ភ្នំពេញ ៖ ជារៀងរាល់ឆ្នាំ ធនាគារ ជីប ម៉ុង ក៏ដូចជាក្រុមហ៊ុន ជីប ម៉ុង ទាំងមូលតែងតែចូលរួមចំណែកយ៉ាងសកម្មក្នុងការផ្ដល់ជំនួយដល់សង្គមកម្ពុជា។

​ភាគទុនិករបស់ធនាគារ ជីប ម៉ុង អ្នកឧកញ៉ា លាង ឃុន មានប្រសាសន៍ថា៖ យើងមិនត្រឹមតែអភិវឌ្ឍពាណិជ្ជកម្មរបស់យើងប៉ុណ្ណោះទេ ប៉ុន្តែក្រុមហ៊ុន ជីប ម៉ុង តែងតែចូលរួមបរិច្ចាគត្រឡប់ទៅសង្គមវិញនៅក្នុងវិស័យជាច្រើន ជាពិសេសចូលរួមជាមួយរាជរដ្ឋាភិបាលកម្ពុជា ក្នុងការអភិវឌ្ឍសេដ្ឋកិច្ចជាតិ ក៏ដូចជាធ្វើកិច្ចសហប្រតិបត្តិការនានា។ ឆ្នាំ២០២២ ភាគទុនិករបស់ធនាគារ ជីប ម៉ុង បានបរិច្ចាគ និងផ្ដល់ជំនួយលើវិស័យផ្សេងៗទូទាំងប្រទេស ជាក់ស្ដែងភាគទុនិក របស់ធនាគារបានប្រគល់ថវិកាមួយលានដុល្លារអាមេរិក សម្រាប់រយៈពេលប្រាំឆ្នាំ ដើម្បីរួមចំណែកជាមួយសមាគមគ្រូពេទ្យស្ម័គ្រចិត្តយុវជនសម្ដេចតេជោ(TYDA) សម្រាប់ការពិនិត្យ និងព្យាបាលជំងឺដោយឥតគិតថ្លៃ ជូនប្រជាពលរដ្ឋក្រីក្រ ព្រមជាមួយការឧបត្ថម្ភថវិកាជូនកាកបាទក្រហមកម្ពុជាជារៀងរាល់ឆ្នាំ ដើម្បីជាជំនួយមនុស្សធម៌ដល់ជនរងគ្រោះដោយឧបទ្ទវហេតុផ្សេងៗ។ បន្ថែមពីនោះ ភាគទុនិករបស់ធនាគារ ជីប ម៉ុង ក៏បានផ្តល់អាហារូបករណ៍រយៈពេល៤ឆ្នាំដល់និស្សិត៤០នាក់ ដើម្បីសិក្សាលើមុខជំនាញ «ស្ទែម» នៅសាកលវិទ្យាល័យ ខេមតិច ផងដែរ។  

គួរបញ្ជាក់ផងដែរថា ធនាគារ ជីប ម៉ុង គឺជាពាណិជ្ជកម្មមួយផ្នែករបស់ក្រុមហ៊ុន ជីប ម៉ុង បង្កើតឡើងក្នុងឆ្នាំ ១៩៨២ ដែលជាក្រុមហ៊ុនចម្រុះដ៏ធំបំផុតមួយក្នុងប្រទេសកម្ពុជា៕​ អត្ថបទ ៖ រដ្ឋា