ស្វាយរៀង៖ សមិទ្ធផលនានារួមមាន អគារសាលាបឋមសិក្សា ទីចាត់ការ មតេ្តយ្យសិក្សាវត្តដូង និងសមិទ្ធផលនានា ស្ថិតនៅភូមិដូង ឃុំដូង ស្រុករមាសហែក ខេត្តស្វាយរៀង ត្រូវបាន​ប្រារព្ធ​ពិធីសម្ពោធបើកដាក់ឲ្យប្រើប្រាស់ជាផ្លូវការ ​កាលពីថ្ងៃទី០២ ខែកក្កដាម្សិលមិញ ក្រោមវត្តមាន ឯកឧត្តម សៅ សុខា អនុប្រធានក្រុមការងារគណបក្សប្រជាជនកម្ពុជា ចុះជួយខេត្ត និងជា​ប្រធានក្រុមការងារចុះជួយស្រុករមាសហែក ។

ឯកឧត្តមប្រធានក្រុមការងារ មានប្រសាសន៍​សំណេះសំណាល និងបណ្ដាំ​ផ្ញើសាក​សួរសុខទុក្ខពី​សំណាក់​សម្ដេច​តេជោ ហ៊ុន សែន និងថ្នាក់ដឹកនាំ​គណបក្សប្រជាជនកម្ពុជា ជូនចំពោះបង​ប្អូន​ពលរដ្ឋ លោកគ្រូអ្នកគ្រូ សិស្សា​នុសិស្ស ដែលបានអញ្ជើញមកចូលរួម​អបអរ​សាទរ​សមិទ្ធផលថ្មីៗ​ដែលកើតឡើង​នៅក្នុងឃុំដូងនាឱកាសនោះ។

ឯកឧត្តម ក្នុងនាម​ក្រុមការងារគណបក្សប្រជាជនកម្ពុជា​ ចុះជួយស្រុក ​លោកគ្រូអ្នកគ្រូ ព្រះសង្ឃ និង​សិស្សានុសិស្សទាំងអស់ ​សូមថ្លែងអំណរគុណយ៉ាងជ្រាលជ្រៅចំពោះ​ បណ្តាក្រុមហ៊ុន និង​សប្បុរសជននានា ដែលបានរួមចំណែក​ជាមួយរាជរដ្ឋាភិបាលក្នុងការកសាង​សមិទ្ធផលថ្មីៗ​បន្ថែមទៀត​ផ្តល់ជូនដល់ពលរដ្ឋ ​ពិសេសផ្ដល់ជូនសិស្សានុសិស្ស ចូលសិក្សារៀនសូត្រ ខណៈដែល​តំបន់ជាយដែនមួយនេះ ប្រឈមនឹងការកង្វះអាគារសិក្សា ​និងហេដ្ឋារចនាសម្ព័ន្ធផ្សេងៗទៀត ដើម្បីប្រើប្រាស់។

ទន្ទឹមនឹងនោះដែរ ឯកឧត្តម សៅ សុខា ក៏បានអំពាវនាវដល់លោកគ្រូ អ្នកគ្រូ ព្រះសង្ឃ ពិសេស​ពលរដ្ឋទាំងអស់ ត្រូវចូលរួមថែរក្សាសមិទ្ធផលដែលកើត​មាននៅតំបន់នេះ​ឲ្យបានគង់វង្ស​សម្រាប់​ប្រើប្រាស់ ​ផ្តល់ឲ្យកូនចៅរបស់យើងបាន​ចូល​សិក្សារៀនសូត្រក្រេបយកចំណេះដឹងកសាង​ធនធាន​មនុស្ស ដើម្បីបន្តចូលរួមការពារ និងអភិវឌ្ឍន៍​ជាតិ ពីបច្ចុប្បន្ន និងទៅអនាគត ពិសេស​ត្រូវធ្វើការ​ទប់ស្កាត់​រាល់សកម្មដែលបង្កឡើងដោយជនអគតិមួយចំនួន ​ក្នុងការវាយប្រហារ​មកលើការដឹកនាំ​របស់​រាជរដ្ឋាភិបាលបច្ចុប្បន្ន ​ក៏ដូចជាធ្វើការនឹងបន្តអនុវត្តនយោបាយភូមិ-ឃុំមានសុវត្ថិភាព​បន្ថែម​ទៀត ដើម្បីរួមចំណែកថែរក្សាសន្តិសុខសណ្ដាប់ធ្នាប់រក្សាសន្តិភាពអោយបានគង់វង្ស ​នាំកូនចៅ និង​ក្រុមគ្រួសារ​ទៅចាក់វ៉ាក់សាំងការពារជំងឺកូវីដ១៩​ ឲ្យបានគ្រប់ៗគ្នា ​ពិសេសបន្តអនុវត្តវិធានការរបស់​ក្រសួង​សុខាភិបាល ៣ការពារ និង ៣កុំ ​ឲ្យបានខ្ជាប់ខ្ជួនតាមរយៈ​ ការពាក់ម៉ាស រក្សាគំលាត ខណៈដែល​ជំងឺកូវីដ-១៩ ​បាននិងកំពុងបន្តកើតមាននៅក្នុងសហគមន៍សារជាថ្មី ៕

អត្ថបទ៖ ភា សារិទ្ធ