ស្វាយរៀង៖ មន្ត្រីជួរមុខ និងពលរដ្ឋខេត្តស្វាយរៀង ចំនួនជិត៤ពាន់ បានចូលចាក់វ៉ាក់សាំងដូសជំរុញទី៥ ខណៈដែលមន្ត្រីជួរមុខ ពលរដ្ឋ និងកម្មករ ចំនួន ៥៩ភាគរយ បានចាក់វ៉ាក់សាំងដូសជំរុញទី៤ និងត្រៀមចូលទៅចាក់វ៉ាក់សាំងនូវដូសទី៥។

លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង បានប្រាប់ BTVថា គិតមកដល់ពេលនេះ មន្រ្តីជួរមុខ និងពលរដ្ឋនៅទូទាំងខេត្តស្វាយរៀង បានបន្តចូលមកចាក់វ៉ាក់សាំង កូវីដ-១៩ដូសទី៥ ខណៈដែលមន្ត្រីថ្នាក់ដឹកនាំជួរមុខ កងកម្លាំងទាំង៣ ពលរដ្ឋ និងកម្មករ បានចាក់វ៉ាក់សាំងដូសទី៤ហើយ ចំនួនជាង ១១ម៉ឺន៧ពាន់នាក់ ក្នុងចំណោមពលរដ្ឋ ដែលត្រូវចាក់ចាប់ពីអាយុ១៨ឆ្នាំឡើងទៅ មានជាង៤សែននាក់។

លោកបានបញ្ជាក់ថា ទន្ទឹមនឹងការងារចាក់សាំងជូនដល់ពលរដ្ឋ នូវដូសទី៣ ដូសទី៤ និងដូសទី៥ ក្រុមគ្រូពេទ្យ បានអនុវត្តចាក់វ៉ាក់សាំងកុមារអាយុ៣ឆ្នាំ ដល់ក្រោម៥ឆ្នាំ គិតមកដល់ពេល នេះ ចាក់ដូសទី១ បានចំនួនជាង១ម៉ឺន៧ពាន់នាក់ និងចាក់ដូសទី២ បានចំនួនប្រមាណ៧ពាន់ ៧៩១នាក់ ។ ចាក់វ៉ាក់សាំងជូនកុមារអាយុ៥ ឆ្នាំទៅអាយុ៦ឆ្នាំ ដូសទី១ បានចំនួន ១ម៉ឺន៤ពាន់ ៩៣៩នាក់ ចាក់ដូសទី២ បានចំនួន១ម៉ឺន ១ពាន់ ៦៦៤នាក់ ចាក់ដូសទី៣ បានចំនួន៤៩៩នាក់។

ចាក់វ៉ាក់សាំងជូនដល់កុមារ៦ឆ្នាំ ដល់អាយុ១២ឆ្នាំ ដូសទី១ បានចំនួន៧ម៉ឺន១ពាន់២៦នាក់ ចាក់ដូសទី២ បានចំនួន៧ម៉ឺន១ពាន់៨០២នាក់ ចាក់ដូសទី៣ បានចំនួន៥ម៉ឺន ៦ពាន់ ៩៥៦នាក់ និងចាក់ជូនកុមារអាយុ១២ឆ្នាំ ដល់អាយុក្រោម១៨ឆ្នាំ ដូសទី១ បានចំនួន៥ម៉ឺន ៥ពាន់៩៨៨នាក់ ដូសទី២ បានចំនួន៥ម៉ឺន ៦ពាន់ ៥៣២នាក់ ចាក់ដូសទី៣បានចំនួន៥ម៉ឺន ១ពាន់ ៦៨១នាក់។

លោកបានបញ្ជាក់បន្ថែមថា ជុំវិញការងារចាក់វ៉ាក់សាំងកូវីដ១៩ រហូតមកដល់បច្ចុប្បន្ននេះ មន្ត្រីជួរមុខ និងពលរដ្ឋ បាននិងកំពុងតែបន្តទៅចាក់ នៅតាមមណ្ឌលនានា៕ អត្ថបទ៖ ភា សារិត