ភ្នំពេញ៖ គណៈកម្មាធិការអន្តរក្រសួងស្ដីពីសុខភាពសិក្សា បានបើកកិច្ចប្រជុំដើម្បីពិនិត្យ ពិភាក្សា និងសម្រេចអនុម័តលើផែនការសកម្មភាពជាតិស្ដីពី សុខភាពសិក្សាឆ្នាំ២០២១-២០៣០ នៅថ្ងៃទី០១ ខែកក្កដា ឆ្នាំ២០២២។

គណៈកម្មកាធិការអន្តរក្រសួងស្ដីពីសុខភាពសិក្សា ដែលមានឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំជាប្រធាន និងមានវត្តមានមន្រ្តីមកពីក្រសួងស្ថាប័នដទៃជាសមាជិក បានប្រជុំសម្រេចអនុម័ត ផែនការសកម្មភាពជាតិស្ដីពី សុខភាពសិក្សាឆ្នាំ ២០២១-២០៣០។

ក្នុងឱកាសសម្រេចអនុម័តនេះ ​ឯកឧត្តម ហង់ ជួនណារ៉ុន លើកឡើងដែរថា ផែនការសកម្មភាព​ជាតិ​ស្ដីពី សុខភាពសិក្សាឆ្នាំ២០២១-២០៣០ គឺរៀបចំឡើងដោយអនុលោមតាមយុទ្ធសាស្រ្តទាំង ៩ចំណុចនៃ គោលនយោបាយជាតិស្ដីពីសុខភាព។

យុទ្ធសាស្រ្តទាំងនោះមានដូចជា អភិវឌ្ឍន៍​ក្របខណ្ឌច្បាប់និងយន្តការ លើកកម្ពស់សុខភាព​ចាំបាច់​ដល់អ្នកសិក្សានិងបុគ្គលិកអប់រំ ​លើកកម្ពស់ការផ្ដល់​អាហារូបត្ថម្ភ​ លើកកម្ពស់​ការ​ផ្គត់ផ្គង់​ទឹកស្អាតនិងអនាម័យ ​លើកកម្ពស់បរិស្ថានសិក្សាប្រកបដោយសុវត្ថិភាព​ បរិយាបន្ន ផាសុកភាព និងមេត្រីភាព ​លើកកម្ពស់សន្តិសុខនិងសណ្ដាប់ធ្នាប់ក្នុងគ្រឹះស្ថានសិក្សា លើកកម្ពស់​ការ​អប់រំ​សុខភាព ​លើកកម្ពស់ការអនុវត្តបំណិនសុខភាព និងលើកកម្ពស់ការចូលរួមពីគ្រប់ភាគីពាក់ព័ន្ធ​ក្នុងការលើកកម្ពស់សុខភាពសិក្សា។

ឯកឧត្តមប្រធាន ក៏បានលើកឡើងបញ្ជាក់ដែរថា បញ្ហាសុខភាពសិក្សានេះមានសារៈសំខាន់ជាខ្លាំង ព្រោះវាអាចជិះឥទ្ធិពលដល់សង្គមជាតិ។ ដើម្បីសម្រេចលទ្ធផលល្អប្រសើរ ចំពោះការ​អនុវត្ត​ផែនការសកម្មភាពថ្មីមួយនេះ​ គឺទាមទារការចូលរួមពីគ្រប់ក្រសួងស្ថាប័ន្នពាក់ព័ន្ធ ​ទាំងថ្នាក់ជាតិ ថ្នាក់ក្រោមជាតិផងដែរ។

ផែនការសកម្មភាពជាតិស្ដីពី សុខភាពសិក្សាឆ្នាំ ២០២១-២០៣០ នេះ ក៏ត្រូវបានរៀបចំឡើងដើម្បី ក្នុង​គោលដៅផ្សាភ្ជាប់ទំនាក់ទំនង រវាងគោលនយោបាយ យុទ្ធសាស្រ្ត ធនធានហិរញ្ញវត្ថុតាម​រយៈសកម្មភាព​ប្រទាក់ក្រឡាគ្នា ​និងមានសង្គតិភាពទៅនឹងកម្មវិធីដែលមានស្រាប់ ដោយមាន​ការ​ពិគ្រោះយោបល់ ​និងមានការវិភាគរវាងក្រសួង អ្នកពាក់ព័ន្ធ ដៃគូអភិវឌ្ឍដើម្បីធានាបាន​ការ​បំពេញ​ការងារ ​ដោយទទួលខុសត្រូវក្នុងដែនសមត្ថកិច្ចរៀងខ្លួន ​ដើម្បីចូលរួមសម្រេចឱ្យបាន គោលដៅ​អភិវឌ្ឍប្រកបដោយចីរភាពឆ្នាំ ២០៣០៕ អត្ថបទ៖ គឹមហុក