៅលើសសរស្ដម្ភនៃហិរញ្ញវត្ថុរបស់វិមានក្រឹមឡាំង ក្នុងការទទួលបានមកពីប្រាក់ចំណូលប្រេង និងឧស្ម័ន។
លោក Michel បាននិយាយនៅក្នុងកិច្ចប្រជុំកំពូលប្រចាំឆ្នាំរបស់ក្រុមប្រទេសរីកលូតលាស់ទាំង៧ កាលពីថ្ងៃអាទិត្យថា សំណើរបស់សហរដ្ឋអាមេរិកសម្រាប់កំណត់តម្លៃ លើការនាំចូលប្រេងពីរុស្ស៊ីកំពុងស្ថិតក្រោមការពិភាក្សា។ ប៉ុន្តែលោកបានព្រមានថា យើងត្រូវមានព័ត៌មានលម្អិត យើងចង់សម្រួលដើម្បីឲ្យប្រាកដថា យើងច្បាស់លាស់អំពីអ្វីដែលជាផលប៉ះពាល់ដោយផ្ទាល់ ប្រសិនបើចំណាត់ការនេះត្រូវបានធ្វើឡើង៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
