ភ្នំពេញ៖ ក្រសួងសង្គមកិច្ច បានប្រកាសផ្លាស់ប្តូររចនាសម្ព័ន្ធរបស់ខ្លួនជាផ្លូវការ ដើម្បីឆ្លើយតបទៅនឹងការរីកចម្រើនវិស័យសង្គមកិច្ចនៅកម្ពុជា។ ទន្ទឹមគ្នានេះ ក្រសួងសង្គមកិច្ចក៏ត្រូវប្រឈមមុខរ៉ាប់រងនូវទំនួលខុសត្រូវកាន់តែខ្ពស់ជាងមុនដែរ ។

ក្រសួងសង្គមកិច្ច នៅថ្ងៃទី៣០ ខែមិថុនា នេះ បានរៀបចំការប្រកាសតែងតាំង និងផ្លាស់ប្តូររចនាសម្ព័ន្ធរបស់ក្រសួង។ នេះជាភាពជោគជ័យ និងបោះជំហានទៅមុខមួយដំណាក់កាលទៀត នៃក្រសួងសង្គមកិច្ច ក៏ដូចជាវិស័យសង្គមកិច្ច និងក៏ជាឧត្តមប្រយោជន៍សម្រាប់ក្រុមជនគោលដៅ។ នេះជាការបញ្ជាក់របស់ ឯឧត្តម វង សូត រដ្ឋមន្រ្តីក្រសួងសង្គមកិច្ចឣតីតយុទ្ធជន និងយុវនីតិសម្បទា។

ក្នុងការតែងតាំងនេះ ឯកឧត្តមបញ្ជាក់ថា ត្រូវមានទំនួលខុសត្រូវលើតួនាទីភារកិច្ចការងាររបស់ខ្លួន និងស្ថាប័ននីមួយៗ។ ក្នុងន័យនេះ គឺមន្ត្រីទាំងអស់ត្រូវចងចាំថា យើងមានទំនួលខុសត្រូវកាន់តែខ្ពស់ កាន់តែទូលំទូលាយ សំដៅបង្កើនប្រសិទ្ធភាពផ្តល់សេវាកម្មជូនបណ្តាជនគោលដៅឱ្យកាន់តែមានប្រសិទ្ធភាព ឱ្យពួកគាត់កាន់តែងាយទទួលបានសេវាផលប្រយោជន៍ និងកាន់តែទូលំទូលាយថែមទៀត ដើម្បីឆ្លើយតបទៅនឹងក្តីរំពឹង និងទំនុកចិត្តរបស់រាជរដ្ឋាភិបាល ក្នុងការបម្រើដល់វិស័យសង្គមកិច្ចនៅកម្ពុជា។

ឯកឧត្តម រដ្ឋមន្ត្រីបានបញ្ជាក់បន្ថែមថា ថ្នាក់ដឹកនាំស្ថាប័នទាំងឡាយត្រូវយកចិត្តទុកដាក់បន្ថែមទៀតពិនិត្យមើលគ្រប់មន្ត្រីណាដែលធ្វើការបានល្អ មានប្រសិទ្ធភាពក្នុងការបម្រើដល់ក្រុមជនគោលដៅសូមរក្សាទុក និងលើកទឹកចិត្ត។ ចំពោះមន្ត្រីទាំងឡាយណា ដែលមិនសូវយកចិត្តទុកដាក់បម្រើក្រុមជនគោលដៅ សូមពិចារណាឡើងវិញតាមការណ៍គួរ៕ អត្ថបទ៖ គឹមហុក