កំពត៖ អាជ្ញាធរខេត្ត និងមន្ត្រីជំនាញមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តកំពត បានប្តេជ្ញាថា នឹងខិតខំធ្វើយ៉ាងណា ឲ្យការងារចុះបញ្ជីដីធ្លី (វាស់វែង ចេញប័ណ្ណកម្មសិទ្ធិ) ជូនប្រជាពលរដ្ឋឲ្យបានឆាប់រហ័សបំផុត ទៅតាមគោលការ និងយន្តការរបស់រាជរដ្ឋាភិបាលកម្ពុជាផ្តល់ជូនប្រជាពលរដ្ឋរបស់ខ្លួន​។

ថ្លែងក្នុងពិធីប្រកាសបិទផ្សាយទិន្នន័យជាសាធារណៈនូវឯកសារ ​នៃ​ការ​វិនិច្ឆ័យ ក្នុង​ដំណើរ​ការចុះបញ្ជីដីធ្លី លក្ខណៈជាប្រព័ន្ធ ស្ថិតនៅភូមិទូកមាស ឃុំទូកមាសខាងលិច ស្រុកបន្ទាយមាស ខេត្តកំពត កាលពីថ្ងៃទី១ ខែកក្កដា ឯកឧត្តម ម៉ៅ ធនិន អភិបាលខេត្តបានលើកឡើងថា ដី​សំខាន់ណាស់សម្រាប់មនុស្ស ​​ដីគឺជាជីវិត​ ហើយដីក៏នាំមកនៅបញ្ហាច្រើនដែរ ជម្លោះខេត្តកំពតជាង ៩៩% គឺដោយសារដីធ្លី ដូច្នេះទើបរាជរដ្ឋាភិបាលមានយនុ្តការចុះបញ្ជីដីធ្លីជូនពលរដ្ឋ។ ហើយរដ្ឋបាលខេត្តកំពត និងមន្ទីរជំនាញ ពាក់ព័ន្ធសូមប្តេជ្ញាធ្វើយ៉ាងណាពន្លឿនការងារ​នេះឲ្យ​បាន​លឿនបំផុត។

ឯកឧត្តម បានបន្តទៀតថា បើទោះជាដីសំខាន់យ៉ាងណាក៏ដោយ សូមឲ្យប្រជាពលរដ្ឋប្រកាន់​នូវ​គោលការណ៍ស្មោះត្រង់ របស់នរណា អ្នកនោះយក ​ហើយមន្ត្រី​ និងប្រជាពលរដ្ឋ សូមកុំឃ្លាតឆ្ងាយ​ពីច្បាប់​ដោយសារតែអាហារបីពេលឲ្យសោះ។

ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្ត លោក ដាញ់ សារី បានបញ្ជាក់ថា ដំណាក់កាលបិទផ្សាយជាសាធារណៈនូវឯកសារ នៃការវិនិច្ឆ័យនេះ ពិតជា​មានសារៈសំខាន់ សូមប្រជាពលរដ្ឋនាំគ្នាមកពិនិត្យ និងផ្ទៀងផ្ទាត់ឲ្យបានច្បាស់លាស់។

ស្រុកបន្ទាយមាស បានចាប់ដំណើរការធ្វើការចុះបញ្ជីដីធ្លីមានលក្ខណៈជាប្រព័ន្ធចាប់ពីថ្ងៃទី ០៧ ខែ មីនា ឆ្នាំ ២០០៩ គិតមកដល់បច្ចុប្បន្ន ទទួលបានលទ្ធផលរួមមាន ​បានចុះបញ្ជីរួចបានចំនួន ៦២ភូមិ បានត្រៀមបិទផ្សារទិន្នន័យជាសាធារណៈ ៦ភូមិ ត្រៀមរៀបចំបិទផ្សាយបន្ត៣ភូមិ កំពុង​ចុះបញ្ជី១ភូមិ និងស្នើសុំប្រកាសតំបន់វិនិច្ឆ័យចំនួន៥ភូមិ ​នៅថ្ងៃទី៣ ខែកត្តដានេះ។ ដោយឡែកភូមិទូកមាសដែលត្រូវធ្វើការប្រកាសបិទផ្សាយ​ ទិន្នន័យ​ជាសាធារណៈនៅថ្ងៃនេះ មាន​ផ្ទៃដីសរុបចំនួន ៤៦១ហិកតា ស្មើនឹង ១២៣៤ក្បាលដី របស់ម្ចាស់ដី២៩៨ គ្រួសារ ៕

អត្ថបទ៖ អន សារឹម