បាត់ដំបង៖ ច្រកទ្វារព្រំដែនកម្ពុជា-ថៃ ក្នុងភូមិសាស្រ្តខេត្តបាត់ដំបង បានបើកដំណើរការជាប្រក្រតីឡើងវិញ ដោយ ពុំមានការរឹតត្បិតលើឯកសារចេញចូលឆ្លងកាត់ព្រំដែនទៀតឡើយ។

សូមរំលឹកថា កាលពីដើមខែឧសភា ឆ្នាំ២០២២កន្លងទៅ ច្រកទ្វារព្រំដែនអន្តរជាតិកម្ពុជា-ថៃ ក្នុង ភូមិសាស្រ្តខេត្តបាត់ដំបង ត្រូវបានបើកដំណើរការឡើងវិញ​ដោយមានភ្ជាប់​លក្ខខណ្ឌ​មួយ​ចំនួន​ដូចជាអ្នកដំណើរកាន់ប័ណ្ណព្រំដែន មានបំណងចូលត្រឹមរង្វង់ខេត្ត អាចស្នាក់នៅមិនលើសពី៣ថ្ងៃ ត្រូវមានប័ណ្ណចាក់វ៉ាក់សាំងកូវីដ-១៩។

ចំណែកអ្នកកាន់លិខិតឆ្លងដែនត្រូវមានប័ណ្ណចាក់វ៉ាក់សាំងកូវីដ-១៩ លិខិតធានា​រ៉ាប់រង​សុខភាព​រង្វង់ទឹកប្រាក់ ៣០ម៉ឺនបាត និងចុះឈ្មោះក្នុងប្រព័ន្ធTHAILAND PASS ។

លោក ឃឹម ទិព្វមុនី ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិដូង​ ក្នុងស្រុកកំរៀង បានប្រាប់BTVថា ​ចាប់ពីថ្ងៃទី០១ ខែកក្កដា ឆ្នាំ ២០២២តទៅ ចំពោះអ្នកដំណើរត្រូវចេញទៅប្រទេស​ថៃ តម្រូវឲ្យមានឯកសារផ្ទាល់ខ្លួន ដូចជា លិខិតឆ្លងដែនមានសុពលភាព ឬប័ណ្ណព្រំដែន ប័ណ្ណ​ចាក់វ៉ាក់​សាំងកូវីដ-១៩ ចាប់ពី២ដូសឡើងទៅ ​ហើយចំពោះឯកសារដែលតម្រូវពីមុន​ត្រូវបានលើកលែងទាំងអស់ ។

លោកបានឱ្យដឹងទៀតថា សកម្មភាពដោះដូរទំនិញរវាងភាគីកម្ពុជា-ថៃ កំពុងប្រព្រឹត្តទៅជាប្រក្រតី ពុំមានបញ្ហារាំងស្ទះអ្វីឡើយ។ ទោះបីជាច្រកព្រំដែន ត្រូវបានបើកដំណើរការជាប្រក្រតីឡើងវិញ ប៉ុន្តែ ​ការអនុវត្តវិធានការសុខាភិបាលនៅបន្ត​រឹតបន្តឹង​ដោយគ្មាន​ការធ្វេសប្រហែសឡើយ ដើម្បី​ទប់ស្កាត់ការនាំ ចូលជំងឺកូវីដ-១៩ ៕អត្ថបទ៖ នឿត សុភក្ត្រ