ភ្នំពេញ៖ ក្នុងជំនួបជាមួយគណៈគ្រប់គ្រង បុគ្គលិក គ្រូឧទ្ទេស និស្សិត និងគរុនិស្សិត នៃវិទ្យាស្ថាន​ជាតិអប់រំ នាព្រឹកថ្ងៃទី២៧ ខែមិថុនា ឆ្នាំ២០២២នេះ ឯកឧត្តម ហ៊ុន ម៉ានី ប្រធាន​គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានចែករំលែក​ពីគោល​គំនិតទាក់ទង នឹងស្ថានភាព និងសារៈសំខាន់នៃវិស័យអប់រំក្នុងក្របខណ្ឌកម្ពុជា ​និងសកលលោក ព្រមទាំងបានគូសបញ្ជាក់ពីគុណតម្លៃនៃអាជីពគ្រូបង្រៀន​ ដែលមានការលះបង់ធំធេង នូវប្រយោជន៍​ផ្ទាល់ខ្លួន ដើម្បីប្រយោជន៍សង្គម។

ឯកឧត្តម ហ៊ុន ម៉ានី បានថ្លែងអំណរគុណលោកគ្រូ អ្នកគ្រូទាំងអស់ដែលបានព្យាយាមប្រើ​គ្រប់​មធ្យោបាយ បត់បែន ផ្លាស់ប្តូរទម្លាប់ ​ដើម្បីធានាប្រសិទ្ធភាពការបង្រៀន និងការខិតខំអភិវឌ្ឍន៍​សមត្ថភាពបច្ចេកវិទ្យា ដើម្បីអាចបង្រៀនសិស្សានុសិស្ស តាមប្រព័ន្ធអ៊ីនធឺណេត ក្នុងបរិបទ​នៃ​ការរីករាល​នៃជំងឺ កូវីដ-១៩។

ជាមួយគ្នានេះ ឯកឧត្តម ក៏បានរំលេចពីការយកចិត្តទុកដាក់របស់រាជរដ្ឋាភិបាល​ ចំពោះវិស័យអប់រំ តាមរយៈគោលនយោបាយជាតិនានាជាបន្តបន្ទាប់ ។

ពិធីសំណេះសំណាលបានប្រព្រឹត្តទៅដោយរលូន ជាមួយនឹងការផ្តោះផ្តងនូវមតិ យោបល់ ក្នុងវេទិកាសំណួរ ​នឹងចម្លើយរវាងឯកឧត្តមប្រធានគណៈកម្មការ និងបុគ្គលិក គ្រូឧទ្ទេស និស្សិត និងគរុនិស្សិត។

វេទិការនេះ បានអនុញ្ញាតឱ្យគណៈកម្មការទី៧ ស្វែងយល់ ​និងក្តាប់បានកាន់តែច្បាស់ពីឱកាស និងបញ្ហាមួយ​ចំនួនដែលជាក្តីកង្វល់ក្នុងវិស័យអប់រំ។

ឆ្លៀតក្នុងឱកាសនេះដែរ ឯកឧត្តម ហ៊ុន ម៉ានី ក៏បានជំរុញលើកទឹកចិត្តដល់គរុនិស្សិត ឱ្យ​បន្តរក្សាស្មារតីលះបង់ដ៏ឧត្តមរបស់លោកគ្រូ អ្នកគ្រូគ្រប់ជំនាន់ តាមរយៈការបំពេញតួនាទី ភារកិច្ច​របស់ខ្លួន ក្នុងនាមជាមន្រ្តីរាជការ ដោយយកចិត្តទុកដាក់គ្រប់កាលៈទេសៈ ​ទោះបរិបទណា ឬនៅទីជិត ឆ្ងាយ ឬនៅជនបទដាច់ស្រយាលក៏ដោយ ដើម្បីអនាគតសិស្សានុសិស្សគ្រប់រូប សហគមន៍ និងសង្គមជាតិកម្ពុជា។

សូមបញ្ជាក់ផងដែរថា ពិធីសំណេះសំណាលនេះ មានការអញ្ជើញចូលរួមពីឯកឧត្តម សំ រិទ្ធី អនុប្រធាន​គណៈកម្មការ ឯកឧត្តម ខៀវ ភារិទ្ធ លេខាធិការ ​និងវត្តមានឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា លោកឌី បុណ្ណា នាយកស្តីទី នៃវិទ្យសា្ថនជាតិអប់រំ ព្រមទាំង​គណៈគ្រប់គ្រង បុគ្គលិក គ្រូឧទ្ទេស និស្សិត និងគរុនិស្សិត សរុបប្រមាណ១៣៩២ នាក់៕ អត្ថបទ រដ្ឋា