កំពង់ចាម៖ យុវជននៅស្រុកបាធាយ ខេត្តកំពង់ចាម បានប្តេជ្ញាចិត្តថា ពួកគេមិន​ប៉ះពាល់​គ្រឿងញៀននោះ​ឡើយ ដើម្បីអនាគតខ្លួន ក្រុមគ្រួសារ និងសង្គមជាតិ និងត្រូវប្រឹងប្រែងសិក្សារៀនសូត្រ ដើម្បីក្លាយខ្លួនជាធនធានមនុស្សជួយដល់សង្គមជាតិ។

យុវជនជាច្រើននាក់ កាលពីថ្ងៃទី៣០ខែមិថុនាម្សិលមិញ បានចូលរួមទិវាអន្តរជាតិប្រយុទ្ធប្រឆាំង​គ្រឿងញៀន ក្រោមប្រធានបទ "ដោះស្រាយបញ្ហាគ្រឿងញៀនក្នុងវិបត្តិសុខភាព និងមនុស្សធម៌ ដែលត្រូវបានធ្វើឡើងនៅក្នុងស្រុកបាធាយ ខេត្តកំពង់ ចាម ហើយពួកគេបានប្ដេជ្ញាថា នឹង​ចៀសឲ្យឆ្ងាយពីគ្រឿងញៀន ​និងបន្តផ្សព្វផ្សាយដល់មិត្តភក្តិពីផលប៉ះពាល់នៃគ្រឿងញៀន ដែលបង្កឲ្យប៉ះពាល់ដល់សុខភាព​ ខាតបង់ពេលវេលា លុយកាក់ និងសង្គមជាតិផងដែរ។

ឯកឧត្តម អ៊ុន ចាន់ដា អភិបាលខេត្តកំពង់ចាម​ បានអំពាវនាវដល់ប្រជាពលរដ្ឋទាំងអស់ រួមគ្នា​ទប់ស្កាត់ការជួញដូរសារធាតុញៀន ​ដោយត្រូវរាយការណ៍ទៅ​សមត្ថកិច្ចជំនាញ ចំណែក​អាជ្ញាធរមូលដ្ឋាន ត្រូវមានភារកិច្ចចូលរួមពង្រឹង ​ផ្សព្វផ្សាយច្បាប់​ និងផលប៉ះពាល់សុខភាព នៃការ​ប្រើប្រាស់សារធាតុញៀន ​ហើយយុវជន ​គឺត្រូវធ្វើខ្លួនឲ្យល្អ ​ពោលគឺរៀនឲ្យពូកែ ​សិស្សល្អ កូនល្អ ពលរដ្ឋល្អក្នុងសង្គម ​ដើម្បីក្លាយជាទំពាំងស្នងឫស្សីនាពេលអនាគត៕ អត្ថបទ៖ ថុង សីហា