ភ្នំពេញ៖ កាលពីថ្ងៃទី២៨ ខែមិថុនា ម្សិលមិញនេះ កាកបាទក្រហមកម្ពុជា សហការជាមួយសាខាខេត្តកំពង់ធំ និងមន្ទីរឣប់រំ យុវជន និងកីឡាខេត្ត បានរៀបចំពិធីបំពាក់កន្សែង ជូនយុវជនកាកបាទក្រហមកម្ពុជា ៥៦នាក់ និងវគ្គផ្សព្វផ្សាយស្តីពីការចូលរួមលើកកម្ពស់ការដាំបន្លែសុវត្ថិភាព នៅក្នុងសហគមន៍ និងគ្រឹះស្ថានសិក្សា រួមទាំងការប្រមូលផលបន្លែ ដែលដាំដោយយុវជន កាកបាទក្រហមកម្ពុជា នៃវិទ្យាស្ថានបច្ចេកវិទ្យាកំពង់ឈើទាល ស្ថិតក្នុងស្រុកប្រាសាសំបូរ ខេត្តកំពង់ធំ។

លោក តាន់ ប៊ុនហុង សមាជិកគណៈកម្មាធិការសាខា មានប្រសាសន៍ថា យុវជនកាកបាទ​ក្រហម​កម្ពុជា ​គឺជាកម្លាំងមួយមិនអាចខ្វះបានក្នុងសមាគមជាតិ ​និងនៅក្នុងចលនាកាកបាទក្រហម អឌ្ឍចន្ទ​ក្រហមអន្តរជាតិ។ ដែលក្មួយៗបានលះបង់កម្លាំងកាយចិត្ត ថវិកា ចែករំលែកពេលវេលាពីការ​សិក្សា​ប្រចាំថ្ងៃ ​ចូលរួម​ក្នុងសកម្មភាពយុវជនកាកបាទក្រហម។ អ្វីដែលពិសេសនោះ ​គឺថ្មីៗនេះ​មានយុវជន កាកបាទ​ក្រហមកម្ពុជា ​មួយក្រុមបានចូលរួមចងក្រងផលិត​ជាវីដេអូខ្លីមួយ ដែលបង្ហាញពីសកម្មភាព​ចូលរួមរបស់យុវជន ​កាកបាទក្រហមកម្ពុជា និងប្រជាជនទូទៅឱ្យចូលរួមដាំបន្លែសុវត្ថិភាពនៅ​តាម​សហគមន៍។ វីដេអូខ្លីដែលយុវជនកាកបាទក្រហមកម្ពុជា ​ផលិតឡើងនេះ​ គឺបានបំផុសឱ្យយុវជន សិស្សានុសិស្ស ​និងប្រជាជនទូទៅ ​នៅតាមសហគមន៍ចូលរួមដំាដុះដំណាំផ្សេងៗ និងចេះស្រឡាញ់​បរិស្ថាន។ ដែលវីដូនេះ​បានទទួល​ស្គាល់​ដោយសមាគមន៍ជាតិ ​និងទទួលបានចំណាត់ថ្នាក់លេខ១ ទូទាំង​យុវជន ទាំង១១ប្រទេសនៅក្នុងតំបន់អាស៊ានផងដែរ។

លោក រឿត សុខខុន ប្រធានការិយាល័យអភិវឌ្ឍន៍ នៃនាយកដ្ឋានធនធានមនុស្ស កាកបាទ​ក្រហម​កម្ពុជា បានឱ្យដឹងដែរថា​ ថ្ងៃនេះគឺបានដឹកនាំក្រុមយុវជន​ និងអ្នកស្ម័គ្រចិត្ត កាកបាទក្រហមកម្ពុជា មកទីតាំងវិទ្យាល័យចំណេះទូទៅ ​បច្ចេកទេសអនុវត្តកំពង់ឈើទាល ក្នុងស្រុកប្រាសាទសំបូរ ខេត្តកំពង់ធំនេះ​ គឺដើម្បីអប់រំផ្សព្វផ្សាយអំពីការដាំបន្លែសុវត្ថិភាព ​នៅក្នុងសាលារៀន​ រឺសហគមន៍ ដើម្បីចូលរួមចំណែក​លើកកម្ពស់ជីវភាព​ កាត់បន្ថយការប្រើប្រាស់​ជីគីមីផ្សេងៗ ក៏ដូចជាការ​អប់រំ​ផ្សព្វផ្សាយ​ទៅដល់សិស្សានុសិស្ស យុវជន ​និងប្រជាពលរដ្ឋទូទាំងប្រទេស ឱ្យយល់ដឹងពី​ការដាំ​បន្លែ​បែបធម្មជាតិ ​នៅតាមគ្រឹះស្ថានសិក្សា សហមគន៍ ​និងជាលក្ខណះគ្រួសារជាដើម។

លោក សុខខុន ​ក៏បានអំពាវនាវឱ្យយុវជនទូទៅទាំង​អស់​ខិតខំរៀនសូត្រ ក៏ដូចជាបង្ហាញ​នូវ​សមត្ថភាព​ដែលមាន ​ចូលរួម​ប្រគួតប្រជែង​ លើឆាកអន្តរជាតិ​ដើម្បី​បង្ហាញ​ពី​កិត្តិយស និង​ស្នាដៃរបស់ខ្លួន។​ ជាពិសេសបង្ហាញទៅកាន់ពិភពលោកថា ​កម្ពុជា​មានធនធានមនុស្ស មាន​ចំណេះដឹង​ដែលអាចចូលរួមចំណែក ​លើកកម្ពស់កិត្តិយសជាតិ តាមរយៈការចែករំលែក​ចំណេះ​ដឹងទាំង​អស់នេះ៕