ភ្នំពេញ៖ ក្រុមការងារគ្រូពេទ្យ នៃមនី្ទរពេទ្យបង្អែករាជធានីភ្នំពេញ បានពន្លឿនដំណើការចាក់វ៉ាក់សាំងបង្ការជំងឺកូវីដ-១៩ បន្ទាប់ពីសម្តេចតេជោ ហ៊ុន សែន នាយករដ្ឋមន្រី្ត នៃកម្ពុជា បានអំពាវនាវដល់ប្រជាពលរដ្ឋទូទាំងប្រទេស អញ្ជើញមកទទួលការចាក់វ៉ាក់សាំងដូសជំរុញ កាលពីល្ងាចថ្ងៃទី២៧ ខែមិថុនា ឆ្នាំ២០២២ ម្សិលមិញ​នេះ។

បើតាមឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន នាថ្ងៃទី២៨ ខែមិថុនា ឆ្នាំ២០២២នេះថា បើគិតត្រឹមល្ងាចថ្ងៃទី២៧ ខែមិថុនា ចំពោះ​ប្រជាពលរដ្ឋរស់នៅក្នុងរាជធានីភ្នំពេញ ​ដែលមានអាយុចាប់ពី១៨ឆ្នាំឡើង បានចាក់វ៉ាក់​សាំងដូស​ជំរុញទី៣ បានចំនួន១០៤% រីឯដូសជំរុញទី៤​ បានចំនួន៧៦,៧០% ។ចំណែកដូសជំរុញទី៥ ប្រជាពលរដ្ឋ​មកចាក់វ៉ាក់សាំង​មានការ​យឺតយ៉ាវ​ គឺចាក់វ៉ាក់សាំងបានចំនួនតែ ២,៨%ប៉ុណ្ណោះ។ ដូច្នេះសូមអំពាវនាវដល់ប្រជាពលរដ្ឋដែលមានអាយុចាប់ពី១៨ឆ្នាំឡើង អញ្ជើញមកទទួល​ចាក់​វ៉ាក់សាំង​ដូសជំរុញទី៥ ​តាមវេណ​និងកាលកំណត់របស់ក្រសួងសុខាភិបាល។

ជាមួយគ្នានោះដែរ ​ប្រជាពលរដ្ឋ ក្មេង ចាស់ ប្រុស ស្រី បានមកចាក់វ៉ាក់សាំងបង្ការជំងឺកូវីដ-១៩ ដូសជំរុញ ​ពីក្រុមការងារគ្រូពេទ្យនៃមនី្ទរពេទ្យបង្អែករាជធានីភ្នំពេញ ​បានបង្ហាញពីការសប្បាយចិត្ត និង​កក់ក្តៅព្រមទាំង​មាន​សុវតិ្ថភាពនៅពេលទទួលបានវ៉ាក់សាំងគ្រប់ដូស ​និងសូមគោរពអរគុណ​ជូន​ចំពោះសម្តេចតេជោ ​ដែលបាន​អនុញ្ញាត​ឲ្យប្រជាពលរដ្ឋទូទាំងប្រទេស ទទួលបានការ​ចាក់វ៉ាក់សាំង​ការពារជំងឺកូវីដ-១៩ ​ដ៏កាចសាហាវនេះ។

ទន្ទឹមនឹងនោះប្រធានមនី្ទរសុខាភិបាលរាជធានីភ្នំពេញ ​បានឲ្យដឹងទៀតថា ការចាក់វ៉ាក់សាំង​ជូន​ប្រជាពលរដ្ឋ ​គិតត្រឹមថ្ងៃទី២៧​ ខែមិថុនា ឆ្នាំ២០២២៖

-លទ្ធផលចាក់វ៉ាក់សាំងជូនកុមារអាយុចាប់ពី៥ឆ្នាំ ដូសទី២៖ ១០២%, ដូសទី៣៖ ៦.៥%។

-លទ្ធផលចាក់វ៉ាក់សាំងជូនកុមារអាយុចាប់ពី៦ឆ្នាំ ដល់ក្រោម១២ឆ្នាំ ដូសទី២៖ ១១១%, ដូសទី៣៖ ៦៦.៤%។

-លទ្ធផលចាក់វ៉ាក់សាំងជូនកុមារអាយុចាប់ពី១២ឆ្នាំ ដល់ក្រោម១៨ឆ្នាំ ដូសទី២៖ ១១៦%, ដូសទី៣៖ ១០៣.៨%, ដូសទី៤៖ ១០,២%៕ អត្ថបទ រដ្ឋា