​ឥណ្ឌា៖ កងទ័ព​និយាយ​កាលពី​ថ្ងៃ​សុក្រ​ថា ក្រុម​អ្នក​ជួយសង្គ្រោះ​នៅ​ភាគ​ឦសាន​ប្រទេស​ឥណ្ឌា បាន​រកឃើញ​សាកសព ​20​នាក់​ពី​កន្លែង​មាន​បំណាក់​ដីដែល​បាន​កប់​ជំរំ​សាងសង់​ផ្លូវ​រថភ្លើង​មួយ​កន្លែង បន្ទាប់ពី​កិច្ច​ខិតខំ​ប្រឹងប្រែង​ស្វែងរក​នៅ​ថ្ងៃ​ទី​2។

កងកម្លាំង​សន្តិសុខ និង​ក្រុម​សង្គ្រោះ​គ្រោះ​មហន្តរាយនៅតែ​បន្ត ​ជួយសង្គ្រោះ​មនុស្ស​រាប់​សិប​នាក់​ផ្សេង​ទៀតដែល​ត្រូវ​បាន​គេ​ព្រួយបារម្ភ​ថា​ ជាប់​នៅ​ក្រោម​គំនរ​បាក់បែក​នៅ​កន្លែង​កើតមាន​ឧប្បត្តិហេតុ​ក្នុង​រដ្ឋ​ Manipur​។ ​ជនរងគ្រោះ​ភាគច្រើន​ជា​ទាហាន​បម្រុង​ដែល​បាន​ធ្វើការ​លើ​គម្រោង​ផ្លូវ​រថភ្លើង​។ សេចក្តីថ្លែងការណ៍​រប​ស់​កងទ័ព​បាន​និយាយ​ថា ​មនុស្ស ​18​នាក់​ត្រូវ​បាន​គេ​រក​ឃើញ​ដោយ​មាន​សុវត្ថិភាព​រហូតមកដល់​ពេលនេះ ខណៈ​ទាហាន​បម្រុង 15នាក់ និង​ជន​ស៊ីវិល 29នាក់​នៅ​បាត់​ខ្លួន​នៅឡើយ​។

​អ្នកនាំពាក្យ​កងទ័ព​លោក Sumit Kumar Sharma និយាយថា ក្រុម​ជួយ​សង្គ្រោះ​បាន​ជីក​កកាយ​ដីល្បាប់ និង​យក​ផ្ទាំង​ថ្ម​ចេញដើម្បី​ស្វែងរក​អ្នក​នៅ​រស់រានមានជីវិត​បន្ថែមទៀត​។ ​ប្រធាន​រដ្ឋមន្ត្រី​រដ្ឋ​ Manipur លោក N. Biren Singh បាន​សរសេរ​នៅ​លើ​បណ្ដាញ Twitter ថា​ ការបាត់បង់​អាយុជីវិត​រួម​មាន​ទាំង​បុគ្គលិក​កងកម្លាំងប្រដាប់អាវុធ​របស់​យើង ជា​រឿង​សោកសៅ​បំផុត​។ តំបន់​ភាគ​ឦសាន​ដាច់ស្រយាល​របស់​ប្រទេស​ឥណ្ឌា បាន​ទទួលរង​ភ្លៀង​ធ្លាក់​ខ្លាំង​ក្នុង​ប៉ុន្មាន​សប្តាហ៍​ថ្មីៗ​នេះបង្ក​ឱ្យ​មាន​បំណាក់​ដី និង​ទឹកជំនន់​។​ អ្នក​ជំនាញ​និយាយថា បម្រែបម្រួល​អាកាសធាតុ​កំពុង​បង្កើន​ចំនួន​ឧប្បត្តិហេតុ​ បណ្តាល​មក​ពី​អាកាសធាតុ​នៅ​ជុំវិញ​ពិភពលោក៕

អត្ថបទ៖ សុខមាន