បាល់ទាត់៖ ខ្សែប្រយុទ្ធចំណូលថ្មីរបស់ក្លិបភ្នំពេញក្រោន Valeriy Hryshyn បានបង្ហាញខ្លួនលើកដំបូង ក្នុងក្របខណ្ឌលីគកំពូលកម្ពុជាហើយ បន្ទាប់ពីត្រូវបានគ្រូបង្វឹកលោក Oleg Starynskyi ដាក់លេងនៅវគ្គទី២ និងរកបាន ១គ្រាប់ក្នុងជ័យជម្នះ ២-១ លើក្រុមម្ចាស់ផ្ទះគិរីវង់សុខសែនជ័យក្នុងការប្រកួតសប្ដាហ៍ទី៤ នៅកីឡដ្ឋានគិរីវង់សុខសែនជ័យ ខេត្តតាកែវ កាលពីចុងសប្ដាហ៍កន្លងទៅ។
ជំនួបដ៏តានតឹងនេះ ក្រុមសិង្ហក្រហមបានបើកការនាំមុខក្រុមម្ចាស់ផ្ទះ ១គ្រាប់មុននៅនាទី៣៦ បន្ទាប់ពីខ្សែបម្រើ-ប្រយុទ្ធសញ្ជាតិកូឡុំប៊ី Andres Nieto តែតទម្លាក់ឲ្យខ្សែការពារ កុក បូរីស តែតបញ្ចូលទីបានសម្រេច។ ប៉ុន្ដែទន្ទឹមជាមួយការបំបែកពង់មាន់បានមុន ពីសំណាក់ក្រុមភ្ញៀវ ក្រុមមាន់គកគិរីវង់ក៏បានបង្កើតឱកាស និងដាក់សម្ពាធលើក្រុមភ្នំពេញក្រោនជាច្រើនលើកច្រើនសារផងដែរ តែគ្មានសំណាងក្នុងការបញ្ចប់ទី។ ចូលវគ្គទី២ ការប្រកួតកាន់តែស្វិតស្វាញ ខណៈក្រោយខ្សែប្រយុទ្ធសញ្ជាតិអ៊ុយក្រែន Valeriy Hryshyn ប្ដូរចូលនៅនាទី៦៨ គេបានបង្កគ្រោះថ្នាក់ច្រើនដ៏ក្រុមម្ចាស់ផ្ទះ ជាក់ស្ដែងនៅនាទី៨០ គេបានស៊ុតគ្រាប់ទី២ ឲ្យក្រុមភ្នំពេញក្រោនយ៉ាងល្អ ក្រោយឆក់បាល់បានពីប្រធានក្រុមគិរីវង់ ចាន់ ឧត្តម ដែលទប់បាល់មិនបានល្អ ។ យ៉ាងណាមិញគិរីវង់ក៏មានឱកាសវាយបកបាន ១គ្រាប់វិញដែរ ដោយខ្សែប្រយុទ្ធកាមេរូន David Julien នៅនាទី៨៩ មុនអាជ្ញាកណ្ដាលផ្លុំកញ្ចែបញ្ចប់ការប្រកួត។
នេះគឺជាជ័យជម្នះក្រៅដីលើកទី២ របស់អតីតក្រុមជើងឯក ៦សម័យកាលភ្នំពេញក្រោន បន្ទាប់ពីប្រកួតបើកឆាក ពួកគេបានយកឈ្នះក្រុមសូលទីឡូអង្គរ ៧-១។ ជ័យជម្នះនេះបានធ្វើឲ្យក្រុមលោក Oleg Starynskyi ឡើងឈរកំពូលតារាងវិញបណ្ដោះអាសន្ន តែមាន ៦ពិន្ទុក្នុងដៃ និងគ្រាប់បាល់ចំណេញ ៧គ្រាប់ ស្មើគ្នាជាមួយក្រុមព្រះខ័នរាជស្វាយរៀងដែរ។ ចំណែកគិរីវង់បានស្គាល់បរាជ័យជាលើកទី២ ក្នុងចំណោម ៣ប្រកួត ខណៈ ២ប្រកួតដំបូងគឺឈ្នះអាស៊ីអឺរ៉ុប ៤-២ និងចាញ់អង្គរថាយហ្គឺរ ២-០៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
