ភ្នំពេញ៖ គណៈកម្មាធិការជាតិគាំពារ និងអភិវឌ្ឍន៍កុមារតូច ដោយមានសមាភាពចូលរួម​ពី​មន្រ្តីក្រសួងពាក់ព័ន្ធជាច្រើន ​បានសម្រេចអនុម័ត ផែនការសកម្មភាពជាតិស្ដីពីការគាំពារ និងអភិវឌ្ឍន៍កុមារតូច ២០២២-២០២៦។

ឯកឧត្តមរដ្ឋមន្រ្តី ហង់ ជួនណារ៉ុន ជាប្រធានគណៈកម្មាធិការជាតិគាំពារ និងអភិវឌ្ឍកុមារតូច នៅ​ថ្ងៃនេះ​បានដឹកនាំកិច្ចប្រជុំពេញអង្គ ដោយបានសម្រេចដាក់ឱ្យអនុម័ត ផែនការសកម្មភាព​ជាតិ​ស្ដីពីការគាំពារ និងអភិវឌ្ឍន៍កុមារតូច ២០២២-២០២៦។

ក្នុងការដាក់សម្រេចអនុម័តនេះ ឯកឧត្តមរដ្ឋមន្រ្តី ហង់ ជួនណារ៉ុន លើកឡើងថា ផែនការ​សកម្មភាពជាតិស្តីពីការគាំពារ ​និងអភិវឌ្ឍន៍កុមារតូច២០២២-២០២៦ ទី២នេះ ​រៀបចំឡើងតាមរយៈ ការ​ពិគ្រោះយោបល់បែបពហុវិស័យ​ជាមួយនឹងភាគីពាក់ព័ន្ធពីតំណាងក្រសួង ​ស្ថាប័ន ដៃគូអភិវឌ្ឍន៍​ និងអង្គការមិនមែន​រដ្ឋាភិបាលនានានៅថ្នាក់ជាតិ និងថ្នាក់ក្រោមជាតិដើម្បីទទួលបានធាតុចូល​ពេញលេញ និងមានបច្ចុប្បន្នភាព។

ឯកឧត្តម បន្តថា ផែនការសកម្មភាពជាតិបានបង្ហាញអំពីស្ថានភាពបច្ចុប្បន្ន​ក្នុងការគាំពារ​ឧត្តមានុវត្តន៍​ដែលទទួលបានពីការអនុវត្តផែនការសកម្មភាពជាតិស្តីពីការគាំពារកន្លងមក បញ្ហា​ប្រឈម​ដែលជាអាទិភាពត្រូវបន្តដោះស្រាយ និងការ​បន្ស៊ី​យុទ្ធសាស្ត្រ​ជាមួយគោល​នយោបាយជាតិ និងសកល និងផែនការយុទ្ធសាស្ត្រវិស័យពាក់ព័ន្ធផ្សេងៗទៀត ព្រមទាំងបានកំណត់នូវក្រប​ខណ្ឌ​លទ្ធផល​ការងារ ​តាមរយៈសូចនាករស្នូល​ សកម្មភាព តម្រូវការថវិកា​ យន្តការពិនិត្យតាមដាន​វាយ​តម្លៃ និងអង្គភាពទទួលខុសត្រូវតាមអាទិភាព។

ផែនការសកម្មភាពជាតិនេះជាផែនទីបង្ហាញផ្លូវ​សម្រាប់​គាំទ្រ​ការអនុវត្តសកម្មភាពគាំពារ និង​អភិវឌ្ឍន៍​កុមារតូច​នៅកម្ពុជា ​ដើម្បីសម្រេចគោលដៅតាមរយៈសូចនាករជាក់​លាក់សម្រាប់វាស់វែង​លទ្ធផល​សម្រេចបានទាំងនៅថ្នាក់ជាតិ​ ទាំងនៅថ្នាក់ក្រោមជាតិ៕ អត្ថបទ៖ គឹមហុក