​វាយកូនបាល់៖ ​ព្រឹត្តិការណ៍ Grand Slam, Wimbledon បានចាប់ផ្តើម​ហើយ​នៅ​ថ្ងៃ​ចន្ទ​ម្សិលមិញ​នេះ ខណៈ​អ្នកការពារ​តំណែង​ជើងឯក​កីឡាករ​ស៊ែ​ប Novak Djokovic និង​អតីត​លេខ ១ ពិភពលោក Andy Murray សុទ្ធតែ​ឈ្នះ​នៅ​ជុំ​ដំបូង​។

​​កីឡាករ​វ័យ ៣៥ឆ្នាំ Novak Djokovic បាន​យកឈ្នះ​កីឡាករ​កូរ៉េ​លំដាប់​លេខ ៨១ ពិភពលោក Kwon Soon-woo ៦-៣, ៣-៦, ៦-៣ និង ៦-៤​។ ​​ម្ចាស់​ជ័យលាភី Grand Slam ២០លើក Djokovic បាន​និយាយ​ក្រោយ​ចប់​ការប្រកួត​ថា គេ​សុខចិត្ត​ខកខាន​ការប្រកួត Grand Slam ណាមួយ ប្រសើរ​ជាង​ការទទួលយក​វ៉ាក់សាំង​កូ​វីដ​-១៩​។ ​​Djokovic បាន​ខកខាន​ការប្រកួត Grand Slam, Australian Open នាពេល​កន្លងមក​ដោយ​សារ​បញ្ហា​វ៉ាក់សាំង​នេះ ហើយក៏​ត្រូវ​បញ្ជា​ឱ្យ​ចាក​ចេញពី​ប្រទេស​អូស្ត្រាលី និង​មិន​អនុញ្ញាតឱ្យ​ជាន់ដី​អូស្ត្រាលី​រយៈពេល ៣ឆ្នាំ​។ ​​យ៉ាងណាក្តី នាយករដ្ឋមន្ត្រី​អូស្ត្រាលី​លោក Scott Morrison ធ្លាប់បាន​និយាយថា Djokovic អាច​វិល​ចូល​ទឹក​អូស្ត្រាលី​វិញ​ឆាប់ៗ​នេះ​ក្នុង​កាលៈ​ទេសៈ​ត្រឹមត្រូវ​ណាមួយ​។

តែ​មកដល់ពេលនេះ​ក៏​នៅ​មិន​ទាន់​មាន​ភ្លើង​ខៀវ​អ្វី​ឡើយ​ដែល មានន័យថា Djokovic នឹង​មិន​អាច​ប្រកួត​នៅ Grand Slam ណា​បាន​ឡើយ​រហូតដល់ French Open ឆ្នាំក្រោយ​។ ​​ជុំ​បន្ត​នៅ Australian Open នេះ Djokovic នឹង​បន្ត​ជួប​ជាមួយ​កីឡាករ​អូស្ត្រាលី Thanasi Kokkinakis​។ ​​ងាក​មក​ការប្រកួត​មួយគូ​ទៀត អតីត​កីឡាករ​លំដាប់​លេខ ១ ពិភពលោក Andy Murray បាន​បន្ត​កំណត់ត្រា​មិន​ចាញ់​ជុំ​ដំបូង​នៅ Wimbledon របស់ខ្លួន​ក្រោយ​យកឈ្នះ​កីឡាករ​អូស្ត្រាលី James Duckworth​។ ​​ចាប់ផ្តើម​ដំបូង​ត្រូវបាន Duckworth នាំមុខ​សិត​ដំបូង ៦-៤ Andy Murray ក៏បាន​វាយបក​យកឈ្នះ​វិញ​បី​សិត​ផ្ទួនៗ ៦-៣, ៦-២ និង ៦-៤​។ ​ជុំ​បន្ត​កីឡាករ​វ័យ ៣៥ឆ្នាំ​ស្កុ​ត​ឡេ​ន​រូបនេះ​នឹង​ជួប​ជាមួយ​កីឡាករ​អាមេរិក​សេវា​ខ្លាំង John Isner៕

​អត្ថបទ​៖​នាង សុភា​វុ​ធ