ចិន៖ ទីក្រុង​ហុងកុង​នៅ​ថ្ងៃ​សុក្រ​នេះ​បាន​ប្រារព្ធ​ខួប ​២៥​ឆ្នាំ​ចាប់តាំងពី​ការប្រគល់​ទៅ​ឲ្យ​ចិន​គ្រប់​គ្រង​ពី​ចក្រភព​អង់គ្លេស។ លោក​ប្រធានាធិបតី​ចិន Xi Jinping គ្រោង​ចូលរួម​ព្រឹត្តិការណ៍​រំឭក​ខួប​នេះ​។

​លោក Xi បាន​ទៅដល់​ទីក្រុង​ហុងកុង​កាលពី​ថ្ងៃ​ព្រហស្បតិ៍ និង​បាន​ជួប​ប្រមុខ​ដឹកនាំ​ក្រុង​ហុងកុង​ដែល​ទើប​ផុត​អាណត្តិ​លោកស្រី Carrie Lam និង​ក្រុម​មន្ត្រី​ជាច្រើន​ទៀត​។ ​ទីភ្នាក់ងារសារព័ត៌មាន​រដ្ឋ​ចិន Xinhua បាន​ដកស្រង់​សម្ដី​របស់លោក Xi ខណៈ​សរសើរ​លោកស្រី Carrie Lam ចំពោះ​ការខិតខំ​ប្រឹងប្រែង និង​ការលះបង់​ដើម្បី​ទីក្រុង​ហុងកុង​ក្នុង​ការទទួល​បានកា​រ​ផ្លាស់ប្ដូរ​ដ៏​ធំ ​ចាប់ពី​ភាព​វឹកវរ​រហូតដល់​មាន​សណ្ដាប់ធ្នាប់​ដូច​បច្ចុប្បន្ន​នេះ​។ ​លោក​ប្រធានាធិបតី​ចិន​លោក Xi Jinping កាលពី​ថ្ងៃ​ព្រហស្បតិ៍​បាន​និយាយ​ថា ទីក្រុង​ហុងកុង​បាន​យកឈ្នះ​លើ​បញ្ហា​ប្រឈម​នានា និង​បាន​ចាប់​កំណើត​ជាថ្មី ហើយ​នោះ​បាន​បង្ហាញ​ពី​ប្រសិទ្ធភាព​នៃ​គោលនយោបាយប្រទេស​មួយ​ប្រព័ន្ធ​ដឹកនាំ​ពីរ​។

​ទីក្រុង​ហុងកុង​ត្រូវ​បាន​ប្រគល់​ទៅ​ឲ្យ​ចិន​គ្រប់​គ្រង​ពី​ចក្រភព​អង់គ្លេស​កាលពី​ឆ្នាំ១៩៩៧ ជា​ការ​បញ្ចប់​ការសន្យា​រយៈពេល​ ៩៩​ឆ្នាំ។​ ការ​ប្រារព្ធ​ខួប​នេះ​ធ្លាប់​ត្រូវ​បាន​ធ្វើឡើង​ដោយមាន​ការ​តវ៉ា​ជាច្រើន ប៉ុន្តែ​ការ​តវ៉ា​ទាំងនោះ​បាន​ស្ងប់ស្ងាត់ ចាប់​តាំង​ពី​ការ​ដាក់​ឱ្យ​ប្រើប្រាស់​ច្បាប់​សន្តិសុខ​កាលពី​ឆ្នាំ២០២០ ដែល​បាន​បំបិទ​ការជំទាស់​។ ​លោក Xi ក៏​គ្រោង​នឹង​ចូលរួម​ពិធី​ស្បថ​ចូលកាន់​តំណែង​របស់​ប្រមុខ​ដឹកនាំ​ក្រុង​ហុងកុង​ថ្មី​លោក John Lee Ka-chiu ផង​ដែរ​៕

អត្ថបទ៖ សុខមាន