ព្រះសីហនុ៖ ក្រោយពីស្ថានភាពជំងឺកូវីដ-១៩ ត្រូវបានគ្រប់គ្រងបានល្អ និងមានប្រសិទ្ធភាពនោះ វិស័យទេសចរណ៍ក្នុងខេត្តព្រះសីហនុ ត្រូវបានកត់សម្គាល់ឃើញថា ចាប់ផ្ដើមមានកំណើនបណ្ដើរៗវិញហើយ ពិសេសការធ្វើដំណើរទៅកម្សាន្តនៅតាមកោះ។

លោក ម៉ុត ភារី ជំនួយការសមាគមភ្នាកងារដឹកជញ្ជូនភ្ញៀវទេសចរជលយានខេត្ដព្រះសីហនុ បាបឱ្យដឹងថា ក្រោយពី ស្ថានភាពជំងឺកូវីដ-១៩វិលមករកភាពប្រសើរវិញនោះ ខេត្ដព្រះសីហនុ ចាប់ផ្ដើមមានភ្ញៀវទេសចរ ចូលលេងលម្ហែ និងស្នាក់នៅច្រើន មានការកើនឡើងជាបន្ដបន្ទាប់ ជា​ពិសេសការធ្វើដំណើរទៅកម្សាន្ដនៅតាមបណ្ដាកោះរហូតដល់រាប់ពាន់នាក់។

លោក តាំង សុចិត្ដគ្រឹស្នា ប្រធានមន្ទីរទេសចរណ៍ខេត្តព្រះសីហនុ ​បានបញ្ជាក់ថា មន្ទីរ នៅ​តែ​បន្ដ​ជំរុញ​ការផ្សព្វផ្សាយ​ ណែនាំដល់ប្រតិបត្ដិករទេសចរណ៍ឱ្យពង្រឹងគុណភាពវេសាកម្មទេសចរណ៍ តាមរយៈការបណ្ដុះបណ្ដាលហ្វឹកហ្វឺន ថែរក្សា អនាម័យ បរិស្ថាន និងអនុវត្ដតាមសារាចរណ៍ណែនាំ​របស់ក្រសួងទេសចរណ៍ ​ស្ដីពីសុវត្ថិភាពទេសចរណ៍ ​ជាមួយនឹងការ បង្កើតព្រឹត្ដិការណ៍ទេសចរណ៍ ។ល។ ដើម្បីទាក់ទាញភ្ញៀវទេសចរ។

លោក បានបញ្ជាក់ថា ជាមួយនឹងធនធានសក្តានុពលធម្មជាតិ ​និងផែនការទីផ្សារទេសចរណ៍ ដែលបាន​សិក្សាលម្អិត ​និងច្បាស់លាស់ក្នុងការចាប់យកទីផ្សារ “ទីផ្សារទេសចរណ៍គុណភាព” តាមរយៈការអភិវឌ្ឍ “ទេសចរណ៍ធុរកិច្ច” “ទេសចរណ៍​អាពាហ៍ពិពាហ៍” “ទេសចរណ៍នាវាកម្សាន្ត” “ទេសចរណ៍ធម្មជាតិ” “ទេសចរណ៍តាមឆ្នេរ និងកោះ” និង“ទេសចរណ៍ទីក្រុង” ។ល។

បច្ចុប្បន្ន ខេត្តព្រះសីហនុ មានមូលដ្ឋានអាជីវកម្មសរុប៣៦៦ទីតាំង មានបុគ្គលិក បម្រើការងារផ្ទាល់​សរុបជាង ៧៧០០នាក់។ នៅមុនព្រឹត្តិការណ៍ជំងឺកូវីដ-១៩ ខេត្តព្រះសីហនុ​ទទួលបាន​ភ្ញៀវទេសចរ​ប្រមាណ ២លាននាក់ ក្នុង១ឆ្នាំ ក្នុង អត្រាកំណើន ១០% ទៅ ១៥% ក្នុងនោះ ទេសចរអន្តរជាតិ​មាន​ប្រមាណ ២៥% ទៅ ៣០%៕អត្ថបទ៖ គង់ ប៊ុនថា