​មី​យ៉ាន់​ម៉ា៖ កំពុង​ស្ថិត​ក្រោម​ពន្លឺ​ភ្លើង​ចាំង​ចិញ្ចែងចិញ្ចាច និង​ភាព​អស្ចារ្យ​នៃ​រាត្រី​គ្រង​តំណែង របស់​កម្មវិធី​ប្រឡង​បវរកញ្ញា​អន្តរជាតិ​ Miss Grand International ឆ្នាំ​២០២០ បេ​ក្ខ​នារី​សហ​ភាព​មី​យ៉ាន់​ម៉ា កញ្ញា Han Lay បាន​និយាយ​អំពី​ស្ថានភាព​កាន់តែ​អាក្រក់ ​នៅ​ក្នុង​ប្រទេស​របស់​នាង​។​

​បេក្ខនារី​បវរកញ្ញា​មកពី​សហភាព​មី​យ៉ាន់​ម៉ា ​បាន​ប្រើប្រាស់​ពេលវេលា​ដ៏​ខ្លី​របស់​នាង ​នៅ​ក្នុង​រាត្រី​ដ៏​រំជើបរំជួល​កាលពី​ថ្ងៃ​សៅរ៍​ ដើម្បី​អំពាវនាវ​រក​ជំនួយ​អន្តរជាតិ​សម្រាប់​ប្រទេស​របស់​នាង​ ដែល​ជា​ថ្ងៃ​ដ៏​អាក្រក់​បំផុត​នៃ​ការ​សម្លាប់​ដ៏​បង្ហូរ​ឈាម ​ចាប់​តាំង​ពី​យោធា​បាន​ដណ្ដើម​អំណាច​កាលពី​ ២​ខែ​មុន​។​ ​ខណៈ​ដែល​នាង​ដើរ​ឆ្ពោះ​ទៅ​មុខ​ប្រកបដោយ​ទំនុក​ចិត្ត មិន​ខ្វល់​ថា​នឹង​មាន​អ្វី​កើត​ឡើងលើ​រូប​នាងឡើយ​ នៅ​ពេល​និស្សិត​មកពី​សកល​វិទ្យាល័យ​យ៉ាង​ហ្គោ​ន ​បង្ហាញខ្លួន​លើ​ឆាក​នៅ​ទីក្រុង​បាងកក​នៅ​វគ្គ​ផ្ដាច់ព្រ័ត្រ​នៃ​ព្រឹត្តិការណ៍ Miss Grand International​។ ​ដោយ​និយាយ​បណ្ដើរ​ ព្យាយាម​ទប់ទឹក​ភ្នែក​បណ្ដើរ​ នាង​បាន​អង្វរ​រក​ជំនួយ​អន្តរជាតិ ​ដើម្បី​ទាញ​យក​លទ្ធិប្រជាធិបតេយ្យ​ត្រឡប់មកវិញ ​នៅ​ក្នុង​សភាព​មី​យ៉ាន់​ម៉ា​។​

​បេក្ខនារី​បវរកញ្ញា​រូប​នេះ​បាន​និយាយ​ថា ប្រសិនបើ​ស្ថានភាព​កំពុង​កើតឡើង ​នៅ​កន្លែង​ណា​មួយ​មនុស្ស​នៅ​ជុំវិញ​ពិភពលោក ពិតជា​ព្យាយាម​រក​ដំណោះស្រាយ​ និង​ជួយ​ពួកគេ​មិន​ខាន។ ការប្រកួត​សម្រស់​បាន​ធ្វើ​ឡើង​នៅ​ចុង​បញ្ចប់​ នៃ​ថ្ងៃមួយ​នៅ​សហភាព​មី​យ៉ាន់​ម៉ា​ ដែល​ក្នុង​នោះ​យ៉ាងហោចណាស់​មនុស្ស​ចំនួន ១១៤​នាក់​ត្រូវ​បាន​សម្លាប់​ នេះ​បើ​យោង​តាម​ការផ្សាយ​របស់​សារ​ព័ត៌មាន ​Online Myanmar Now ដែល​បាន​ធ្វើ​ឲ្យ​វា​ក្លាយ​ជា​ថ្ងៃ​នៃ​ការ​បង្ក្រាប​ដ៏​សា​ហាវ​បំផុត ​បន្ទាប់ពី​រដ្ឋ​ប្រហា​រ​ថ្ងៃ​ទី១ ខែ​កុម្ភៈ​របស់​កងទ័ព​ ដែល​បាន​បណ្ដេញ​រដ្ឋាភិបាល​ជាប់ឆ្នោត​របស់​លោក​ស្រី​ Aung San Suu Kyi ​ចេញពី​តំណែង​៕

អត្ថបទ៖ សុខមាន