ភ្នំពេញ៖ នៅល្ងាចថ្ងៃទី២៩ ខែមិថុនានេះ រដ្ឋមន្ត្រីសេដ្ឋកិច្ចអាស៊ាន បានប្រកាសគាំទ្រ សភាពាណិជ្ជកម្មកម្ពុជាទទួលធ្វើជាម្ចាស់ផ្ទះរៀបចំកិច្ចប្រជុំកំពូលធុរកិច្ចនិងវិនិយោគអាស៊ានឆ្នាំ២០២២ និងពានរង្វាន់ធុរកិច្ចអាស៊ានឆ្នាំ២០២២ ។

កិច្ចប្រជុំកំពូលនេះ គឺនឹងរៀបចំឡើងស្របពេលគ្នានឹងកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៤០ និងកិច្ចប្រជុំកំពូលពាក់ព័ន្ធនានាទៀត នៅក្នុងខែវិច្ឆិកាឆ្នាំ២០២២នេះ។

នៅក្នុងពិធីប្រកាសជាផ្លូវការរៀបចំកិច្ចប្រជុំកំពូលធុរកិច្ចនិងវិនិយោគអាស៊ានឆ្នាំ២០២២ និងពានរង្វាន់​ធុរកិច្ចអាស៊ាន​ឆ្នាំ២០២២ ឯកឧត្តម ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម​និង​ជារដ្ឋមន្ត្រី​សេដ្ឋកិច្ចអាស៊ាន ​បានអំពាវនាវ និងលើកទឹកចិត្តឱ្យបណ្តាវិនិយោគិន ធុរជន សហគ្រិន ក្រុមហ៊ុន ​សហគ្រាសជាតិ ​និងអន្តរជាតិក៏ដូចជាគ្រប់ភាគីពាក់ព័ន្ធ​ទាំងអស់ ចូលរួម​សហការ​ជាមួយ​សភាពាណិជ្ជកម្មកម្ពុជា​ រៀបចំកិច្ចប្រជុំកំពូលធុរកិច្ច ​និងវិនិយោគអាស៊ានឆ្នាំ២០២២នេះ ឱ្យបាន​ច្រើននិងស្រុះដៃគ្នា ដើម្បីឱ្យព្រឹត្តិការណ៍នេះ ផ្ដល់ជាប្រយោជន៍ដល់សហគមន៍ធុរកិច្ច និងការជំរុញ​ដល់ការអភិវឌ្ឍសេដ្ឋកិច្ចជាតិ។

តាមរយៈការរៀបចំកិច្ចប្រជុំ​ធុរកិច្ច​អាស៊ាន​នេះដែរ ឧកញ៉ា តាន់ ម៉ូលីវណ្ណ ប្រធានគណៈកម្មាធិការ​ពានរង្វាន់​ធុរកិច្ចអាស៊ាន២០២២ ​ក៏បាន​អំពាវនាវបណ្តាក្រុមហ៊ុនជាតិអន្តរជាតិនានា សូមអញ្ជើញ​ដាក់​ពាក្យសុំចូលរួមប្រឡង​ដណ្តើមពាន​រង្វាន់​ធុរកិច្ចឆ្នើមអាស៊ាន​ឆ្នាំ២០២២ ​ចាប់ពីថ្ងៃទី១ ខែកក្តដា​ស្អែកនេះ ​ហើយនឹងឈប់ទទួលពាក្យនៅថ្ងៃទី៣០ ខែកញ្ញាឆ្នាំ២០២២ ហើយ​លទ្ធផល​នឹង​ត្រូវ​ប្រកាស ​និងប្រគល់ដោយមេដឹកនាំអាស៊ាន​នៅក្នុងកិច្ចប្រជុំកំពូលធុរកិច្ច ​និងវិនិយោគអាស៊ាន នៅក្នុងខែវិច្ឆិកាឆ្នាំ២០២២។

ឧកញ៉ា តាន់ ម៉ូលីវណ្ណបន្តថា ​កិច្ចប្រជុំកំពូលធុរកិច្ចនិងវិនិយោគអាស៊ានឆ្នាំ២០២២ និងពានរង្វាន់​ធុរកិច្ចអាស៊ានឆ្នាំ២០២២ ដែលសភាពាណិជ្ជកម្ពុជា ​ទទួលធ្វើជាម្ចាស់ផ្ទះរៀបចំនោះ នឹងមាន​បណ្តា​ធុរជន និងអ្នកវិនិយោគទុនជាតិអន្តរជាតិ ​ចូលរួមប្រមាណជាង ១០០០នាក់​ ខណៈកិច្ចប្រជុំកំពូល​នេះ​ គឺជាព្រឹត្តិការណ៍ដ៏មានសារៈសំខាន់​បំផុតសម្រាប់កម្ពុជា​ និងអាស៊ាន ក្នុងការផ្លាស់ប្តូរបទ​ពិសោធន៍ និងជាការជួបជុំដ៏ធំរវាងធុរជន​ វិនិយោគិនក្រុមហ៊ុនធំៗ​ និងអ្នកជំនាញលើគ្រប់វិស័យ ជាមួយ​ប្រមុខរាជរដ្ឋាភិបាលនិងប្រមុខរដ្ឋាភិបាល ដើម្បីពិភាក្សាលើបញ្ហាប្រឈមនិងកាលានុវត្តភាព​របស់​សហគមន៍ធុរកិច្ចក្នុងតំបន់អាស៊ាន​ និងពិភពលោក៕ អត្ថបទ ស៊ុម សុខជា