​អាហ្វហ្គានីស្ថាន៖ មន្ត្រី​ក្រុម​តា​លី​បង់​កាលពី​ថ្ងៃអាទិត្យ​បាន​ចុះ​ពិនិត្យ​តំបន់​នានា​ក្នុង​ខេត្ត Khost និង Paktika ប្រទេស​អា​ហ្វ​ហ្គា​នី​ស្ថាន ដែល​ត្រូវបាន​វាយប្រហារ​ដោយការ​រញ្ជួយ​ដី​ខ្លាំង​កាលពី​សប្តាហ៍​មុន​។​

​ក្នុងអំឡុងពេល​ធ្វើដំណើ​រ​ទៅកាន់​ស្រុក Spera លោក Khalil ur Rahman Haqqani មន្ត្រី​ក្រុម​តា​លី​បង់​ដែល​ត្រូវបានតែងតាំង​ជា​រដ្ឋមន្ត្រី​ស្តីទី​ទទួលបន្ទុក​ជនភៀសខ្លួន និង​ការធ្វើ​មាតុភូមិនិវត្តន៍ បាន​ជួប​ជាមួយ​ពលរដ្ឋ​នៅក្នុង​សហគមន៍ដែល​លំនៅឋាន​របស់​ពួកគេ និង​ហេដ្ឋារចនាសម្ព័ន្ធ​ត្រូវ​បាន​បំផ្លាញ​ដោយ​រញ្ជួយ​ដី​។ លោក​បាន​ថ្លែងអំណរគុណ​ដល់​ទី​ភ្នាក់ងារ​ផ្តល់​ជំនួយ​អន្តរជាតិ និង​ប្រទេស​នានា​សម្រាប់​ការ​គាំទ្រ ប៉ុន្តែ​បាន​អំពាវនាវ​សុំឱ្យ​មានការ​យកចិត្តទុកដាក់​កាន់​តែ​ខ្លាំង​លើ​ការ​គាំទ្រ ដើម្បី​ជួយ​ប្រជាជន​ក្នុង​ការ​ស្តារ និង​សាងសង់​លំនៅឋាន​របស់​ពួកគេ​ឡើងវិញ​។​ ​យោង​តាម​មន្ត្រី​មន្ទីរ​សុខាភិបាល​ខេត្ត Khost បាន​ឲ្យ​ដឹងថា ​នៅក្នុង​ស្រុក Spera មនុស្ស 36នាក់​បាន​ស្លាប់ និង​ជាង ​1,300នាក់​បាន​រង​របួស ខណៈ​លំនៅឋាន​ចំនួន 1,500​ខ្នង​ត្រូវ​បាន​បំផ្លាញ។​

​ការរញ្ជួយ​ដី​នេះ​បាន​វាយប្រហារ​តំបន់​ដាច់ស្រយាល ក្នុង​តំបន់​ប្រជាជនមាន​ជីវភាព​ក្រីក្រ​ខ្លាំង​នៅ​ក្រុង​តូចៗ និង​ភូមិ​នៅក្បែរ​ព្រំដែន​ជាមួយ​ប្រទេស​ប៉ា​គី​ស្ថាន​។ ប្រព័ន្ធ​ផ្សព្វផ្សាយ​រដ្ឋ​បាន​រាយការណ៍​ថា ​លំនៅឋាន​ជិត 3,000​ខ្នង​ត្រូវបាន​បំផ្លាញ ឬ​ខូចខាត​ធ្ងន់ធ្ងរ​នៅក្នុង​ខេត្ត Paktika និង​ខេត្ត Khost។​ ​សេដ្ឋកិច្ច​របស់​ប្រទេស​អា​ហ្វ​ហ្គា​នី​ស្ថាន​បាន​ពឹង​ផ្អែក​លើ​ការគាំទ្រ​ពី​ម្ចាស់ជំនួយ​អន្តរជាតិ ទោះបី​មុនពេល​ក្រុម​តា​លី​បង់​ចូល​គ្រប់គ្រង​កាលពី​ខែសីហា​ឆ្នាំមុន​ក៏ដោយ ខណៈ​​សហរដ្ឋអាមេរិក និង​សម្ព័ន្ធមិត្ត​ណា​តូដក​កងកម្លាំង​របស់​ពួកគេ ដោយបាន​បញ្ចប់សង្គ្រាម​រយៈពេល 20ឆ្នាំ​។​ ​រដ្ឋាភិបាល​នៅ​ទូទាំង​ពិភពលោក​បាន​បញ្ឈប់​ការផ្តល់​ជំនួយ​អភិវឌ្ឍន៍​ ក្នុង​ទឹកប្រាក់​រាប់ពាន់​លាន​ដុល្លារ និង​បាន​បង្កកប្រាក់​បម្រុង​របស់​ប្រទេស​អា​ហ្វ​ហ្គា​នី​ស្ថាន ដោយ​បដិសេធ​មិន​ទទួលស្គាល់​រដ្ឋាភិបាលតា​លី​បង់ និង​ទាមទារ​ឱ្យ​ពួកគេគោរព​សិទ្ធិមនុស្ស​៕

អត្ថបទ៖ ប៊ុនថន