ខេត្តព្រះវិហារ៖ នៅថ្ងៃទី៣០ ខែមិថុនា ឆ្នាំ២០២២ នេះ លោកឧត្តមសេនីយ៍ឯក លៀង ភារម្យ ប្រធាននាយកដ្ឋាននគរបាលការពារព្រំដែនគោក បានអញ្ជើញ​ចូលរួម​ដឹកនាំ​ប្រជុំ​ត្រួត​ពិនិត្យ​កម្លាំងនគរបាលការពារព្រំដែនគោក ចំណុះវរសេនាតូច ទិសភូមិភាគទី៤ ខេត្តព្រះវិហារ។

ក្នុងឱកាសនោះ លោកឧត្តមសេនីយ៍ឯក លៀង ភារម្យ បាននាំនូវប្រសាសន៍ផ្តាំផ្ញើ​សាកសួរ​សុខ​ទុក្ខ​ពីឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ជូន​ដល់​កងកម្លាំងទាំងអស់ និងបានថ្លែង​ការ​កោត​សរសើរ​ចំពោះ​វីរភាព​អង់​អាច​ក្លាហាន​ក្នុង​ការ​ការពារ​ទឹកដី ដែលនេះគឺជាគំរូមួយសម្រាប់អ្នកជំនាន់ក្រោយ។ ចំពោះកិច្ចការពារព្រំដែន ឯកឧត្តម ក៏បា​នណែនាំឲ្យកងកម្លាំងទាំងអស់ ត្រូវសហការល្អជាមួយអាជ្ញាធរគ្រប់លំដាប់ថ្នាក់ និងកម្លាំង​សមត្ថកិច្ច​ពាក់ព័ន្ធ ដើម្បីរួមគ្នាបង្ការ ទប់ស្កាត់នូវរាល់បទល្មើសឆ្លងដែនគ្រប់ប្រភេទ ជាពិសេស​បទ​ល្មើស​គ្រឿងញៀន និងអាវុធខុសច្បាប់។

លោកប្រធាននាយកដ្ឋាន ក៏បានជំរុញឲ្យកម្លាំងទាំងអស់ត្រូវពង្រឹងសមត្ថភាពជំនាញ តាមរយៈ​ការ​បណ្ដុះ​បណ្ដាលជំនាញដល់មន្ត្រី មន្ត្រីបន្តវេនឲ្យរឹតតែមានសមត្ថភាពបន្ថែមទៀត ជាពិសេស​ត្រូវ​ថែ​រក្សាឲ្យបាននូវសាមគ្គីសាមគ្គីភាពផ្ទៃក្នុង និងមានសីលធម៌ខ្ពស់ គោរពវិន័យ គោរព​បទ​បញ្ជា​របស់​ថ្នាក់ដឹកនាំអគ្គស្នងការនគរបាលជាតិ ឲ្យបានម៉ឺងម៉ាត់ ជាពិសេសថែរក្សាសុខភាពឲ្យបានល្អ និងរួម​គ្នាបង្ការ ទប់ស្កាត់ការរីករាលដាលនៃជំងឺកូវីដ-១៩ ដោយ​រួស​រាន់​ទៅ​ចាក់វ៉ាក់​សាំង​បង្ការ​កូវីដ​១៩ ដូសជំរុញអោយបានគ្រប់ៗគ្នា អនុវត្តតាមវិធានសុខាភិបាលឲ្យបានត្រឹមត្រូវ ដោយ​ពាក់ម៉ាស់ រក្សាគម្លាត និងលាងដៃជាមួយសាប៊ូ អាល់កុល ឬជែលឲ្យបានញឹកញាប់៕