ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានធ្វើ​ដាស់តឿន​ជាថ្មីម្តងទៀត ដល់នគរបាលគ្រប់ជាន់ថ្នាក់ទាំងអស់​ គប្បីធ្វើឱ្យប្រជាពលរដ្ឋគោរពស្រលាញ់ កុំធ្វើឱ្យពួកគាត់គ្រាន់តែឮឈ្មោះ ឃើញមុខស្អប់ខ្ពើម និងមិនចង់ជួបនោះទេ ខណៈករណីបែបនេះ គឺធ្លាប់មានកន្លងមកហើយ ជាពិសេសករណីនគរបាលដើរ​គំរាមកំហែង​ ចាប់គេមិនដឹងហេតុផល ។

ថ្លែងនៅក្នុងពិធីបញ្ចុះបឋមសិលាសាងសង់អគារស្នាក់នៅរបស់សិស្សនគរបាល កម្ពស់២ជាន់ បើកការដ្ឋានស្ថាបនាផ្លូវបេតុង ប្រព័ន្ធលូបង្ហូរទឹក ​និងសួរសុខទុក្ខសិស្សនគរបាល វគ្គ​បណ្តុះ​បណ្តាលកម្រិតបឋមវិជ្ជាជីវៈនគរបាល ជំនាន់ទី១៥ លើកទី២ (ព្រឹកថ្ងៃទី៣០ ខែមិថុនា ឆ្នាំ២០២២ នៅសាលានគរបាលជាតិភូមិភាគ៣ ខេត្តកំពង់ស្ពឺ) ។

សម្តេចក្រឡាហោម ស ខេង បានសង្កត់ធ្ងន់ថា«យើងអត់ជាប់រវល់នឹងកាន់កាំភ្លើង​ទៅធ្វើ​សង្រ្គាម​ទេ...​ប៉ុន្តែរវល់​នឹងកិច្ចការរក្សា​សន្តិសុខ​សុវត្ថិភាព​សណ្តាប់ធ្នាប់រៀប​រយ​សាធារណៈជូន​ប្រ​ជាពលរដ្ឋ។ ដូច្នេះត្រូវសិក្សារៀនសូត្រ ​សំខាន់គឺឲ្យដឹងអំពីសិទ្ធិតួនាទីភារកិច្ចរបស់នគរបាល ដែល​ជា​អ្នកបំរើប្រជាពលរដ្ឋ។ ប្រសិនបើគាត់ជឿទុកចិត្តយើង ​មានអ្វីក៏ពួកគាត់ប្រាប់ និងសហការជា​មួយ​យើង តែបើយើងចូលចិត្តតែដើរ​គំរាមកំហែង​គេ ចាប់មាន់គេ និងចាប់កូនគេនោះគឺមិន​សមនឹង​ឲ្យពួកគាត់​ជាប្រជាពលរដ្ឋនោះគោរព ស្រលាញ់ និងជឿទុកចិត្តលើយើងនោះឡើយ»។

សម្ដេចក្រឡាហោម បានលើកឡើងទៀតថា ក្រសួងមហាផ្ទៃបានធ្វើកំណែទម្រង់លើកង កម្លាំង​នគរបាល​ជាប់ជាប្រចាំតាមរយៈការ​បណ្តុះបណ្តាល ស្របតាមគោលនយោបាយ​កំណែទម្រង់​កងកម្លាំង ប្រដាប់អាវុធ​របស់រាជរដ្ឋាភិបាល​ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដោយបានផ្ដោតសំខាន់ទៅលើការ ធ្វើទំនើបកម្មនិង​ការពង្រឹង​សមត្ថភាព​វិជ្ជាជីវៈនៃកងកម្លាំងនគរបាលជាតិ ​ឱ្យស្របទៅនឹងការវិវត្តនៃ​ស្ថានការណ៍ សន្តិសុខជាតិ​និង​អន្តរជាតិ ​ព្រមទាំង​ឆ្លើយតប​នឹងតម្រូវការ​នៃអង្គភាពនគរបាលផងដែរ។

សម្ដេចក្រឡាហោម បានបញ្ជាក់ថា ការបណ្តុះបណ្តាលមន្ត្រីនគរបាលជាតិគឺជាការងារ​ចាំបាច់ដែល​ត្រូវតែបន្តធ្វើជាប់ជាប្រចាំ ដើម្បីធ្វើឱ្យកងកម្លាំង​នគរបាលជាតិមានចំណេះដឹង​គ្រប់គ្រាន់លើ​ផ្នែក​ទ្រឹស្ដី ​ជំនាញ បច្ចេកទេស ​និងអាកប្បកិរិយាល្អ​ ក្នុងការរក្សាឱ្យបាន​រឹងមាំ​នូវខឿន​សន្តិសុខជាតិ សណ្តាប់ធ្នាប់​សាធារណៈ និងសុវត្ថិភាពសង្គម ​ដែលជាមូលដ្ឋាន​គ្រឹះនៃការអភិវឌ្ឍជាតិ​លើ​គ្រប់វិស័យ៕អត្ថបទ៖ បាន ចក់