បាល់ទាត់៖ ក្រុមព្រះខ័នរាជស្វាយរៀងបានបន្ថែម ៣ពិន្ទុទៀតហើយ ក្រោយវាយបកយកឈ្នះក្រុមភ្ញៀវណាហ្គាវើលដ៏ ដោយលទ្ធផល ៣-១ ក្នុងជំនួបសប្ដាហ៍ទី៤ នៃពានរង្វាន់មិត្តហ្វូនខេមបូឌានលីគឆ្នាំ២០២១ នៅកីឡដ្ឋានខេត្តស្វាយរៀងកាលពីល្ងាចថ្ងៃទី២៨ ខែមីនា ខណៈខ្សែប្រយុទ្ធចំណូលថ្មី Miguel Ángel Junco Martínez ហៅ Mika បន្ដរកបាន ២គ្រាប់ម្នាក់ឯងទៀត ក្នុងជ័យជម្នះលើកទី២ របស់ក្រុមជើងឯករងឆ្នាំចាស់នេះ។
ជំនួបគូឯកប្រចាំសប្ដាហ៍នេះ ក្រោយអាជ្ញាកណ្ដាលបន្លឺសំឡេងកញ្ចែចាប់ផ្ដើមការប្រកួត ក្រុមទាំងពីរបានបើកការវាយសម្រុកគ្នាភ្លាម ខណៈលេងបាន ២០នាទី កីឡាករ ឡេង មករា បានតែតបញ្ចូលទីក្រុមម្ចាស់ផ្ទះ ១គ្រាប់មុន តែ ៥នាទីក្រោយមក កីឡាករ Mika បានជួយក្រុមព្រះខ័នរាជស្វាយរៀងវាយបកតាមស្មើ ១-១ នៅនាទី២៥ មុនខ្សែប្រយុទ្ធអេស្ប៉ាញដដែលបន្ថែមគ្រាប់បាល់ទី២ របស់ខ្លួននៅនាទី៤៣ ក្រោយទទួលការបញ្ជូនបាល់ទាំង ២លើកដោយមិត្ដរួម Privat ដែលជួយឲ្យក្រុមខ្លួននាំមុខក្រុមភ្ញៀវ ២-១ វិញនៅតង់ទី១។ ចូលវគ្គទី២ ក្រុមទាំងពីរបានព្យាយាមស្វែងរកគ្រាប់បាល់បន្ថែមរៀងៗខ្លួន ខណៈសល់ពេលប្រមាណ ៣០នាទី លោក Conor Nestor បានប្ដូរកីឡាករចំណូលថ្មី Lopez Mendy ចូល ហើយខ្សែប្រយុទ្ធសញ្ជាតិសេណេហ្គាល់រូបនេះ បានបង្កើតឱកាសស៊ុតបន្ថែមគ្រាប់បាល់ទី៣ ឲ្យក្រុមម្ចាស់ផ្ទះនៅនាទី៩០ ក្រោយទទួលការបញ្ជូនបាល់ពីកីឡាករ ដែលទើបប្ដូរចូលខ្សែបម្រើសញ្ជាតិប្រេស៊ីល Thiago de Jesus។ នេះគឺជាគ្រាប់ដំបូងរបស់ Mendy សម្រាប់ការបង្ហាញខ្លួន ២ប្រកួត ហើយក៏ជាគ្រាប់បាល់ដើម្បីធានាជ័យជម្នះក្នុងការប្រកួតនេះដែរ។
តាមរយៈជ័យជម្នះនេះ បានធ្វើឲ្យក្រុមព្រះខ័នរាជស្វាយរៀងរកបាន ៦ពិន្ទុពេញស្មើក្រុមភ្នំពេញក្រោន បន្ទាប់ពីឈ្នះ ២ប្រកួតផ្ទួនៗ ខណៈប្រកួតដំបូងបានយកឈ្នះក្រុមអគ្គិសនីកម្ពុជា ដោយលទ្ធផល ៦-១ មុនជំនួបសប្ដាហ៍ទី៣ ដែលត្រូវជួបក្រុមវិសាខាត្រូវបានលើកពេលទៅប្រកួតនាថ្ងៃទី០៥ ខែឧសភា ឆ្នាំ២០២១ ខាងមុខ។ អ្វីដែលគួរឲ្យចាប់អារម្មណ៍ឆ្លងកាត់ ២ប្រកួតកន្លងមកកីឡាករ Mika រកបាន ២គ្រាប់ក្នុងមួយប្រកួតដូចគ្នា ដែលនាំឲ្យគេរកបាន ៤គ្រាប់ឈរកំពូលតារាងអ្នកស៊ុតបញ្ចូលទីច្រើនជាងគេបណ្ដោះអាសន្ន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
