​បាល់ទាត់៖ បន្ទាប់ពី​ធ្វើតេស្ដ​ជាច្រើន​ដំណាក់កាល និង​ចម្រាញ់​បាន​កីឡាករ ២៣​នាក់​ចុងក្រោយកាលពី​សប្ដាហ៍​មុន ក្រុមបាល់ទាត់​ជម្រើសជាតិ​យុវជន​អាយុ​ក្រោម ១៩​ឆ្នាំ​កម្ពុជាបានចាប់ផ្ដើម​ហ្វឹកហាត់​ជុំគ្នា​ជា​ផ្លូវការកាលពី​ល្ងាច​ថ្ងៃទី​២៨ ខែមិថុនានៅ​កីឡដ្ឋាន​ Smart RSN ​របស់​ភ្នំពេញ​ក្រោ​ន ដើម្បី​ត្រៀម​ការប្រកួត​ជើងឯក​យុវជន​អាស៊ីអាគ្នេយ៍​អាយុ​ក្រោម ១៩​ឆ្នាំ​ AFF U19 Championship 2022 ​នៅ​ប្រទេស​ឥណ្ឌូនេស៊ីចាប់ពី​ថ្ងៃទី​០២ ដល់​ថ្ងៃទី​១៥ ខែកក្កដា​ខាងមុខ ។​

​ក្រោម​ការដឹកនាំ​របស់​គ្រូបង្វឹក​ជនជាតិ​ជប៉ុនលោក​ Kuji Gyotoku ​សម្រាប់​ការប្រមូលផ្ដុំ​ហ្វឹកហាត់​ផ្លូវការ​នេះគឺមាន​រយៈពេល ២​ថ្ងៃ​ប៉ុណ្ណោះ មុន​ក្រុម​គោព្រៃ​ជំទង់​កម្ពុជាការចាកចេញ​ពី​មាតុភូមិ ដែល​ពួកគេ​នឹងធ្វើ​ដំណើរ​ទៅ​ប្រទេស​ឥណ្ឌូនេស៊ីនៅ​ព្រឹក​ថ្ងៃទី​៣០ ខែមិថុនា​ស្អែក​នេះ។ ក្រុមយុវជន​ U19 ​កម្ពុជាស្ថិតក្នុង​ពូ​ល​ B ​ជាមួយ​ក្រុម​ U19 ​ម៉ាឡេស៊ី ទី​ម័​រ​ខាងកើត សិង្ហ​បុរី និង​ឡាវ។​ ​លោក​ Kuji Gyotoku ​ធ្លាប់បាន​គូសបញ្ជាក់ថា សម្រាប់​ស្ថានភាព​កូនក្រុម​ពេលនេះគឺ​មិន​ដូច​ក្រុមយុវជន​ U19 ​ដែល​បាន​ទៅ​ប្រកួត​នៅ​វៀតណាម​នោះទេ ដ្បិត​ពេលនោះក្រុម​ខ្លួន​មាន​ពេល​ច្រើន​ក្នុង​ការរៀបចំ​ក្រុម តែ​ពេលនេះដោយសារ​បញ្ហា​កូ​វីដ​-១៩ និង​ការប្រកួត​លី​គ​មាន​ភាព​មមាញឹក ជាហេតុ​នាំ​ឲ្យ​លោក​មិនមាន​ពេល​គ្រប់គ្រាន់​ក្នុងការ​រៀបចំ​ក្រុម និង​ការហ្វឹកហាត់​ជុំគ្នា។​ ​អ្វីដែល​គួរ​ឲ្យ​កត់សម្គាល់​លោក​បាន​សង្កត់ធ្ងន់ថា ដោយ​សារ​កីឡាករ​មួយចំនួនដែលមាន​អាយុ​អាច​លេង​ពាន​ AFF U19 Championship 2022 ​នេះបាន​ទៅតាម​ក្លិប​របស់​ពួកគេគឺជា​កីឡាករ​សំខាន់ ដូច្នេះ​លោក​បានសម្រេច​មិន​កោះ​ហៅ​ពួកគេ ដើម្បី​ឲ្យ​ពួកគេ​មានឱកាស​ជួយ​ក្លិប​របស់ខ្លួន ដែលមាន​ការប្រកួតប្រជែង​កម្រិត​ខ្ពស់។ តាមរយៈ​នេះ លោក​ក៏​សម្រេចចិត្ត​ផ្ដល់ឱកាស​ដល់​កីឡាករ​ដែលមាន​សមត្ថ​ភាព​ផ្សេងទៀត។ យ៉ាងណាក្ដី​លោក​ថា នឹង​ព្យាយាម​ឲ្យ​អស់ពី​លទ្ធភាព​ក្នុង​បេសកកម្ម​នាពេល​ដ៏​ខ្លី​ខាងមុខ។​

​គួរ​ដឹងថា បន្ទាប់ពី​ធ្វើដំណើរ​ប្រទេស​ឥណ្ឌូនេស៊ី ក្រុម​ជម្រើសជាតិ​ U19 ​កម្ពុជាមាន​ពេល​តែ ៣​ថ្ងៃ​ប៉ុណ្ណោះដើម្បី​រៀបចំ និង​ត្រៀម​ការប្រកួត​ដំបូង​របស់ខ្លួន ដែល​កម្ពុជានឹងត្រូវ​ជួប​ក្រុម​ U19 ​សិង្ហ​បុរី​មុនគេនា​ថ្ងៃទី​០៣ ខែកក្កដា មុន​បន្ដ​ជួប​ម៉ាឡេស៊ីនា​ថ្ងៃទី​០៥ ខែកក្កដា​, ជួប​ឡាវនា​ថ្ងៃទី​០៧ ខែកក្កដា និង​ចុងក្រោយ​ជួប​ទី​ម័​រ​ខាងកើតនា​ថ្ងៃទី​១១ ខែកក្កដា ឆ្នាំ​២០២២ នេះ។​ ​ដោយឡែក​បេក្ខភាព​ប្រកួតប្រជែងនៃ​ពូ​ល​ A ​វិញគឺមាន​ម្ចាស់ផ្ទះ​ឥណ្ឌូនេស៊ី​, ​ថៃ​, ​មី​យ៉ាន់​ម៉ា​, ​វៀតណាម ប្រ៊ុយណេ និង​ហ្វីលីពីន​។ ក្រោយ​បញ្ចប់​ការប្រកួត ក្រុម​ដែល​ឈរ​លេខ​១ និង​លេខ​២ នៃ​ពូ​ល​នីមួយៗនឹង​ទទួលបាន​កៅអី​វគ្គ​ពាក់កណ្ដាល​ផ្ដាច់ព្រ័ត្រ នៃ​ព្រឹត្តិការណ៍​បាល់ទាត់​យុវជន​ប្រចាំ​តំបន់​អាស៊ាន​នេះ៕

​អត្ថបទ៖ លី ឈុន​ឡា