​រុស្ស៊ី៖ ក្រសួងការពារជាតិ​រុស្ស៊ី​បាន​និយាយ​កាលពី​ថ្ងៃ​សុក្រ​ថា កងកម្លាំង​រុស្ស៊ី និង​ក្រុម​ផ្តាច់ខ្លួន​តំបន់ Luhansk បន្ត​រុលចូល​ទៅមុខ​ដោយ​ជោគជ័យ​នៅក្នុង​ទីក្រុង Lysychansk ។​

​អ្នកនាំពាក្យ​របស់​រុស្សី​លោក Igor Konashenkov និយាយថា ក្នុង​រយៈពេល​ច្រើនជាង​បី​ថ្ងៃ កងទ័ពដណ្តើមបាន​ការគ្រប់គ្រង​នៅ​រោងចក្រ​ចម្រាញ់​ប្រេង​។ លោក Konashenkov និយាយថា​ កងទ័ព​អ៊ុយ​ក្រែ​ន​បាត់បង់​ច្រើន​នៅក្នុង​ទីក្រុង​នេះ ដោយបាន​រាយការណ៍​ថា ​មនុស្ស ​190​នាក់​បាន​ស្លាប់ ​និង​រងរបួស​។​ ​ខណៈ​ទីក្រុង Sievierdonetsk របស់​តំបន់ Luhansk បាន​ធ្លាក់​ទៅលើ​កងកម្លាំង​រុស្ស៊ី ការផ្តោត​សំខាន់​បាន​ងាក​ទៅរក​ទីក្រុង Lysychansk ។

ការប្រយុទ្ធ​របស់​ទីក្រុង​មូ​ស្គូ​ដើម្បី​ដណ្តើមយក​តំបន់ Donbas ទាំងមូល​ពី​អ៊ុយ​ក្រែ​ន បានឃើញ​កងកម្លាំង​រុស្ស៊ី​រុលចូល​ទៅកាន់​ភូមិ​ចំនួន​ពីរ​នៅ​ភាគខាងត្បូង​ទីក្រុង Lysychansk ខណៈ​កងទ័ព​អ៊ុយ​ក្រែ​ន​បាន​ប្រយុទ្ធ​ដើម្បី​ការពារ​ការហ៊ុមព័ទ្ធ​។​ ​ប៉ុន្តែ​មនុស្ស​ជាច្រើន​នៅ​ទីក្រុង Sievierodonetsk បាន​បដិសេធ​មិន​ព្រម​ចាកចេញ​នោះទេ​។​ ​ជន​ស៊ីវិល​ប្រមាណ 15,000នាក់នៅតែ​ជ្រកកោន​ក្នុង​ទីជម្រក​ក្រោម​ដី​គេច​ពី​ការបាញ់​ផ្លោង ខណៈ​ពលរដ្ឋ​មួយចំនួន​បន្ទោស​អ៊ុយ​ក្រែ​នចំពោះ​ជម្លោះ ហើយ​អ្នក​ផ្សេងទៀត​សុំ​ឲ្យ​បញ្ឈប់​សង្គ្រាម៕

អត្ថបទ៖ សុខមាន