តាកែវ៖ រហូតមកដល់ពេលនេះ​ដំណើរការចាក់វ៉ាក់សាំងដូសជំរុញ លើកទី៣ ជូនប្រជាពលរដ្ឋនៅក្នុងខេត្តតាកែវ ទើបសម្រេចបានប្រមាណជាង៥២ម៉ឺននាក់ ឬប្រមាណតែ ៦៥ភាគរយប៉ុណ្ណោះ។ នេះបើយោងតាមប្រធានមន្ទីរសុខាភិបាលខេត្តតាកែវ។

លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានឲ្យដឹងថា ដំណើការចាក់ វ៉ាក់សាំងដូសជំរុញលើកទី៣ ​គឺចាក់បានប្រហាក់ប្រហែលនឹងខេត្តដទៃ ខណៈបច្ចុប្បន្ន រដ្ឋបាលខេត្ត បាន នឹងកំពុងជំរុញធ្វើយ៉ាងណាឲ្យប្រជាពលរដ្ឋ ​ដែលមិនទាន់ចាក់ដូសជំរុញលើកទី៣ ទៅចាក់ឱ្យបានគ្រប់ៗគ្នា។

លោកវេជ្ជបណ្ឌិតបានបញ្ជាក់ថា អាត្រាអ្នកមិនទាន់ចាក់ដូសជំរុញលើកទី៣ គឺមានកុមារ និង មនុស្ស​ចាស់ ហើយបញ្ហានេះ ​អាជ្ញាធរមូលដ្ឋាន ​និងមន្រ្តីពាក់ព័ន្ធ នឹងចុះទៅខ្នងផ្ទះ ជំរុញឱ្យពួក​គេចាក់ឱ្យ ​បានគ្រប់ៗគ្នា ដើម្បីធ្វើយ៉ាងណាទប់ស្កាត់ឱ្យបាននូវការឆ្លងរីករាលដាល​ជំងឺកូវីដ-១៩នៅក្នុងសហគមន៍។

អភិបាលខេត្តតាកែវ ឯកឧត្តម អ៊ូច ភា កាលពីពេលថ្មីៗនេះ បានបញ្ជាក់ថា រដ្ឋបាលខេត្ត បានធ្វើ ការណែនាំដល់ស្នងការដ្ឋាននគរបាលខេត្ត ​បញ្ជាការកងរាជអាវុធហត្ថខេត្ត ​មន្ទីរអង្គភាពជុំវិញខេត្ត រដ្ឋបាលក្រុងស្រុកឃុំសង្កាត់ ត្រូវធ្វើការផ្សព្វផ្សាយដើម្បីក្រើនរំលឹកដល់ប្រជាពលរដ្ឋទាំងអស់ នៅ​តាមមូលដ្ឋានរបស់ខ្លួន ឲ្យទៅទទួលកាចាក់វ៉ាក់សាំងបង្ការជំងឺកូវីដ-១៩ ​ចាប់តាំងពីដូសមូលដ្ឋាន រហូតដល់ដូសជំ រុញឱ្យបានគ្រប់គ្នា៕ អត្ថបទ៖ គុជ វិភាគ