ភ្នំពេញ៖ ក្នុងគោលបំណងជួយដល់គ្រួសារដែលរងផលប៉ះពាល់ដោយទឹកជំនន់ និងក្រុមដែលងាយរងគ្រោះអាសន្នទឹកជំនន់ ក៏ដូចជាកសាងភាពធន់នឹងមុខសញ្ញាគ្រោះទឹកជំនន់។ ក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំផែនការដំបូងមួយ ដើម្បីឆ្លើយតបឱ្យបានគ្រប់ជ្រុងជ្រោយចំពោះគ្រោះមហន្តរាយទឹកជំនន់ និងផលប៉ះពាល់ដែលមានសក្ដានុពលរបស់វា។

នៅក្រោយសិក្ខាសាលាពិគ្រោះយោបល់ស្តីពី ផែនការត្រៀមបម្រុងឆ្លើយតបទៅនឹងគ្រោះមហន្តរាយ​ទឹកជំនន់ឆ្នាំ២០២២ កាលពីព្រឹកថ្ងៃទី២៧ ខែមិថុនានេះ លោក ឈួរ សុបញ្ញា ប្រធាននាយកដ្ឋាន​សុខុមាលភាពសង្គម នៃក្រសួងសង្គមកិច្ច អតីតយុទ្ធជន ​និងយុវនីតិសម្បទា បានមានប្រសាសន៍​ប្រាប់បណ្តាញអ្នកសារព័ត៌មានថា ផែនការត្រៀមបម្រុងនេះ គឺជាផែនការដំបូង ដែលមានមូល​និធិជាតិជំនួយសង្គម ដោយតម្រូវឱ្យក្រសួង ស្ថាប័ន រៀបចំឡើងដើម្បីត្រៀមបង្ការកាត់​បន្ថយ​ហានិភ័យគ្រោះមហន្តរាយ និងឆ្លើយតបទាន់ពេលវេលាប្រកបដោយប្រសិទ្ធភាពខ្ពស់ និងបំពេញ​បាននូវតម្រូវការជាមូលដ្ឋានរបស់ជនរងគ្រោះ និងងាយរងគ្រោះ។

លោកបន្តថា ផែនការនេះ បានកំណត់យកទឹកជំនន់ជាមុខសញ្ញាគ្រោះថ្នាក់ ​ដែលអាចកើតមាន ដោយបាន​រួមបញ្ចូល​គោលការណ៍ ​ណែនាំជាក់ស្តែងស្តីអំពី​សកម្មភាព​ ដែលគួរធ្វើមុនពេល​គ្រោះ​ទឹកជំនន់ សកម្មភាពដែលធ្វើទុកមុន​ ការឆ្លើយតបទឹកជំនន់ ​និងសកម្មភាពក្រោយគ្រោះទឹកជំនន់។

នៅក្នុងពិធីបើកសិក្ខាសាលា ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និង​យុវនីតិសម្បទា បានមានប្រសាសន៍ថា ​តាមការរាយការណ៍ គិតក្នុងឆ្នាំ២០២១ ​គ្រួសារប្រហែលជាង ២៨ ០០០ ក្នុងខេត្តចំនួន៥ បានរងផលប៉ះពាល់ដោយសារជំនន់រហ័ស និងទឹកជំនន់ទន្លេ។ នៅតំបន់ទាំងនេះ ផ្ទះ ហេដ្ឋារចនាសម្ព័ន្ធ ​និងដីកសិកម្មត្រូវបានជន់លិច។ ហើយខេត្តដែលរង​គ្រោះច្រើនជាងគេមានខេត្តបន្ទាយមានជ័យ ​បាត់ដំបង់ កំពង់ស្ពឺ សៀមរាប​ និងខេត្តរតនគិរី។ ឯកឧត្តម បានលើកឡើងបន្តថា ​ដើម្បីបង្កើតផែនការបម្រុងខាងលើនេះ​កាន់តែមានប្រសិទ្ធិភាព ចំាបាច់ត្រូវមានការចូលរួមការសម្រេចចិត្តជាមុនអំពីការគ្រប់គ្រងធនធានមនុស្ស ​និងហិរញ្ញវត្ថុ នីតិវិធីសម្របសម្រួល ​និងទំនាក់ទំនង​ និងការយល់ដឹងអំពីការឆ្លើយតបផ្នែកបច្ចេកទេស និងភស្តុភារជាច្រើន។

ជាមួយគ្នានេះ លោកស្រី Claire Conan នាយិកា និងតំណាងប្រចាំប្រទេស កម្មវិធីស្បៀងអាហារ​ពិភពលោក​ប្រចាំនៅកម្ពុជា ​បានបញ្ជាក់ ​សម្រាប់ផែនការត្រៀម​បម្រុងជំនួយ​សង្គមឆ្លើយតបទៅ​នឹងគ្រោះមហន្តរាយទឹកជំនន់ខាងលើ គឺបានកំណត់យកទឹកជំនន់ជាមុខសញ្ញាគ្រោះថ្នាក់ ដែល​អាចកើតមាន ដោយបានរួម​បញ្ចូលគោលការណ៍​ ណែនាំ ​ជាក់ស្តែងស្តីអំពីសកម្មភាព ដែល​គួរធ្វើមុនពេលគ្រោះទឹកជំនន់​ សកម្មភាពដែលធ្វើទុកមុន ការឆ្លើយតបទឹកជំនន់ និង​សកម្មភាពក្រោយគ្រោះទឹកជំនន់៕អត្ថបទ៖ ឈិត បូរ៉ាវី