​​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​កាលពី​ថ្ងៃ​សុក្រ​ថា ការ​វាយប្រហារ​របស់​រុស្ស៊ី​នៅ​ទីក្រុង ​Odesa លើ​អគារ​លំនៅឋាន និង​ទីតាំង​ជំរំ​គឺជា​ការវាយប្រហារ​ដោយ​ចេតនា ​និង​ដោយ​ផ្ទាល់​។ ការវាយប្រហារ​បណ្តាល​ឲ្យ​មនុស្ស ​21​នាក់​ស្លាប់ និង ​39​នាក់​ផ្សេង​ទៀត​បាន​រងរបួស​ដោ​យ​មី​ស៊ី​ល​របស់​រុស្ស៊ី​។​

​លោក​បាន​អះអាងថា មី​ស៊ី​ល Kh-22 ត្រូវបាន​ប្រើប្រាស់​ក្នុង​ការ​វាយប្រហារ​លើ​អគារ​លំនៅឋាន និង​ទីតាំង​ជំរំដែល​ជា​ធម្មតា​ត្រូវ​ប្រើប្រាស់​ដើម្បី​បំផ្លាញ​នាវា​ផ្ទុក​យន្តហោះ និង​នាវាចម្បាំង​ធំ​ៗ​។​ ​វីដេអូ​នៃ​ការវាយប្រហារ​នៅមុន​ពេល​ថ្ងៃ​រះ​បាន​បង្ហាញ​អគារ​ឆេះ​ខ្លោច​ក្នុង​ទីក្រុង​តូច Serhiivka ចម្ងាយ​ប្រមាណ 50​គីឡូម៉ែត្រ​ពី​ទីក្រុង Odesa​។ លោក Zelenskyy និយាយថា មី​ស៊ី​ល​ប្រឆាំង​នាវា Kh-22 ចំនួន​ 3គ្រាប់​បាន​វាយប្រហារ​ទៅលើ​អគារ​លំនៅឋាន​កម្ពស់ 9ជាន់​។ អាជ្ញាធរ​អ៊ុយ​ក្រែ​ន​បាន​និយាយ​ថា ​ការវាយប្រហារ​នេះ​ជា​ការ​វាយតប​ត​របស់​កងទ័ព​រុស្ស៊ី ​ដែល​ត្រូវបាន​បង្ខំ​ឲ្យ​ចាក​ចេញពី​កោះ​ពស់​មួយថ្ងៃ​មុន​នេះ ទោះបីជា​ទីក្រុង​មូ​ស្គូ​បាន​បង្ហាញ​ថា ​ការដក​កងកម្លាំង​ចេញ​របស់​ពួកគេ​ជា​កាយវិការ​សុច្ឆន្ទៈ ​ដើម្បី​ជួយ​បើក​ច្រក​ក្នុង​ការ​នាំចេញ​គ្រាប់​ធញ្ញជាតិ​ពី​ប្រទេស​អ៊ុយ​ក្រែ​ន​ក៏ដោយ​។​

​ជាមួយគ្នានេះក្នុងអំឡុងពេល​ដំណើរ​ទស្សនកិច្ច​ទៅកាន់​ទីក្រុង Kyiv កាលពី​ថ្ងៃ​សុក្រ នាយករដ្ឋមន្ត្រី​ប្រទេស​ន័​រ​វែ​ស​លោក Jonas Gahr Store បាន​ប្រកាស​ផ្តល់ជំនួយ​ចំនួន 1ពាន់​លាន​អឺរ៉ូ ឬ​ 1.04ពាន់​លាន​ដុល្លារ​ដល់​ប្រទេស​អ៊ុយ​ក្រែ​ន។ លោក Store បាន​និយាយ​ថា ជំនួយ​សម្រាប់​ចំណែក​ដែល​នៅ​សល់​នៃ​ឆ្នាំ2022 និង​ឆ្នាំ2023 នឹង​រួមបញ្ចូល​ជំនួយ​មនុស្សធម៌ ការ​គាំទ្រ​ការ​ស្តារ​ប្រទេស​ឡើងវិញ និង​ការ​គាំទ្រ​ផ្នែក​ការពារ​ជាតិ៕

អត្ថបទ៖ សុខមាន