ភ្នំពេញ ៖ សារមន្ទីរជាតិកម្ពុជា បានសហការរៀបចំការដាក់តាំងផលិតផលនៃសិប្បកម្មសិល្បៈតម្បាញស្លឹកត្នោត ដែលមានរយៈពេល ០៣ថ្ងៃ ចាប់ពីថ្ងៃទី២៨ ដល់ថ្ងៃទី៣០ ខែមិថុនា ឆ្នាំ២០២២។ កម្មវិធីនេះជាកម្មវិធីបន្ដពីការធ្វើបទបង្ហាញកាលពីថ្ងៃទី២៤ ខែមិថុនា ឆ្នាំ២០២២ ក្រោមប្រធានបទអំពីស្លឹកត្នោត។

​បើតាមលោកស្រី ចាប សោភារ៉ា ប្រធានការិយាល័យអប់រំ និងផ្សព្វផ្សាយ នៃនាយកដ្ឋានសារមនី្ទរ ក្រសួងវប្បធម៌ និងវិចិត្រសិល្បៈ ប្រាប់BTV នាថ្ងៃទី២៩ ខែមិថុនានេះថា កម្មវិធីតាំងពិព័រណ៍ស្នាដៃហត្ថកម្មរបស់សហគមន៍ប្រចាំខែមិថុនានេះបានអនុញ្ញាតឲ្យសិស្សានុសិស្ស-និស្សិត សរុបចំនួន២៥០នាក់ មកពីវិទ្យាល័យព្រះស៊ីសុវត្ថិ អនុវិទ្យាល័យចតុមុខ សាកលវិទ្យាល័យភូមិន្ទវិចិត្រ និងសិល្បៈ សាលារៀនសុវណ្ណភូមិ និងសាលារៀនប៊ែលធីអន្តរជាតិ និង អាចចូលមើលការតាំងបង្ហាញ ស្ដាប់ការបកស្រាយរបស់អ្នកជំនាញ ជួបជាមួយអ្នកផលិតផ្ទាល់ ព្រមទាំងទទួលបានការអនុវត្តន៍ជាក់ស្ដែងទៀតផង។ ការចំណាយពេលចូលរួមស្តាប់ និងទស្សនាផ្ទាល់នៅសារមន្ទីរជាតិ ជាការបង្ហាញនូវទឹកចិត្តស្រលាញ់ថែរក្សាការពារមរតកបេតិកភណ្ឌអរូបី កម្រៗ ដែលបន្សល់ទុកដោយបុព្វបុរសខ្មែរយើង។

ទន្ទឹមគ្នានោះដែរសិស្សានុសិស្ស មកពីអនុវិទ្យាល័យចតុមុខ និងសាលារៀនសុវណ្ណភូមិ បានមកធ្វើទស្សនកិច្ចសិក្សា ស្វែងយល់ពីតម្លៃផលិតផលនៃសិប្បកម្មសិល្បៈតម្បាញស្លឹកត្នោត បានលើកឡើងស្រដៀងគ្នាថា កម្មវិធីរបស់សារមនី្ទរជាតិកម្ពុជា បានរៀបចំឡើងនេះ ពិតជាសំខាន់ណាស់ និងបានបង្ហាញពីវប្បធម៌ អរិយធម៌របស់ខ្មែរ។

សូមបញ្ជាក់ផងដែរថា កម្មវិធីនេះរៀបចំដោយសារមន្ទីរជាតិកម្ពុជា សហការជាមួយអង្គការ Nomi Network Cambodia និងអង្គការ ភូមិសិប្បកម្ម (Villageworks ដោយមានការចូលរួមតាំងបង្ហាញពីសហគមន៍សិប្បកម្មស្ដ្រីខ្មែរ ក្រោមការឧបត្ថម្ភពីហាងMuseum Café៕ អត្ថបទ ៖ រដ្ឋា