សៀមរាប៖ អ្នកជំនាញសុខាភិបាល បានឱ្យដឹងថា នៅព្រឹកថ្ងៃទី២៩ខែមិថុនាឆ្នាំ២០២២នេះ ប្រជាពលរដ្ឋ សម្រុកទៅទទួលវ៉ាក់សាំងដូសជំរុញច្រើនជាងថ្ងៃមុនៗ បន្ទាប់ពីប្រមុខរាជរដ្ឋាភិបាលបានប្រកាសមានការឆ្លងជំងឺកូវីដ១៩ ជាថ្មីឡើងវិញ ។

លោក លឹម ហេង ប្រធានមណ្ឌលចាក់វ៉ាក់សាំង នៃមន្ទីរពេទ្យបង្អែកខេត្ដសៀមរាប មានប្រសាសន៍​ថា ដំណើរការចាក់វ៉ាក់សាំងនៅក្នុងមន្ទីរពេទ្យខេត្ដសៀមរាប បានបើក​ដំណើរការ​ជារៀងរាល់ថ្ងៃ មិនថាថ្ងៃសៅរិ៍ ឬថ្ងៃអាទិត្យនោះទេ ដោយក្រុមគ្រូពេទ្យបានផ្ដល់វ៉ាក់សាំងដល់​ប្រជាពលរដ្ឋជា​បន្ដ​បន្ទាប់ ចាប់តាំងពីដូសទីមួយរហូតដល់ដូសជំរុញ។

លោកបានបន្ដថា ក្រោយពេលសម្ដេចតេជោ នាយករដ្ឋមន្ដ្រី ​បានប្រកាសពីរកឃើញឆ្លងជំងឺ​កូវីដ១៩ ជាថ្មីនេះ លោកសង្កេតឃើញមានប្រជាពលរដ្ឋទៅទទួលវ៉ាក់សាំងច្រើនជាងសព្វដង ដោយក្នុង​ព្រឹកថ្ងៃទី២៩ ខែមិថុនានេះ ពួកគាត់បានទៅទទួលវ៉ាក់សាំងដូសជំរុញមានប្រមាណជាង ១០០នាក់ ។​

លោកបានបន្ដថា អ្នកទៅទទួលវ៉ាក់សាំងភាគច្រើនជាដូសជំរុញ ក្នុងនោះក៏មានជនជាតិបរទេស ឬក្រុមនិស្សិតដែលបានទៅសិក្សានៅបរទេស ពួកគាត់បានទៅបំពេញវ៉ាក់សាំង​ដូស​ជំរុញ​នៅមន្ទីរពេទ្យបង្អែកខេត្ដសៀមរាបផងដែរ។

លោកបានបន្ដថា ប្រភេទវ៉ាក់សាំងដែលបានផ្ដល់ជូនពលរដ្ឋមានអាស្ដ្រាហ្សេនីកា AstraZeneca និងភីស្វាយស័រ Pfizer ។លោក បានអំពាវដល់ប្រជាពលរដ្ឋ ដែលបានទទួលវ៉ាក់សាំង​ដូសទី១​ដល់ដូស​ទី៥រួចហើយ ត្រូវ​គៀងគរ​មិត្តភ័ក្ដិ ឬបងប្អូនរបស់ខ្លួនទៅទទួល​វ៉ាក់សាំងដូស​ជំរុញ​បន្ថែមទៀត ដើម្បីការពារ និងទប់ស្កាត់នូវជំងឺឆ្លងកូវីដ១៩នេះ ជាពិសេសការពារ​សុខភាព​របស់ខ្លួនឯង ដោយការពារប្រសើរជាងព្យាបាល បើទោះបីជំងឺកូវីដ១៩បានថមថយក្ដី៕