​បាល់ទាត់៖ លោក Ryu Hirose គ្រូបង្វឹក​ថ្មី​ក្រុម​ជម្រើស​ជាតិ​កម្ពុជា​បាន​បញ្ជាក់​ថា លោក​នឹង​លះបង់​ខ្លួនប្រាណ និង​បទពិសោធន៍​ទាំងអស់ដើម្បី​ដឹកនាំ និង​អភិវឌ្ឍន៍​ក្រុម​គោព្រៃ​កម្ពុជា ឆ្ពោះ​ទៅ​រក​ភាព​ខ្លាំង ឆ្លើយតប​ទៅ​នឹង​ការ​ផ្ដល់​សេចក្ដីទុកចិត្ត​ របស់​ស​ហ​ព័ន្ធ​កីឡាបាល់ទាត់​កម្ពុជា និង​អ្នកចាត់ការ​ទូទៅ​ក្រុម​ជម្រើស​ជាតិ​កម្ពុជា​លោក Keisuke Honda ក៏ដូចជា​អ្នកគាំទ្រ​កម្ពុជា​ផង​ដែរ។​

​អតីត​គ្រូ​បង្វឹក​ក្រុម​យុវជន​ក្លិប​យក្ស​ចិន Guangzhou បាន​លើក​ឡើង​ថា លោក​ពិតជា​សប្បាយចិត្ត ដែល​បាន​ក្លាយ​ជា​គ្រូ​បង្វឹក​ក្រុម​ជម្រើស​ជាតិ​កម្ពុជា គ្រា​ដែល​ក្នុងនាម​គ្រូ​បង្វឹក​លោក នឹង​ទទួល​ស​ខុសត្រូវ​លើ​គ្រប់​បញ្ហាដែល​កើតមានឡើង បើ​ទោះបី​មាន​ភាព​លំបាកស្មុគស្មាញ​យ៉ាងណាក៏ដោយ។ ​គ្រូ​បង្វឹក​សញ្ជាតិ​ជប៉ុន​ដដែល​សង្កត់​ធ្ងន់​ថា ចាប់​ពី​ពេល​នេះ​តទៅ លោក​នឹង​លះបង់​ខ្លួនប្រាណ ឆន្ទៈ​របស់​ខ្លួន និង​យក​បទពិសោធន៍ដែល​បា​នពី​អាជីព​ ជា​គ្រូ​បង្វឹក​បាល់ទាត់​របស់​ខ្លួន​ទាំង​ប៉ុន្មាន ដើម្បី​ជួយ​បណ្ដុះបណ្ដាល​ឲ្យ​កីឡាករ​មានការ​អភិវឌ្ឍ រីក​ចម្រើន​ទៅមុខ និង​កសាង​ក្រុម​មួយដែល​ខ្លាំង​សម្រាប់​ប្រកួតប្រជែង ​ជាមួយ​ក្រុម​នៅ​ក្នុង​តំបន់​អាស៊ី និង​ពិភពលោកផង​ដែរ។​

​សូម​រំ​ឭកថា លោក Ryu Hirose ត្រូវ​បាន​តែង​តាំង​ជា​គ្រូ​បង្វឹក​ថ្មី​ក្រុម​ជម្រើស​ជាតិ​កម្ពុជា ជំនួស​កៅអី​លោក Felix G.Dalmas ​បន្ទាប់ពី​បុរស​សញ្ជាតិ​អា​ហ្ស​ង់​ទីន​នេះ មិន​អាច​បន្ដ​ដំណើរ​ជា​មួយ​ក្រុម​គោព្រៃ​កម្ពុជា​ទៀត​បាន ក្រោម​ហេតុផល​ផ្ទាល់ខ្លួន។ ដូច្នេះ​គ្រូ​បង្វឹក​វ័យ ៦៥​ឆ្នាំ​រូប​នេះ​នឹងត្រូវ​ដឹកនាំ​ក្រុម​គោព្រៃ​កម្ពុជា រហូតដល់​ព្រឹត្តិការណ៍​ស៊ី​ហ្គេមឆ្នាំ​២០២៣ ជាមួយ​អ្នកចាត់ការ​ទូទៅ​លោក Keisuke Honda។ ​សម្រាប់​ភារកិច្ច​ចំពោះ​មុខ​ពេលនេះ លោក Ryu Hirose កំពុង​សម្លឹង​កីឡាករ ជាក់ស្ដែង​ក្នុង​ការ​ប្រកួត​លី​គ​កំពូល​កម្ពុជា​ កាលពី​ចុង​សប្ដាហ៍​កន្លងទៅ លោក​ក៏បាន​អញ្ជើញ​ទស្សនា​ការប្រកួត​មួយ​ចំនួន​ផង​ដែរ ដើម្បី​ជ្រើសរើស​កីឡាករ​ប្រមូលផ្ដុំ​ហ្វឹកហាត់ ដើម្បី​ត្រៀម​ការប្រកួត​ជម្រុះ​ជុំ​ទី​២ នៃ​ពានរង្វាន់​បាល់ទាត់​ពិភពលោក​ឆ្នាំ​២០២២ នៅ​សល់ ៣​ប្រកួត​ក្នុង​ពូ​ល C នា​ខែ​មិថុនា​ខាងមុខ​នៅ​ប្រទេស​បា​រ៉ែ​ន៕

​អត្ថបទ៖ លី ឈុន​ឡា