សៀមរាប ៖ សត្វក្របីចំនួន២៧ក្បាលរបស់ប្រជាកសិករជាង២០គ្រួសារ នៅឃុំកែវពណ៌ស្រុកពួក ខេត្ដសៀមរាប បានងាប់ជាបន្ដបន្ទាប់ និងជាច្រើនក្បាលទៀតកំពុងកើតជំងឺ ដែលអ្នកជំនាញអះអាងថា ដោយសារកើតជំងឹសាទឹក ខណៈដែលម្ចាស់បានលែងចោលនៅក្នុងព្រៃរនាមក្នុងបឹងទន្លេសាប ។

លោក ព្រុំ វិច ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្ដសៀមរាប មានប្រសាសន៍នៅល្ងាចថ្ងៃទី២៨ខែមិថុនាឆ្នាំ២០២២នេះថា ចាប់ពីដើមខែមិថុនា ដល់ថ្ងៃទី២៨ខែមិថុនានេះ ក្រុមការងារពេទ្យសត្វ បានរកឃើញសត្វក្របីចំនួន២៧ក្បាលបានងាប់ជាបន្ដបន្ទាប់ និងខ្លះទៀតមានជំងឺ ដោយសារកើតជំងឺសាទឹក ខណៈដែលម្ចាស់របស់វាលែងចោលតាមទម្លាប់នៅតាមវាលព្រៃរនាមក្នុងបឹងទន្លេសាប។សត្វក្របីទាំងនោះ ជារបស់ប្រជាពលរដ្ឋចំនួន២២គ្រួសារ ស្មើរនឹង៤ភូមិស្ថិតនៅឃុំកែវពណ៌ ស្រុកពួក ខេត្ដសៀមរាប ជាប់ខាងជើងបឹងទន្លេសាប ។លោកបានបន្ដថា ក្រុមការងារពេទ្យសត្វបាន ខិតខំធ្វើការចាក់ថ្នាំដល់សត្វក្របីដែលកំពុងកើតជំងឺ ហើយការផ្ដល់វ៉ាក់សាំងដល់សត្វក្របីមានការលំបាកខ្លះៗក្នុងការស្វែងរកស្វក្របី ព្រោះប្រជាកសិករ បានលែងសត្វក្របីចោលនៅក្នុងព្រៃរនាមដែលមានចំង៉ាយឆ្ងាយ ពិបាកធ្វើដំណើរ ប៉ុន្ដែទោះជាយ៉ាងណា ក្រុមមន្ដ្រីពេទ្យសត្វ បានបញ្ជូនអ្នកជំនាញចាក់វ៉ាក់សាំង និងទៅព្យាបាលសត្វក្របីជាបន្ដបន្ទាប់ ដើម្បីជួយសង្រ្គោះសត្វក្របីនោះផងដែរ។លោកបានបន្ថែមថា ជំងឹសាទឹដែលកើតលើសត្វក្របីនេះ គឺមានវ៉ាក់សាំងការពារ ប៉ុន្ដែកន្លងមកប្រជាកសិករដែលជាម្ចាស់ក្របី មិនបានយកក្របីទៅចាក់វ៉ាក់សាំងការពារនោះទេ នៅពេលក្រុមជំនាញមានកម្មវិធីចាក់វ៉ាក់សាំងដល់សត្វនៅតាមភូមិម្ដងៗដោយសារពួកគាត់បានលែងក្របីចោលនៅក្នុងព្រៃរនាមបឹងទន្លេសាប ។

បើតាមលោក ស៊ីន ចាន់ថុល អភិបាលស្រុកពួក ខេត្ដសៀមរាប មានប្រសាសន៍ថា តាមរបាយការណ៍នៅឃុំកែវពណ៌ ស្រុកពួក ដោយការិយាល័យកសិកម្ម ធនធានធម្មជាតិ និងបរិស្ថានស្រុកបានផ្ដលព័ត៌មាន ដែលមានក្របីឈឺ និងស្លាប់ ភាគច្រើនលែងចោលនៅព្រៃរនាម ហើយមិនបានចាក់វ៉ាក់សាំងការពារពីមុន។មន្ដ្រីជំនាញបានធ្វើការចុះស្រាវជ្រាវរកម្ចាស់សត្វក្របីដែលបានស្លាប់ជាក់ស្តែង ដែលបច្ចុប្បន្ននេះ ម្ចាស់ក្របីបានយកក្របីទៅប្រលែងចោលនៅក្នុងព្រៃរនាម រយៈពេលយូរថ្ងៃ ទើបពួកគាត់ទៅរកម្តង។ជាមួយគ្នានោះ ក្រុមការងារបានចុះណែនាំពីបច្ចេកទេសក្នុងការព្យាបាល និងសហការជាមួយភ្នាក់ងារសុខភាពសត្វភូមិចុះព្យាបាលសត្វ និងផ្តល់ថ្នាំព្យាបាលដល់ភ្នាក់ងារសុខភាពសត្វភូមិផងដែរ ៕