បាល់ទាត់៖ ក្រុមជើងឯកពិភពលោក ២០១៨ បារាំងរកបានជ័យជំនះដំបូងក្នុងពូល D ក្រោយឈ្នះនៅទឹកដីកាហ្សាក់ស្ថាន។ ប្រកួតដំបូងនៅទឹកដីប៉ារីស បារាំងបើកឆាកវគ្គជំរុះរបស់ខ្លួនដោយស្មើអ៊ុយក្រែនក្នុងទឹកដីខ្លួនឯង ខណៈការប្រកួតនេះ Ousamne Dembele រកបានមួយគ្រាប់ និងមួយគ្រាប់ទៀត Sergiy Maliy ចូលទីខ្លួនឯង។
ជ័យជំនះនេះធ្វើបារាំងឡើងឈរលើគេក្នុងពូល D មាន ៤ពិន្ទុ ខណៈហ្វាំងឡង់ និងអ៊ុយក្រែនមាន ២ពិន្ទុដូចគ្នា។ ងាកមកអាល្លឺម៉ង់ បានចាប់ផ្តើមយុទ្ធនាការប្រកួតជំរុះរបស់ខ្លួនឥតខ្ចោះ ក្រោយឈ្នះប្រកួតទីពីរក្នុងពូល J នៅទឹកដីរ៉ូម៉ានី ១-០ ដោយគ្រាប់បាល់របស់ Serge Gnarbryនាទីទី១៦។ បីពិន្ទុនេះអាល្លឺម៉ង់បន្តឈរលើគេមាន ៦ពិន្ទុពេញជាមួយក្រុមលេខ២ អាម៉េនីមាន ៦ពិន្ទុដូចគ្នា។ មិនខុសពីអាល្លឺម៉ង់ ក្រុមអង់គ្លេសក៏រកបានបីពិន្ទុលើកទី២ របស់ខ្លួនដែរក្រោយជ័យជំនះនៅទឹកដីអាល់បានី។ Harry Kane និង Mason Mount រកបានម្នាក់មួយគ្រាប់ក្នុងជ័យជំនះ ២-០ នេះធ្វើអោយក្រុមរបស់លោក Gareth Southgate ឈរលើគេក្នុងពូល I នេះមាន ៦ពិន្ទុពេញតាមពីក្រោយដោយប៉ូឡូញ។
យប់មិញនេះប៉ូឡូញបានយកឈ្នះអង់ដូរ៉ា ៣-០ ខណៈខ្សែប្រយុទ្ធ Bayern Munich, Robert Lewandowski រកបាន ២គ្រាប់ម្នាក់ឯង។ ប៉ូឡូញ និងហុងគ្រីឈរលេខ២ និងលេខ៣ មាន ៤ពិន្ទុដូចគ្នា។ ទៅមើលក្រុមអេស្ប៉ាញរកបានជ័យជំនះដំបូងរបស់ខ្លួន ក្រោយយកឈ្នះនៅទឹកដីហ្សកហ្ស៊ីទាំងប្រឹង ២-១។ បន្ទាប់ពីការនាំមុខរបស់ក្រុមម្ចាស់ផ្ទះហ្សកហ្សីនៅនាទីទី៤៣ ក្រុមភ្ញៀវអេស្ប៉ាញត្រូវតាមពីក្រោយនៅនាទីទី៥៦ ដោយខ្សែប្រយុទ្ធ ManCity, Ferran Torres ខណៈគ្រាប់ជ័យជំនះត្រូវរង់ចាំដល់ចុងម៉ោងនាទីទី៩០+២ ដោយ Dani Olmo។ អេស្ប៉ាញក្រោយឈ្នះលើកនេះឡើងមកលេខ២ មាន ៤ពិន្ទុ ខណៈស៊ុយអែតមាន ៦ពិន្ទុពេញក្រោយឈ្នះនៅទឹកដីកូសូវ៉ូ ៣-០។
ពូល C អ៊ីតាលីយកឈ្នះនៅទឹកដីប៊ុលហ្ការី ២-០ ឈរលើគេក្នុងពូលមាន ៦ពិន្ទុពេញជាមួយស្វ៊ីសដែលឈ្នះ ២ប្រកួតដូចគ្នាក្រោយឈ្នះលីទុយអានី ១-០។ ពូល A ស៊ែប និង ព័រទុយហ្កាល់ឈរលេខ១ និងលេខ២ មាន ៤ពិន្ទុបន្ទាប់ពីក្រុមទាំងពីរស្មើគ្នាកាលពីថ្ងៃសៅរ៍ ជាពិសេសព័រទុយហ្កាល់មានឱកាសគ្រាប់ជ័យជំនះរបស់ Cristiano Ronaldo ដែលផុតខ្សែបន្ទាត់ទីទៅហើយ តែអាជ្ញាកណ្តាលមើលមិនឃើញ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
