ព្រៃវែង៖ នៅវិទ្យាល័យព្រៃព្នៅ ក្នុងស្រុកពារាំង ខេត្តព្រៃវែង បានរៀបចំពិធីសំណេះសំណាល និងជូនរង្វាន់ដល់សិស្សជ័យលាភី មេដាយមាស មេដាយប្រាក់ និងចំណាត់ថ្នាក់កិត្តិយសលើមុខវិជ្ជាអក្សរសិល្ប៍ខ្មែរ គណិតវិទ្យា រូបវិឡា ឆ្នាំសិក្សា ២០២១-២០២២ ។

លោក ឆាយ ប៉េងឆាន នាយកវិទ្យាល័យព្រៃព្នៅ បានលើកឡើងថា នេះជាមោទកភាពធំបំផុតរបស់គណៈគ្រប់គ្រង លោកគ្រូ អ្នកគ្រូ អាណាព្យាបាលសិស្ស អាជ្ញាធរមូលដ្ឋាន ដែលសិស្សានុសិស្សនៅ វីទ្យាល័យ ព្រៃព្នៅ តែងតែទទួលបានលទ្ធផលល្អក្នុងការសិក្សាជារៀងរាល់ឆ្នាំ។

លោកបានឱ្យដឹងថា នៅថ្ងៃទី១៣ ខែមិថុនា នេះ នៅខេត្តសៀមរាប បានរៀបចំប្រឡងសិស្សពូកែទូទាំងប្រទេសសាលា បានបញ្ជូនសិស្សានុសិស្សចំនួន៩រូបទៅចូលរូមប្រកួត ដោយទទួលបានលទ្ធផលចំនួន៦រូប ក្នុងនោះថ្នាក់ទី១២ ផ្នែកអក្សរសិល្ប៍ខ្មែរ ទទួលបានលេខ១ “មេដាយមាស និងលេខ២  ទទួលបាន មេដាយប្រាក់។

ចំពោះថ្នាក់ទី៩ ផ្នែកអក្សរសិល្ប៍ខ្មែរ បានទទួលមេដាយមាសម្នាក់ ក្រៅពីនោះបានទទួលចំណាត់ថ្នាក់កិតិ្តយស។ ហើយសិស្សដែលទទួលបានជ័យលាភីនៅពេលនេះ សុទ្ធតែជាសិស្សស្រី។

ឯកឧត្តម កៅ កេសារៈ អនុប្រធានក្រុមការងារចុះជួយឃុំព្រៃព្នៅ តំណាងនាយឧត្តមសេនីយ៍ ប៉ែន វិបុល ប្រធានក្រុមការងាររាជរដ្ឋាភិបាល ចុះជួយមូលដ្ឋានឃុំព្រៃព្នៅ បានលើកឡើងថា កត្តាដែលនាំឲ្យមានសិស្សប្រឡងជាប់ទទួលបានលទ្ធផលដ៏ប្រសើរនេះ ក៏ជាចំណែកនៃការយកចិត្តទុកដាក់ពីគណៈនាយក លោកគ្រូ អ្នកគ្រូ អាណាព្យាបាលសិស្ស អាជ្ញាធរមូលដ្ឋាន ជាពិសេសដោយសារមានការខិតខំប្រឹងប្រែងរៀនសូត្រ តស៊ូព្យាយាមស្រាវជ្រាវ លើមេរៀន និងឯកសារផ្សេងៗរបស់សិស្សខ្លួនឯងផ្ទាល់ ។

លោក ហ៊ី ធួក អភិបាលស្រុកពារាំង បានបញ្ជាក់ថា ចំណេះដឹង គឺជាមូលដ្ឋានគ្រឹះនៃការអភិវឌ្ឍសង្គមជាតិ អភិវឌ្ឍខ្លួន និងក្រុមគ្រួសារ ក្លាយខ្លួនទៅជាគំរូល្អដល់អ្នកជំនាន់ក្រោយ ឲ្យខិតខំប្រឹងប្រែងសិក្សារៀនសូត្រ ដើម្បីក្លាយខ្លួនដូចជារៀមច្បងនាពេលនេះ។

លោកអភិបាលស្រុក បានផ្តាំផ្ញើយុវជន ទោះបីជាបានជាប់ជាសិស្សពូកែ ក៏ពិតមែន ត្រូវបន្តការខិតខំប្រឹងប្រែងសិក្សារៀនសូត្របន្តទៀត។

សិស្សានុសិស្ស បានសម្ដែងនូវទឹកចិត្តសប្បាយរីករាយជាពន់ពេក ដែលទទួលបានជ័យលាភីសិស្សពូកែនាពេលនេះ ហើយក៏បានផ្ដាំផ្ញើដល់សិស្សជំនាន់ក្រោយ ត្រូវខិតខំប្រឹងប្រែងសិក្សារៀនសូត្រឱ្យពូកែដើម្បីទទួលបានលទ្ធផលល្អដូចពួកខ្លួននេះ៕ អត្ថបទ៖ សៅ យ៉ាម៉ង់