​ភ្នំពេញ ៖ អនុគណៈកម្មការស្រាវជ្រាវជំងឺកូវីដ-១៩ នៃក្រសួងសុខាភិបាល នៅព្រឹកថ្ងៃទី២៩ ខែមីនា ឆ្នាំ២០២១នេះ បានជូនដំណឹងលើបណ្តាញសង្គម Facebook ឲ្យដឹងថា មានអ្នកកើតជំងឺកូវីដ-១៩ ធ្លាប់បានចូលទៅធនាគារ ឯកទេស អ៊ីអន និងហាង The Body Shop ក្នុងផ្សារទំនើបអ៊ីអន១ សូមអញ្ជើញទៅធ្វើតេស្តកូវីដ-១៩ជាប្រញាប់។

​

ដូច្នេះអនុគណៈកម្មការស្រាវជ្រាវជំងឺកូវីដ-១៩ បានអំពាវនាវឲ្យអ្នកពាក់ព័ន្ធអញ្ជើញទៅធ្វើតេស្ត និងពិនិត្យយកសំណាកទៅតាមលក្ខខណ្ឌ និងទីតាំងដូចក្នុងសេចកី្តជូនដំណឹងខាងក្រោមនេះ ៖ សេចកី្តជូនដំណឹង ករណីវីរុសកូវីដ-១៩ បានចូលក្នុងធនាគារ ឯកទេស អ៊ីអន (AEON Specialized Bank) សាខាផ្សារទំនើបអ៊ីអន១ ជាន់ទី២ អគារលេខ១៣២ ផ្លូវសុធារស រាជធានីភ្នំពេញនៅថ្ងៃទី២១ ខែមីនា ឆ្នាំ២០២១​បានចូលទៅធនាគារនោះនៅម៉ោងប្រហែល១៥:២៤នាទី និងចេញម៉ោង១៥:៤៦នាទី។ 

សូមបងប្អូនដែលមានរោគសញ្ញាដូចជាគ្រុនក្តៅ ក្អក កណ្តាស់ ឈឺបំពង់ករ ដកដង្ហើមខ្លីៗ ឬសង្ស័យ និងធ្លាប់ចេញ-ចូល នៅក្នុងធនាគារ ឯកទេស អ៊ីអន (AEON Specialized Bank) សាខាផ្សារទំនើបអ៊ីអន១ ជាន់ទី២ អគារលេខ១៣២ ផ្លូវសុធារស រាជធានីភ្នំពេញនៅថ្ងៃទី២១ ខែមីនា ឆ្នាំ២០២១បានចូលទៅធនាគារនោះនៅម៉ោងប្រហែល១៥:២៤នាទី និងចេញម៉ោង១៥:៤៦នាទីនោះ សូមអញ្ជើញទៅធ្វើតេស្តនៅមនី្ទរ​ពេទ្យដែលបានកំណត់អនុញ្ញាត នៅក្នុងរាជធានីភ្នំពេញ និងខេត្តរបស់អ្នក ចំពោះបុគ្គលដែលមិនមានរោគសញ្ញាសូមធ្វើចត្តាឡីស័កនៅផ្ទះ និងតាមដានសុខភាពរបស់អ្នករាល់ថ្ងៃរយៈពេល១៤ថ្ងៃ រាប់ពីថ្ងៃអ្នកបានប៉ះពាល់ចុងក្រោយ ឬទៅទីកន្លែងនោះ។

សេចកី្តជូនដំណឹងរបស់អនុគណៈកម្មការស្រាវជ្រាវជំងឺកូវីដ-១៩នៅព្រឹកថ្ងៃដដែរ បានបញ្ជាក់ទៀតថា ប្រជាពលរដ្ឋដែលធ្លាប់បានចូលទៅក្នុងហាង The Body Shop សាខា ផ្សារទំនើបអ៊ីអន១ ជាន់ផ្ទាល់ដី អគារលេខ១៣២ ផ្លូវសុធារស រាជធានីភ្នំពេញ ចាប់ពីថ្ងៃទី១៤ ដល់ថ្ងៃទី២៨ ខែមីនា ឆ្នាំ២០២១ មានអ្នកវិជ្ជមានកូវីដ-១៩ ទៅទីតាំងខាងលើនេះ។ អ្នកពាក់ព័ន្ធសូមអញ្ជើញទៅធ្វើតេស្តនៅវិទ្យាល័យបាក់ទូក វិទ្យាល័យបឹងត្របែក សាលាបឋមសិក្សាសុភមង្គល (ក្រោយផ្សារស៊ិន ជូរី បណ្តោះអាសន្ន) មណ្ឌលសុខភាពចាក់អង្រែក្រោម ឬមនី្ទរពេទ្យមិត្តភាពខ្មែរ-សូវៀត និងមនី្ទរពេទ្យបង្អែកនៅតាមបណ្តាខេត្តនានា ដោយឥតគិតថ្លៃ។ ព័ត៌មានបន្ថែមសូមទាក់ទងលេខ១១៥៕អត្ថបទ ៖ រដ្ឋា