ភ្នំពេញ៖ សហភាពសហគមន៍កសិកម្មបន្លែសុវត្ថិភាពកម្ពុជាជាទីតាំងប្រមូលបន្លែសុវត្ថិភាពក្នុងរោងសំណាញ់ របស់កសិករពីតាមបណ្ដាខេត្តមួយចំនួន បានអះអាងថា បន្លែសុវត្ថិភាពកំពុងមានសន្ទុះគាំទ្រច្រើន និងជំរុញដល់កសិករនិយមដាំបន្លែផ្សេងៗទៀត គួរងាកមកដាំបន្លែប្រភេទនេះ ដោយសហភាពអាចជួយបង្រៀនផ្នែកបច្ចេកទេសផងដែរ។

​លោក ជួ មករា ប្រធានសហភាពសហគមន៍កសិកម្ម បន្លែសុវត្ថិភាពកម្ពុជា លើកឡើងថា បន្លែសុវត្ថិភាពក្នុងរោងសំណាញ់ កំពុងមានតម្រូវការច្រើន ប៉ុន្តែបរិមាណមិនទាន់ឆ្លើយតបនឹងទីផ្សារនៅឡើយទេ បច្ចុប្បន្ននៅកម្ពុជាកំពុងខ្វះរោងផ្ទះសំណាញ់ច្រើន ដោយសហភាពចង់ជំរុញដល់កសិករដទៃទៀត មិនទាន់បានប្រមូលផ្ដុំមិនមែនជាសមាជិក សូមផ្ដោតទៅលើការវិនិយោគសាងសង់រោងសំណាញ់ ដើម្បីយកឱកាសនេះផលិតបន្លែសុវត្ថិភាពចូលក្នុងទីផ្សារ។

លោកបន្តថា ក្នុងការងារជួយដោះស្រាយបញ្ហា ការសាងសង់រោងផ្ទះសំណាញ់នេះ សហភាពព្យាយាមពិភាក្សាទៅប្រភព នៃការផ្គង់ផ្គង់ធាតុចូលកសិកម្ម ដែលក្នុងនោះ មានសម្ភារសាងសង់រោងផ្ទះសំណាញ់ ដោយទាក់ទងផ្ទាល់ទៅរោងចក្រក្រៅប្រទេស ធ្វើម៉េចឲ្យមានតម្លៃទាប និងការរៀបចំទីតាំងធ្វើគំរូ ដើម្បីឲ្យកសិករបានរៀនធ្វើជីកំប៉ុសដោយខ្លួនឯង ដែលវត្ថុធាតុដើមមួយចំនួនមាននៅតាមសហគមន៍នីមួយៗ ដែលអាចជួយកាត់បន្ថយនូវថ្លៃដើមនៃការដាំដុះ។

លោក ជួ មករា បានបន្ថែមថា សហភាពសហគមន៍កសិកម្ម បន្លែសុវត្ថិភាពកម្ពុជា បានបង្កើតឡើងជាង១ឆ្នាំមកហើយ បច្ចុប្បន្នមានសមាជិកចំនួន ១០សហគមន៍ មានរោងសំណាញ់ជាង២០០រោង ហើយសហភាពកំពុងសិក្សា និងផ្សព្វផ្សាយបន្តទៅតំបន់មួយចំនួនទៀត ក្នុងការប្រមូលផ្ដុំបន្លែសុវត្ថិភាពនេះ។

គួរបញ្ជាក់ថា បន្លែសុវត្ថិភាព មានការប្រមូលផ្ដុំនៅក្នុងសហភាពសហគមន៍កសិកម្ម បន្លែសុវត្ថិភាពកម្ពុជា មានដូចជាខាត់ណាផ្កាពណ៌ស ពណ៌ខៀវ ម្ទេសហាវៃ ប៉េងប៉ោះ ស្ពៃតឿ ស្ពៃក្រញាញ់ ស្ពៃក្ដោប និងបន្លែជាច្រើនមុខទៀត ខណៈសហភាពគ្រោងនឹងមានប្រការប្រមូលផ្ដុំនូវផ្លែឈើតាមរដូវមួយចំនួនទៀត៕ អត្ថបទ៖ បាន សុខរិទ្ធិ

​