ភ្នំពេញ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ស្នើ​សមាគម​អ្នក​ផ្តល់​សេវាសុខាភិបាលឯកជននៅកម្ពុជា ត្រូវបន្តពង្រឹងកាតព្វកិច្ចដឹកនាំ សម្របសម្រួល តម្រង់ទិស និង​ពង្រឹង​ការអនុវត្តការផ្តល់សេវាសុខាភិបាលឯកជនប្រកបដោយគុណភាព ប្រសិទ្ធភាព និង​សុវតិ្ថភាព។

ការថ្លែងរបស់ឯកឧត្តម សាស្រ្តាចារ្យ ម៉ម ប៊ុនហេង យ៉ាងដូច្នេះ​នា​ឱកាស​អញ្ជើញ​បើក​សន្និបាត​បូក​សរុបលទ្ធផលការងារឆ្នាំ២០២១ និងលើកទិសដៅការងារបន្តឆ្នាំ២០២២ របស់​សមាគម​អ្នក​ផ្តល់​សេវាសុខាភិបាលឯកជន នៅកម្ពុជា ហៅកាត់«ស.ស.ឯ.ក» នាព្រឹកថ្ងៃទី២ ខែកក្កដា ឆ្នាំ​២០២២​នេះ។

ឯកឧត្តម រដ្ឋមន្រី្ត បានបន្តទៀតថា ក្រៅពីការផ្តល់សេវាប្រកបដោយគុណភាព ប្រសិទ្ធភាព និងសុវតិ្ថភាពហើយនោះ ក៏ត្រូវខិតខំបន្ថែមទៀត ក្នុងការផ្សព្វផ្សាយ និងអនុវត្តគោលនយោបាយ សារាចរណែនាំនានារបស់ក្រសួងសុខាភិបាល សំដៅធ្វើយ៉ាងណាពង្រឹងគុណតម្លៃ ក្រម​សីល​ធម៌​វិជ្ជាជីវៈ រក្សាឲ្យបាននូវកិតិ្តនាមជាកងទ័ពអាវស ដែលមាន​ចិត្តស្មោះ​សរ​ជួយ​សង្រ្គោះ​អាយុជីវិត​ប្រជាពលរដ្ឋ គ្រប់ពេលវេលា និងគ្រប់ទីកន្លែង។ ត្រូវចែករំលែកចំណេះដឹងទៅវិញទៅមក ដោយ​មាន​ការ​បណ្តុះបណ្តាលបន្តផ្នែកបច្ចេកទេសថ្មីៗបន្ថែមទៀត សំដៅ​បង្កើន​ចំណេះ​ដឹង​គ្រូពេទ្យ​ប្រកប​ដោយសមត្ថភាពខ្ពស់ និងត្រូវចូលរួមក្នុងគណៈវិជ្ជាជីវៈ ដែលជា​កាតព្វកិច្ច​មិន​អាច​ខ្វះ​បាន​។

ឯកឧត្តម សាស្រ្តាចារ្យ ម៉ម ប៊ុនហេង បានសង្កត់ធ្ងន់ថា រាជរដ្ឋាភិបាល ក្រោម​ការ​ដឹកនាំ​ដ៏​ឈ្លាស​វៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃ​ព្រះរាជាណាចក្រកម្ពុជា ជានិច្ចកាល​បាន​យក​ចិត្ត​ទុក​ដាក់​យ៉ាង​ខ្លាំង​អំពី​សុខភាព​របស់​ប្រជាពលរដ្ឋយើង ជាពិសេសការលើកកម្ពស់គុណភាពការផ្តល់សេវាសុខាភិបាលទាំងសាធារណៈ និង​ឯកជន ដែលជាដៃគូជួយបំពេញបន្ថែមក្នុងការផ្តល់សេវាពិនិត្យ ព្យាបាល​ជំងឺ​ជូន​ប្រជាពលរដ្ឋ​កម្ពុជា​យើង​ឲ្យកាន់តែប្រសើរឡើងប្រកបដោយគុណភាព ប្រសិទ្ធភាព និងប្រសិទ្ធផល។

ជាមួយគ្នានោះដែរ លោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និង​ជា​ប្រធាន​កិតិ្តយសសមាគមអ្នកផ្តល់សេវាសុខាភិបាលឯកជន នៅកម្ពុជា បានលើកឡើងដែរថា សមាគម​អ្នក​ផ្តល់សេវាសុខាភិបាលឯកជននៅកម្ពុជា បានបង្កើតឡើងមុនបរិបទកូវីដ-១៩ ក្នុង​ឆ្នាំ​២០១៩​។

ជាចុងក្រោយឯកឧត្តម ង៉ូវ កាង រដ្ឋលេខាធិការក្រសួងសុខាភិបាល និង​ជា​ប្រធាន​សមាគម​អ្នក​ផ្តល់​សេវាសុខាភិបាលឯកជននៅកម្ពុជា បានប្តេជ្ញាចិត្តបន្ត អនុវត្តការងារក្នុងវិជ្ជាជីវៈសុខាភិបាល ប្រកប​ដោយកាយវិការមនុស្សធម៌ និងការទទួលខុសត្រូវខ្ពស់ ដើម្បីបម្រើប្រជាពលរដ្ឋកម្ពុជា ក្រោម​ការ​ដឹកនាំដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា។ មុននឹងបញ្ចប់ឯកឧត្តម ប្រធានសមាគម ក៏បានធ្វើការប្តេជ្ញាចិត្ត និងដាក់ចេញផែនការមួយចំនួនសម្រាប់សមាគមអនុវត្តដូចខាងក្រោម៖ បន្តអនុវត្តន៍​តាម​ការណែនាំ​របស់​ក្រសួងសុខាភិបាល និងចូលរួមធ្វើការផ្សព្វផ្សាយច្បាប់ គោលការណែនាំ គោល​នយោបាយ ប្រកាស ឬសារាចរណ៍ណែនាំ ជូនដល់សមាជិក សមាជិកា សមាគមដើម្បីអនុវត្តន៍ និងជំរុញបន្ថែមដល់សមាជិក សមាគមត្រូវចុះឈ្មោះ ក្នុងគណៈវិជ្ជាជីវៈឲ្យបានត្រឹមត្រូវ និង​ទៀង​ទាត់​ ព្រមទាំងបន្តពង្រីកកិច្ចសហប្រតិបតិ្តការជាមួយសមាគមអ្នកសារព័ត៌មាន សមាគមអ្នកច្បាប់ និង​ស្ថាប័នពាក់ព័ន្ធផ្សេងៗទៀត និងពង្រីក សមាជិកបន្ថែមនៅតាមបណ្តាខេត្ត ដើម្បីពង្រឹង​យន្ត​ការ​សកម្មភាពការងារសមាគមផងដែរ៕ អត្ថបទ៖ រដ្ឋា