ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី៣០ ខែមិថុនា ឆ្នាំ ២០២២ម្សិលមិញនេះ បានទទួលសៀវភៅ មគ្គុទេសក៍ស្ថាបត្យកម្មរាជធានីភ្នំពេញ ជាខេមរភាសាចំនួន ៥០ក្បាលពី អ្នកជំនាញបរទេស ដែលជាសហអ្នកនិពន្ធសៀវភៅនេះ។

ក្រសួងរៀបចំដែនដីក្រោមវត្តមានឯកឧត្តម ឧបនាយករដ្ឋមន្រ្តី ជា សុផារ៉ា ជារដ្ឋមន្រ្តី បានផ្ដល់​ឱកាសទទួលជួប និងទទួលសៀវភៅមគ្គុទេសក៍ស្ថាបត្យកម្មរាជធានីភ្នំពេញ ពីលោក Walter Koditek ដែលជាសហអ្នកនិពន្ធសៀវភៅនេះ។ ចំពោះសៀវភៅដែលប្រគល់ជូននាពេលនេះ គឺមានចំនួន ៥០ ក្បាល ជាខេមរភាសា។

ចំពោះការទទួលបានសៀវភៅនេះ ឯកឧត្តម ឧបនាយករដ្ឋមន្រ្តី បានលើកឡើងថា សៀវភៅនេះ គឺមានសារៈសំខាន់ធំៗចំនួនពីរ។ សារៈសំខាន់ទី ១ គឺសៀវភៅនេះ សម្រាប់កូនខ្មែរជំនាន់ក្រោយ សិក្សាស្វែងយល់ពីស្ថាបត្យកម្មបុរាណរបស់ខ្មែរ ដែលនៅសល់។ ករណីពុំមានការចងក្រងនោះទេ ស្ថាបត្យកម្មទាំងនោះ គឺអាចបាត់បង់ នៅថ្ងៃខាងមុខ។

ចំពោះសារៈសំខាន់មួយទៀត នៃសៀវភៅនេះ ​គឺអាចជួយអ្នកវិនិយោគលើវិស័យសំណង់ អាច​ប្រើប្រាស់សៀវភៅនេះ ធ្វើជាគោល ដោយពុំចាំបាច់ចំណាយពេលវេលា រឺថវិកាច្រើន ធ្វើការស្រាវជ្រាវ។

ចំពោះលោក Walter Koditek ដែលជាសហអ្នកនិពន្ធសៀវភៅនេះ ក៏បានបញ្ជាក់ដែរថា ការ​សរសេរ​សៀវភៅនេះ ក៏មានគោលបំណងសំខាន់ចូលរួម​អភិរក្សកេរដំណែលក្នុងវិស័យ​សំណង់នេះ។ សំខាន់គឺចង់ឱ្យ យុវជនខ្មែរជំនាន់ក្រោយ ជាពិសេសនិស្សិតសិក្សាលើផ្នែកនេះ ​ក៏ដូចជាបរទេស អាចសិក្សាស្វែងយល់បានកាន់តែច្រើន​ ពីស្ថាបត្យកម្មរបស់ខ្មែរ។

ចំពោះសៀវភៅ មគ្គុទេសក៍ស្ថាបត្យកម្មរាជធានីភ្នំពេញនេះ ឯកឧត្តម ឧបនាយករដ្ឋមន្រ្តី និង​ជារដ្ឋមន្រ្តីក្រសួងរៀបចំដែនដី​ ក៏មានបំណងចែកជូន ​បណ្ដាក្រុមហ៊ុនដែលធ្វើការលើវិស័យនេះ។ បច្ចុប្បន្នសៀវភៅនេះ ​ក៏មាននៅតាម បណ្ណគារផងដែរ​៕ អត្ថបទ៖ គឹមហុក