ភ្នំពេញ៖ នៅថ្ងៃស្អែកនេះ គណបក្សប្រជាជនកម្ពុជា នឹងមានអាយុកាល ៧១ ឆ្នាំ។ សម្រាប់វត្តមានគណបក្សប្រជាជនកម្ពុជា គឺប្រជាពលរដ្ឋជាពិសេសអ្នករស់រានមានជីវិត ពីរបបប្រល័យ​ពូជសាសន៍ ប៉ុលពត នៅតែចងចាំ និងចាត់ទុកថា គណបក្សមួយនេះ មានគុណ​បំណាច់​ធំធេងរំដោះជីវិត ផ្តល់ជីវិតថ្មី និងនាំមកនូវសន្តិភាពសម្រាប់គ្រប់គ្នា។

២៨ មិថុនា ឆ្នាំ១៩៥១ - ២៨ មិថុនា ឆ្នាំ ២០២២ ជាខួប ៧១ ​ឆ្នាំនៃការបង្កើតគណបក្សប្រជាជនកម្ពុជា ដែលមានឈ្មោះដើមថា ​ថាបក្សប្រជាជនបដិវត្តន៍កម្ពុជា។ គណបក្សប្រជាជនកម្ពុជា សព្វថ្ងៃបាន​ក្លាយ​ជាគណបក្សធំជាងគេ និងមានអ្នកគាំទ្រច្រើនជាងគេបំផុត ដែលតែងតែឈ្នះក្នុងការបោះឆ្នោត ទាំងការបោះឆ្នោតជ្រើសរើសក្រុមប្រឹក្សាឃុំសង្កាត់ ​និងការបោះឆ្នោតសកល។

គណបក្សប្រជាជនកម្ពុជា មានប្រវត្តិសាស្រ្ត និង​សមិទ្ធផល​ជាច្រើន ​ទាំងក្នុងអតីតកាល និងពេល​បច្ចុប្បន្ន។ នេះជាការលើកឡើងរបស់ប្រជាពលរដ្ឋ ដែលជាជនរស់រានមានជីវិតពីសម័យ​ខ្មែរក្រហម។

ពួកគាត់លើកឡើងថា គុណបំណាច់ធំធេងបំផុតរបស់គណបក្សវ័យចំណាស់មួយនេះ គឺការ​ស្រោចស្រង់​ជីវិតប្រជាពលរដ្ឋឱ្យផុតពីសេចក្ដីស្លាប់ពីរបប ៣ឆ្នាំ ៨ខែ និង ២០ថ្ងៃ។ គុណបំណាច់នេះ ​នៅតែស្ថិតក្នុងបេះដូងពួកគាត់​ ទោះកន្លងទៅរាប់សិបឆ្នាំយ៉ាងណាក្ដី។

ក្រៅពីការផ្ដល់​កំណើតលើកទី ២ ​គឺការនាំមកនូវសន្តិភាព ភាពសុខសាន្ត និងការអភិវឌ្ឍដល់​សង្គមជាតិ​រហូតដល់ពេលសព្វថ្ងៃ។

នេះជាការមើលឃើញរបស់ពួកគាត់ ​ដែលធ្លាប់ឆ្លងកាត់ច្រើនសម័យកាល តាំងពីសង្គមជាតិស្ថិត​ក្នុងភាពខ្មៅងងឹត ​រហូតដល់សង្គមជាតិមួយដែលមានសន្តិភាព។

គួររម្លឹកថា គណបក្សប្រជាជនកម្ពុជា​ មានឈ្មោះដើមថា ​បក្សប្រជាជនបដិវត្តន៍កម្ពុជា។ គណបក្សនេះ​ បានបដិសន្ធិឡើងនៅថ្ងៃទី២៨ ខែមិថុនា ឆ្នាំ១៩៥១ ដោយមានប្រភពពីចលនាតស៊ូ របស់ប្រជាជនកម្ពុជា ប្រឆាំងពួកអាណានិគមនិយមដើម្បីឯករាជ្យជាតិ៕ អត្ថបទ៖ គឹមហុក