ភ្នំពេញ៖ ខណៈដែលកិច្ចចចារប្រាក់អប្បបរមាក្នុងវិស័យឧស្សាហ៍កម្មកាត់ដេរសម្រាប់ឆ្នាំ២០២៣ នឹងចាប់ផ្តើមនាខែកក្កដាតទៅ ក្រុមកម្មការិនីតាមរោងចក្រកាត់ដេរនៅរាជធានីភ្នំពេញ បានបង្ហាញក្តីសង្ឃឹមថា ប្រាក់ខែគោលរបស់ពួកគេ នឹងត្រូវតម្លើងថែមទៀត ទោះបីជាក្នុងចំនួនតិច ឬច្រើនក្តី ដោយសារភាពជឿជាក់លើការដឹកនាំរបស់រាជរដ្ឋាភិបាលកម្ពុជា។

ក្នុងកិច្ចសម្ភាសន៍ផ្ទាល់ រវាងទូរទស្សន៍ព័ត៌មានប៊ីធីវី កម្មការនីរោងចក្រកាត់ដេរ​សំលៀកបំពាក់ ស្ថិតនៅ​សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ​នៅព្រឹកថ្ងៃទី២៨ មិថុនា ឆ្នាំ២០២២នេះ​ បានលើកឡើងថា ​គិតចាប់ពីចូលបំពេញការងារក្នុងវិស័យកាត់ដេរ រហូតមកទល់​បច្ចុប្បន្ននេះ ឃើញថាប្រាក់ឈ្នួលអប្បបរមា ​តែងតែតម្លើងជារៀងរាល់ឆ្នាំ។

ពួកគាត់ បានឱ្យដឹងទៀតថា ការដំឡើងប្រាក់ឈ្នួលនេះ មិនថាមុន ​និងក្នុងវិបត្តិនៃការរាតត្បាត​ជំងឺ​កូវីដ១៩ទេ គឺបានកើនឡើងជាបន្តបន្ទាប់​ ទោះបីចំនួននោះមិនច្រើនយ៉ាងណាក៏ដោយ ក៏នៅ​តែពេញចិត្ត ព្រោះក្នុងវិបត្តិកូវីដ១៩ ធ្វើឲ្យរោងចក្រមួយចំនួនបានបង្ខំចិត្តផ្អាកដំណើរការអាជីវកម្ម និង​ជះឥទ្ធិពលដល់កម្មករបាត់បង់ការងារផងដែរ។

លោក វង្ស រដ្ឋា រដ្ឋបាលរោងចក្រកាត់ដេរ​សំលៀកបំពាក់ ឌូហឺស្ត ខេមបូឌា ស្ថិតនៅភូមិទួលពង្រ សង្កាត់ចោមចៅ​ បានមានប្រសាសន៍ប្រាប់ ប៊ីធីវីថា ការដំឡើង​ប្រាក់ឈ្នួលជូនដល់​កម្មករ​និយោជិត​អាចធ្វើទៅបាន​ អាស្រ័យលើផលិតភាពការងារ​ ក៏ដូចជាផ្អែកលើការបញ្ជាទិញជាដើម ក្នុងករណី​គ្មានការបញ្ជាទិញ ភាគីនិយោជកក៏មិនអាចឆ្លើយតបបានដូចគ្នាដែរ។

លោក បានបន្តថា បច្ចុប្បន្ននេះសម្រាប់ប្រាក់ឈ្នួលដែលកម្មករនិយោជិត​ទទួលបាន គិតទាំង​ប្រាក់​ឈ្នួលអប្បបរមា ប្រាក់ថែមម៉ោងការងារ ​និង​ប្រាក់​ឧបត្ថម្ភ​នានាសរុប ​ចន្លោះពី ៣០០ ដុល្លារ ដល់ ៣៥០ដុល្លារ ក្នុង១ខែ។

យោងតាមសេចក្តីជូនដំណឹង ​ស្តីពី​កាលវិភាគ​នៃ​ការ​ចរចា​ប្រាក់ឈ្នួល​អប្បបរមា​ផ្នែក​វាយនភណ្ឌ កាត់ដេរ ​ផលិត​ស្បែកជើង​ និង​ផលិតផល​ធ្វើដំណើរ​និង​កាបូប ​ក្រសួងការងារ និង​បណ្តុះបណ្តាល​វិជ្ជាជីវៈ បានបញ្ជាក់ថា ​នឹងចាប់ផ្តើមពីខែកក្កដា ឆ្នាំ២០២២ សម្រាប់​ការពិភាក្សា​ជា​លក្ខណៈផ្ទៃ​រវាងភាគី​សហជីព ​និងភាគីនយោជក​ រហូតដល់ខែកញ្ញា ឆ្នាំ២០២២ នឹងបើកកិច្ចប្រជុំក្រុមប្រឹក្សា​ជាតិ​ប្រាក់​ឈ្នួល​អប្បបរមា ​ដើម្បីសម្រេច​ប្រាក់ឈ្នួល​អប្បបរមាក្នុង​វិស័យឧស្សាហកម្មកាត់ដេរ សម្រាប់ឆ្នាំ២០២៣។

សូមជម្រាបថា គិតត្រឹមឆ្នាំ២០២២ ប្រាក់ឈ្នួលអប្បបរមា​ដែល​កម្មករ​និយោជិត​ទទួល​បាន​មានចំនួន ១៩៤ដុល្លារអាម៉េរិក ក្នុង១ខែ។

ប្រាក់ឈ្នួលអប្បបរមា​ គឺជាឈ្នួលការងារ ​ឬឈ្នួលសេវាកំរិតដោយច្បាប់ជាតិ ដែលនិយោជក​ត្រូវ​បើកឱ្យ​កម្មករនិយោជិត។ ប្រាក់ឈ្នួលអប្បបរមាអាចត្រូវបានកំណត់​តាម​កំរិត​ប្រាក់ឈ្នួល ឬប្រាក់​សេវាប្រចាំម៉ោងប្រចាំថ្ងៃ ប្រចាំសប្តាហ៍ ​ឬប្រចាំខែទាបបំផុត ​ហើយនៅកម្ពុជា ប្រាក់ឈ្នួល​អប្បបរមាត្រូវបានគណនា​តាមកំរិតកំណត់នៃប្រាក់ឈ្នួលប្រចាំខែ ​និងត្រូវបានរៀបចំឡើង​សម្រាប់​កម្មករនិយោជិតទាំងអស់នៅក្រោមច្បាប់ស្តីពីការងារ៕អត្ថបទ៖ ឈិត បូរ៉ាវី