ព្រះសីហនុ៖ បើមិនមានការប្រែប្រួលនៅទេ ព្រឹតិ្តការណ៍រៀបចំបុណ្យសមុទ្រជុំទី៣ ឆ្នាំ២០២២នេះ គ្រោងរៀបចំនៅរយៈពេល៣ថ្ងៃចាប់ពីថ្ងៃទី៩ ដល់ថ្ងៃទី១១ ខែធ្នូ នៅខេត្តព្រះសីហនុ ហើយ​ព្រឹត្តិការណ៍នេះ នឹងរៀបចំចំពេលដែលកម្ពុជា នឹងធ្វើជាម្ចាស់ផ្ទះរៀបចំមហា សន្និបាតក្លឹបឆ្នេរ​សមុទ្រស្អាតជាងគេបំផុតលើពិភពលោក ដែលមានបណ្តាប្រទេសចូលរួមជាង ៤០ប្រទេស។

ថ្លែងនៅក្នុងកិច្ចប្រជុំត្រៀមរៀបចំពិធីបុណ្យសមុទ្រលើកទី៩ ជុំទី៣ នៅល្ងាចថ្ងៃទី២៧ ខែមិថុនា នៅទីស្តីក្រសួង ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ​បានថ្លែងថា ព្រឹត្តិការណ៍រៀបចំ​បុណ្យ​សមុទ្រឆ្នាំ២០២២នេះ ​នឹងរៀបចំមានភាព​អធិកអធម​ធំជាង​ឆ្នាំកន្លងមក ខណៈព្រឹត្តិការណ៍​បានអាកខានរៀបចំចំនួន២ឆ្នាំ ដោយសារការរាតត្បាតកូវីដ១៩ ​ហើយណាមួយ ការរៀបចំ​ព្រឹត្តិការណ៍​បុណ្យឆ្នាំនេះ ​គឺធ្វើឡើងចំពេលកម្ពុជា នឹងធ្វើម្ចាស់ផ្ទះ​រៀបចំ​មហាសន្និបាតក្លឹប​ឆ្នេរសមុទ្រ​ដែលស្អាត​ បំផុតលើពិភពលោក ​ចាប់ពីថ្ងៃទី៩ ដល់ថ្ងៃទី១៤ ខែធ្នូ ឆ្នាំ២០២២ នៅលើ​ទឹកដី​ខេត្តព្រះសីហនុ ។

នៅក្នុងព្រឹត្តិការណ៍សមុទ្រនេះ​ ក៏ជាកញ្ចប់ទេសចរណ៍មួយដ៏សំខាន់ ដែលនឹងមានភ្ញៀវទេសចរ​អន្តរជាតិ​ជាច្រើន​ប្រទេសទៀត​ផងដែរ នឹងទិញ​កញ្ចប់ទេសចរណ៍​មក​ទស្សនា​កម្ពុជា​ក្នុងរយៈពេល​នេះផងដែរ​ ហើយឯកឧត្តម​ ថោង ខុន ក៏បានអំពាវនាវអោយក្រុមហ៊ុនការីទេសទេសចរណ៍នានា សូមលក់កញ្ចប់ទេសចរណ៍នេះនៅក្នុងតំលៃសមរម្យ ដើម្បីជាការប្រកួតប្រជែង​សម្រាប់តម្លៃ​ទីផ្សារ​សម្រាប់​ទាក់ទាញ​ទាំងភ្ញៀវជាតិ ​និងភ្ញៀវអន្តរជាតិ។

ឯកឧត្តម ថោង ខុន បន្តថា ការៀបចំបុណ្យសមុទ្រគឺគោលបំណងសំខាន់ ​លើកកម្ពស់ការយល់ដឹង​ប្រជាជន​កម្ពុជាទាំងមូល​ ជាពិសេសសម្រាប់ប្រជាជនរស់នៅតាមតំបន់ឆ្នេរសមុទ្រ ដើម្បីអោយគេ​ចូល​រួម​ថែរក្សាទីក្រុងឆ្នេរ ថែរក្សាឆ្នេរសមុទ្រ ​ឆ្នេរខ្សាច់ ថែរក្សាកោះ និងថែរក្សាទឹក​សមុទ្រអោយ​នៅតែល្អស្អាតជាដើម។

សូមបញ្ជាក់ថា នៅក្នុងកិច្ចប្រជុំត្រៀមរៀបចំពិធីបុណ្យសមុទ្រលើកទី៩ ជុំទី៣ ​នៅល្ងាចថ្ងៃទី២៧ ខែមិថុនានេះ គឺបានរៀបចំដើម្បីប្រកាសសមាសភាពគណកម្មការអន្តរក្រសួង​រៀបចំព្រឹត្តិការណ៍​បុណ្យ​សមុទ្រឆ្នាំ២០២២ នៅផ្នែកនីមួយៗដោយធ្វើយ៉ាងណាអោយព្រឹត្តិការណ៍​សមុទ្រនេះដំណើរ​ការដោយមានភាពរលូនទាក់ទាញ ​និងជោគជ័យ៕អត្ថបទ ស៊ុម សុខជា