ភ្នំពេញ៖ មន្ទីរពេទ្យមិត្ដភាពខ្មែរ-សូវៀត នៃក្រសួងសុខាភិបាល និងសមាគមចង្វាក់បេះដូង សាធារណរដ្ឋកូរ៉េ បានចុះអនុស្សរណៈយោគយល់គ្នា លើការបណ្តុះបណ្តាលធនធានមនុស្ស លើវិស័យសុខាភិបាល ផ្នែកជំងឺបេះដូង និងផ្តល់សម្ភារបរិក្ខារវេជ្ជសាស្រ្ត។

ពិធីនេះប្រព្រឹត្តទៅនៅថ្ងៃទី២៧ ខែមិថុនា ឆ្នាំ២០២២ ម្សិលមិញដោយមានការចូលរួមពី លោកសាស្ត្រាចារ្យ ចាន់ វិចិត្រ នាយករងមន្ទីរពេទ្យមិត្ដភាពខ្មែរ-សូវៀត នៃក្រសួងសុខាភិបាល ព្រះរាជាណាចក្រកម្ពុជា និងលោកសាស្ត្រាចារ្យ ផាក ហ៊ីណាំ ឯកទេសជំងឺចង្វាក់បេះដូង ប្រធាន​មជ្ឈមណ្ឌល​អន្តរាគមន៍ជំងឺបេះដូង ​និងសរសៃរឈាម​ នៃមន្ទីរពេទ្យសេវេរ៉ន់ សាធារណរដ្ឋកូរ៉េ និង​លោកសាស្ត្រាចារ្យ ជន់ វ៉ាង ឯកទេសជំងឺចង្វាក់បេះដូង ប្រធានផ្នែកជំងឺចង្វាក់បេះដូង នៃ​មជ្ឈមណ្ឌល​សុខភាពរីវើ សហរដ្ឋអាមេរិក រួមទាំងក្រុមគ្រូពេទ្យ សហការលើការបណ្តុះបណ្តាល​ធនធាន​មនុស្ស ​លើវិស័យសុខាភិបាល ផ្នែកជំងឺបេះដូង ​និងផ្តល់សម្ភារបរិក្ខារវេជ្ជសាស្រ្ត ជូន​មនី្ទរ​ពេទ្យមិត្តភាពខ្មែរ-សូវៀត។

លោកសាស្ត្រាចារ្យ ផាក ហ៊ីណាំ បានឲ្យដឹងថា ការចុះអនុស្សរណៈនេះ ដើម្បីបណ្ដុះបណ្ដាល​ចំណេះ​ដឹង​ផ្នែកជំងឺបេះដូង​ ដល់ក្រុមគ្រូពេទ្យកម្ពុជា។ កន្លងមក​យើងក៏បានបណ្ដុះបណ្ដាលចំណេះ​ជំទាញនេះ​ ដល់គ្រូពេទ្យនៃមន្ទីពេទ្យមិត្ដភាពខ្មែរ-សូវៀត​ រួមជាមួយនឹងផ្ដល់ឧបករណ៍ផងដែរ។

ជាមួយគ្នានោះដែរលោកសាស្ដ្រាចារ្យ ចាន់ វិចិត្រ បានថ្លែងថា​ កន្លងមកនិស្សិតកម្ពុជាយើង ដែល​ជា​ក្រុមគ្រូពេទ្យរបស់មន្ទីរពេទ្យមិត្ដភាពខ្មែរ-សូវៀត ​បានទៅសិក្សាដោយផ្ទាល់នៅក្រៅប្រទេស ជាមួយ​សមាគមចង្វាក់បេះដូងរបស់សាធារណរដ្ឋកូរ៉េ។ ​ដូច្នេះដើម្បីអភិវឌ្ឍឯកទេសជំងឺបេះដូង នៅកម្ពុជា​នេះ ដល់កម្រិតស្ដង់ដារ ​ជូនប្រជាពលរដ្ឋទើបយើងបានចុះអនុស្សារណៈនេះជាមួយគ្នា។

បើតាមលោកវេជ្ជបណ្ឌិតឯកទេស លឹម ស៊ីវុតថា ប្រធានផ្នែកព្យាបាលជំងឺបេះដូង និងសរសៃឈាម​នៃមន្ទីរមិត្ដភាពខ្មែរ-សូវៀត ឲ្យដឹងថា ជំងឺបេះដូង​ គឺជាជំងឺរុំារៃ តែក៏ជាជំងឺមួយដែលធ្វើឱ្យ​គ្រោះថ្នាក់​ភ្លាមៗ ដល់ជីវិតដោយមិនដឹងមុន។​ ដូច្នេះដើម្បីការពារ ប្រសើរជាងព្យាបាល​ គឺត្រូវមាន​របប​អាហារ​ត្រឹមត្រូវ​ កុំឱ្យធាត់លើសទម្ងន់ពេក ​ហាត់ប្រាណឱ្យបានទៀងទាត់ ​និង​ទៅ​ពិនិត្យសុខភាព​ជា​ប្រចាំផងដែរ៕ អត្ថបទ រដ្ឋា