​រុស្ស៊ី៖ លោក Dmitry Medvedev អតីត​ប្រធានាធិបតី​រុស្ស៊ី​ត្រូវ​បាន​ដកស្រង់​សម្ដី ខណៈ​និយាយ​កាលពី​ថ្ងៃ​ចន្ទ​ថា រាល់​ការបំពាន​ណាមួយ​លើ​ឧបទ្វីប Crimea ​ពី​សំណាក់​រដ្ឋ​ជា​សមាជិក​របស់​សម្ព័ន្ធ​យោធា​ណា​តូ អាច​ឈាន​ទៅ​រក​ការ​ប្រកាសសង្គ្រាម​លើ​រុស្ស៊ី​ដែល​អាច​នាំ​ឲ្យ​ផ្ទុះ​សង្គ្រាម​លោក​លើក​ទី​៣​។

​លោក Medvedev បាន​ប្រាប់​គេហទំព័រ​ព័ត៌មាន Argumenty i Fakty ថា សម្រាប់​យើង​តំបន់ Crimea គឺជា​ផ្នែក​មួយ​របស់​រុស្ស៊ី​។ ​ហើយ​នោះ​មានន័យថា​ ជា​ដែនដី​របស់​យើង​ជា​រៀង​រហូត​តទៅ​។ រាល់​ការ​ប៉ុនប៉ង​ណាមួយ​បំពាន​លើ​តំបន់​នេះ គឺ​ស្មើ​នឹង​ការ​ប្រកាស​សង្គ្រាម​ជាមួយ​ប្រទេស​របស់​យើង។ ហើយ​បើ​រដ្ឋ​ជា​សមាជិក​របស់​សម្ព័ន្ធ​យោធា NATO ​​ណាមួយ​បាន​ធ្វើ​បែបនេះ​ មានន័យថា ជម្លោះ​ជាមួយ​សម្ព័ន្ធមិត្ត​អាត្លង់ទិក​ខាងជើង​ទាំងមូល សង្គ្រាមលោកលើកទី​៣ ​គឺជា​មហន្តរាយ​ដ៏​ធំធេង​។​

​លោក Medvedev ដែល​បច្ចុប្បន្ន​ជា​អនុប្រធាន​ក្រុមប្រឹក្សាសន្តិសុខ​ជាតិ​រុស្ស៊ីក៏បាន​និយាយ​ផង​ដែរ​ថា បើ​ប្រទេស​ហ្វាំ​ង​ឡង់ និង​ស៊ុយអែត​ចូល​ជា​សមាជិក​សម្ព័ន្ធ​ NATO រុស្ស៊ី​នឹង​ពង្រឹង​ព្រំដែន​របស់​ខ្លួន ហើយ​នឹង​ត្រៀម​សម្រាប់​ជំហាន​សងសឹក​នានា និង​អាច​រួម​ទាំង​ការដំឡើង​មី​ស៊ី​ល​ល្បឿន​លឿន​ជាង​សំឡេង Iskander នៅ​ជាប់​របង​ផ្ទះ​របស់​ពួកគេ​៕​

អត្ថបទ៖ សុខមាន