ភ្នំពេញ៖ អាជ្ញាធរ និងមន្ត្រីជំនាញនៅតាមបណ្ដាខេត្តជាប់បឹងទន្លេសាប បាននឹងកំពុងតែអនុវត្តបទបញ្ជារបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បង្ក្រាបបទល្មើសនេសាទ ដើម្បីធ្វើឱ្យ ប្រសើរឡើងវិញ​នូវធនធានមច្ឆជាតិ​ និងលើកស្ទួយជីវភាពប្រជានេសាទ។

ចំថ្ងៃទិវាមច្ឆជាតិ ១កក្កដា លោក ជួង សុភា នាយខណ្ឌរដ្ឋបាលជលផលខេត្តបាត់ដំបង អះអាងថា ក្នុងរយៈប្រមាណបីខែនៃយុទ្ធនាការបង្ក្រាបបទល្មើសនេសាទ ធ្វើឱ្យបទល្មើសធំៗ ដែលធ្លាប់​កើតមាននៅ ​ក្នុងតំបន់បឹងទន្លេសាបនៃខេត្តនេះ បានរលាយបាត់អស់ គឺនៅសេសសល់​តែបទល្មើស​តូចតាចប៉ុណ្ណោះ ដែលវាមិនបង្កហានិភ័យធ្ងន់ធ្ងរដល់ធនធានមច្ឆជាតិនោះទេ តែទោះជាយ៉ាង​ណា​ក៏ដោយការបង្ក្រាបបទល្មើសនេសាទនៅតែបន្ត។

លោក បានបញ្ជាក់ថា ដំណាក់កាលបន្ទាប់ពីការបង្ក្រាបបទល្មើសនេសាទ ​គឺការខិតខំធ្វើយ៉ាងណា ឱ្យធនធានមច្ឆជាតិសម្បូរឡើងវិញ ។

ចំណែកនៅក្នុងខេត្តកំពង់ឆ្នាំងវិញ ប្រជានេសាទ បានកត់សម្គាល់ឃើញថា បន្ទាប់ពីការបង្ក្រាប​បទល្មើស​នេសាទ ការនេសាទ​ដោយប្រើប្រាស់ឧបករណ៍ មង សន្ទូច គឺអាចរកត្រីបានច្រើនជាងមុន ដែលពីមុនបានក្នុង១ថ្ងៃតែ១ម៉ឺន ទៅ១ម៉ឺន៥ពាន់រៀល​តែប៉ុណ្ណោះ ​ប៉ុន្តែបច្ចុប្បន្ន ពួកគេ​អាច​រក​ចំណូល​ពីការលក់ត្រី ពី៥ទៅ៨ម៉ឺនរៀល ក្នុង១ថ្ងៃ ​។ ចំណែកពូជត្រី ដែលមិនឃើញ​កាល​ពីឆ្នាំមុនៗ ​បានមានវត្តមានសារជាថ្មី ដូចជា ត្រីគ្រុំ ត្រីឆ្កោក ត្រីកេះ និងប្រភេទត្រីត្រីកម្រ​ផ្សេងៗទៀត។

ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង លោក ងឹន ហ៊ុន បានអះអាងថា ក្នុងភូមិសាស្ត្រខេត្ត កំពង់ឆ្នាំង ​មានសភាព​ស្ងប់ស្ងាត់​បទល្មើសនេសាទហើយ បន្ទាប់ពី​យុទ្ធនាការ​បង្ក្រាបទ្រង់ទ្រាយធំ ក្នុងរយៈពេលជាងពីរខែកន្លងមកនេះ។ ប៉ុន្តែមកដល់ពេលនេះ កម្លាំងអាជ្ញាធរ​មាន​សមត្ថកិច្ច ​និងក្រុមមន្ត្រីជំ នាញជលផល ​នៅតែបន្តចុះល្បាត ត្រួតពិនិត្យ ស្រាវជ្រាវ និងង្ក្រាបបទល្មើស​នេសាទតាមគ្រប់ច្រកល្ហក។

លោក បានបញ្ជាក់ទៀតថា ​អាជ្ញាធរមានសមត្ថកិច្ច និងកម្លាំងជំនាញជលផល នៅបានបន្តរុករក​និងរុះរើឧបករណ៍នេសាទខុសច្បាប់ ​ដែល​ក្រុមជនល្មើសបានលបលួចដាក់នៅតាមតំបន់វាលទំនាប និង​ក្នុងព្រៃ ដូចជា លបឡុក បង្គោល ឈើរបាំង ​ស្បៃ អួនក្រឡា និងបានបំផ្លាញចោល​ជា​បន្ត​បន្ទាប់​ផងដែរ៕