​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​កាលពី​ថ្ងៃ​ពុធ​ថា ក្រុម​អ្នក​ប្រយុទ្ធ​អ៊ុយ​ក្រែ​ន ១៤៤​នាក់​ត្រូវ​បាន​ដោះលែង​ពី​ការ​ឃុំ​ឃាំង​របស់​រុស្ស៊ី ជា​ផ្នែក​មួយ​នៃ​ការ​ដោះ​ដូរ​ឈ្លើយសឹក​។ ចារកម្ម​យោធា​អ៊ុយ​ក្រែ​ន​បាន​និយាយ​ថា វា​ជា​ការ​ដោះដូរ​ឈ្លើយសឹក​ច្រើន​បំផុត​ចាប់​តាំង​ពី​សង្គ្រាម​ចាប់ផ្តើម​។

​ក្នុងចំណោម​អ្នក​ដែល​ត្រូវបាន​ដោះលែងមាន​ 95​នាក់​បាន​ចូលរួម​ក្នុងការ​ការពារ​នៅ​រោងចក្រ​ដែកថែប Azovstal នៅ​ទីក្រុង Mariupol ភាគខាងត្បូង​របស់​ប្រទេស​អ៊ុយ​ក្រែ​ន​ដែល​ត្រូវបាន​បំផ្លាញ​ មុន​ពេល​កងកម្លាំង​រុស្ស៊ី​ដណ្តើមបានទីក្រុងកាលពី​ប៉ុន្មាន​សប្តាហ៍​កន្លងទៅនេះ​។ លោក Denis Pushilin មេដឹកនាំ​ក្រុម​ផ្តាច់ខ្លួន​នៅ​តំបន់ Donetsk បាន​និយាយថា ទាហាន​មាន​ចំនួន​ស្មើគ្នា​ត្រូវបាន​ដោះលែង​ដោយ​ភាគី​ទាំងពីរ​។​ លោក​ Zelenskyy និយាយថា ​ការវាយប្រហារ​របស់​រុស្ស៊ី​លើ​ទីក្រុង Mykolaiv នៅថ្ងៃនេះដោយ​មីស៊ី​ល​ចំនួន 10គ្រាប់​បាន​វាយប្រហារ​លើ​ទីតាំង​ស៊ីវិល ដែល​បង្ហាញ​ឱ្យឃើញ​សម្រាប់​មនុស្ស​គ្រប់គ្នា​នៅ​ជុំវិញ​ពិភពលោក​ថា សម្ពាធ​លើ​ប្រទេស​រុស្ស៊ី​នៅ​មិនទាន់​គ្រប់​គ្រាន់​នោះទេ​។

​លោក​ Zelenskyy អះអាងថា ​អ៊ុយ​ក្រែ​ន​នឹង​កាត់ផ្តាច់​ទំនាក់​ទំនងជា​មួយ​ប្រទេស​ស៊ី​រី ជុំវិញ​ការ​ទទួល​ស្គាល់​តំបន់ Luhansk និង Donetsk ភាគ​ខាងកើត​របស់​អ៊ុយ​ក្រែ​ន​ថា​ជា​តំបន់​ឯករាជ្យ​ និង​អធិបតេយ្យភាព​។ ប្រទេស​ស៊ី​រី​គឺជា​សម្ព័ន្ធមិត្ត​ដ៏​រឹងមាំ​របស់​រុស្ស៊ីដែល​បាន​ចូលរួម​ក្នុង​ជម្លោះ​ស៊ី​រី​កាលពី​ខែ​កញ្ញា ឆ្នាំ​2015 ជួយផ្តល់​ជំនួយ​ដើម្បី​គាំទ្រ​ប្រធានាធិបតី​ស៊ី​រី​លោក Bashar al-Assad។​ ចារកម្ម​យោធា​អ៊ុយ​ក្រែ​ន​បាន​បញ្ចេញ​វីដេអូ​កាលពី​ថ្ងៃ​ពុធ ​ដោយ​អះអាង​បង្ហាញ​ពី​ការដោះដូរ​ឈ្លើយ​សឹក​រវាង​ប្រទេស​អ៊ុយ​ក្រែ​ន​ និង​រុស្ស៊ី​ច្រើន​បំផុត​លើកដំបូង​៕

អត្ថបទ៖ ប៊ុនថន