ប្រណាំងរ​ថយន្ត៖ ​រដូវ​កាល​ថ្មី​នៃ​ព្រឹត្តិការណ៍​ប្រណាំង F1 ពិភពលោក ២០២១ បានចាប់ផ្តើម​ហើយ​ចុង​សប្តាហ៍​កន្លងទៅ​នៅ​ទីលាន Sakhir​ ប្រទេស​បា​រ៉ែ​ន​។ ​​ជើងឯក​ពិភពលោក ៧​សម័​យ Lewis Hamilton នៅតែ​ជា​តួឯក​ក្នុង​ការប្រកួត​នេះ តែ​ម្តងនេះ​មានការ​ប្រជែង​ស្វិតស្វាញ​ជាមួយ​កីឡាករ​ហូ​ឡង់ Max Verstappen របស់​ក្រុម Red Bull​។

​​កីឡាករ​វ័យក្មេង Max Verstappen ដែល​គិត​រំពឹងថា​នឹង​ជា​គូប្រជែង​ស្វិតស្វាញ​របស់ Hamilton រដូវ​កាល​នេះ​ បានយកឈ្នះ​ការប្រណាំង​យក​ទី​ចេញដំណើរ​កាលពី​ថ្ងៃ​សៅរ៍ និង​ចាប់ផ្តើម​ថ្ងៃអាទិត្យ​ម្សិលមិញ​ដោយ​នាំមុខគេ​។ ​​Verstappen ក៏ត្រូវ​បាន Hamilton នាំ​មុខ​វិញ​នៅ​ពេល​​ចូល Pit Lane ប្តូ​រកង់ តែ​រថយន្ត​របស់ Verstappen នៅតែ​លឿន​ជាង Hamilton ដដែល​ ខណៈការប្រកួត​មានការ​វ៉ា​ជែង​គ្នា​នៅ​ប៉ុន្មាន​ជុំ​ចុងក្រោយ​។​ ​​Verstappen ទីបំផុត​ជែង​ផុត Hamilton បានសំរេច​នៅពេល​សល់ ៤ជុំ​ទៀត​ចប់ តែ​កីឡាករ​របស់ Red Bull រូបនេះ​ត្រូវប្រគល់​តំណែង​លេខ ១ នេះ​ទៅ Hamilton វិញ​ដោយសារ​ខុស​លក្ខខណ្ឌ​វ៉ា​ជែង​នៅ​ចំណុច​ដែល​ជែងគ្នា​នោះ​។ ​​បើតាម​ច្បាប់​របស់ F1 ការ​វ៉ា​ជែង​បានសំរេច​តែ​ចេញ​ក្រៅ​ផ្លូវ ត្រូវតែ​ផ្តល់​ជំហរ​ទៅឲ្យ​គូប្រជែង​វិញ​។ ​​Hamilton ក៏បាន​រក្សា​ការនាំ​មុខ​រហូត​ដល់ទី​ព្រ័ត្រ និង​យកឈ្នះ​ការប្រកួត​បើក​រដូវ​កាល​នៅ​ទឹកដី​បា​រ៉ែ​ន​នេះ​។

​​លេខ៣ ក្នុងការ​ប្រកួត​នេះ​បាន​ទៅ Valtteri Bottas ​របស់ Mercedes ខណៈ​លេខ៤ Lando Norris របស់​ក្រុម McLaren និង​លេខ៥ Sergio Perez របស់​ក្រុម Red Bull​។​ ​​Ferrari នៅតែ​ចាប់ផ្តើម​រដូវ​កាល​មិនបាន​ល្អ​ ខណៈ Charles LeClerc​ បាន​ត្រឹម​លេខ៦ ឯ Carlos Sainz​ បាន​លេខ៨​។ ​​កូនប្រុស​ជើងឯក​ពិភពលោក ៧សម័យ​កីឡាករ Mick Schumacher បាន​ត្រឹម​លេខ១៦ ជាមួយ​ក្រុម Haas ស្របពេល​អតីត​កីឡាករ​របស់ Ferrari ទាំងពីរ Sebastian Vettel លេខ១៥ និង Fernando Alonso វិល​មក F1 វិញ​លេខ១៩​។ ​បន្ទាប់ពី​ការប្រកួត​នេះនឹង​សម្រាក​ដល់​ទៅ ៣សប្តាហ៍​មុន​បន្តទៅ​ទឹកដី​អ៊ីតាលី​៕

​អត្ថបទ​៖​នាង សុភា​វុ​ធ