ភ្នំពេញ៖ សមត្ថកិច្ចជំនាញក្នុងមួយរយៈពេលចុងក្រោយនេះ បានចាត់វិធានការចុះបង្រ្កាបតាមទីតាំង ធ្វើអាជីវកម្មលក់ បារីអេឡិចត្រូនិចជាបន្តបន្ទាប់។ ការចុះបង្ក្រាបនេះ ពុំមានការដាក់ទោសទ័ណ្ឌនោះទេ ព្រោះកម្ពុជាពុំមានច្បាប់ដាក់ទោសពាក់ព័ន្ធនឹងបញ្ហានេះឡើយ។ នេះជាការបញ្ជាក់របស់មន្រ្តីជំនាញ នៃមន្ទីរប្រឆាំងគ្រឿងញៀន។

បារីអេឡិចត្រូនិចបានក្លាយជាប្រធានបទមានការចាប់អារម្មណ៍ច្រើន ក្នុងមួយរយៈពេលចុងក្រោយនេះ។ ភាពចាប់អារម្មណ៍ច្រើន ដោយសារបារីអេឡិចត្រូនិចនេះ មានការ​ដាក់លក់ និងមានការប្រើប្រាស់ច្រើនក្នុងចំណាមយុវជន ដែលស្ថិតក្នុងវ័យសិក្សា។ ជាវិធានការបន្ទាន់ មន្រ្តីជំនាញនៃមន្ទីរប្រឆាំងគ្រឿងញៀន ក៏បានចុះបង្រ្កាប រឹបអូសតាមទីតាំងធ្វើអាជីវកម្មជាបន្តបន្ទាប់។

ក្នុងរយៈពេល៣ថ្ងៃ ចាប់ពីថ្ងៃទី ២៣ដល់ថ្ងៃទី ២៥ ខែមិថុនា មន្ទីរប្រឆាំងគ្រឿងញៀន និង ស្នងការដ្ឋាន​នគរបាលរាជធានីភ្នំពេញ បានចុះបង្រ្កាបទីតាំងមួយចំនួន ​ដោយ​អញ្ជើញមនុស្សចំនួន ៣១នាក់(ស្រី៤) មកធ្វើការអប់រំ និងធ្វើកិច្ចសន្យា និងចាប់យកវត្ថុតាងមួយ​ចំនួន​ដូចជា បារីអេឡិចត្រូនិច Yooz និង Vape ចំនួន ៣៤០៩ ដើម បារីអេឡិចត្រូនិច Sisa ចំនួន ០៣ ដើម ទឹកថ្នាំ​បារីអេឡិចត្រូនិច Yooz និង Vape ចំនួន ២៧៨៥ ដប និង៩២២ ប្រអប់ ឧបករណ៍សម្រាប់ជក់​បារីអេឡិចត្រូនិច Yooz និង Vape ចំនួន ១២៦៦ ឈុត និងខ្សែសាកបារីអេឡិចត្រូនិចចំនួន ០៦ ប្រអប់។

ពាក់ព័ន្ធនឹងការចុះបង្ក្រាបនេះ លោកឧត្តមសេនីយ៍ទោ អ៊ិន សុង នាយករងមន្ទីរ ប្រឆាំងគ្រឿងញៀន នៃ​អគ្គស្នងការដ្ឋាននគរបាលជាតិ បញ្ជាក់ដែរថា ម្ចាស់អាជីវកម្ម និងអ្នកទិញប្រើប្រាស់ គឺទទួល​ការ​អប់រំ និងធ្វើកិច្ចសន្យាបញ្ឈប់ការធ្វើសកម្មភាព។

ក្រោយធ្វើកិច្ចសន្យារួចរាល់ គឺអនុញ្ញាតឱ្យម្ចាស់អាជីវកម្ម និងអ្នកប្រើប្រាស់ត្រឡប់ទៅផ្ទះវិញ ព្រោះកម្ពុជាពុំមានចែងក្នុងច្បាប់ ​និងទោស​បញ្ញត្តិ ក្នុងការដាក់​ទោស ទណ្ឌ​នោះទេ។

មន្ទីរប្រឆាំងគ្រឿងញៀនក៏សំណូមពរទៅប្រជាពលរដ្ឋផ្ដល់ដំណឹងជាសម្ងាត់ ​តាមរយៈលេខទូរស័ព្ទ 011248888 (Mobitel), 015222226 (Smart), 066661661(Metfone) ឬ ប្រអប់សំបុត្រអេឡិចត្រូនិច (E-Box) Page: Anti-drug Department។

កន្លងទៅអាជ្ញាធរជាតិប្រយុទ្ធប្រឆាំងគ្រឿងញៀន បានចេញសេចក្តីណែនាំ លេខ ០០១/១៤ ស.ណ.ន ចុះថ្ងៃទី២៥ ខែកុម្ភៈ ឆ្នាំ២០១៤ ស្តីពីការចាត់វិធានការ បង្ការ បញ្ឈប់​ការប្រើប្រាស់ ការធ្វើអាជីកម្ម ​និងការនាំចូលផលិតស៊ីហ្សា (SISHA) ​និងបារីអេឡិចត្រូនិក (E-Cigarette) នៅព្រះរាជាណាចក្រកម្ពុជា៕ អត្ថបទ៖ គឹមហុក